James 1

₁Sàlà kaleta màlà James, Katù molopai Itepulu Jesus Christ yapyoto winàpaino.

“Wakù pe na' messatàu?” tetok tamù'nawolon kon12 pan kon ikkok Katù ponalok kon kappon yamùk, iwetta'nùssak kon piyak inmenukappù.

₂Utonpa yamùk! Atauchinpatàk kon yà'là yekkwa là ittuntok uyàpù ewinàkài'nokon yau, ₃masapùla mùttuyatàik ailon tetok auya'nokon uya màlà yekkwa ton ittuntok yawà àutà yau, ipàlikatok imeluntàlù pe we'nàtok wech itepeppù pe. ₄Tamù'nawolon tùpàlikaik ettàk, meluntà pe ewena kon pa, appù pe, ikasa tamù'nawàlà. ₅Tùse ànù'là àkklottau'nokon nai'nùk wechi pukkek pùla yau, nàpùlemaik, itùnài tùpyak yekamappoi; masapùla Katù mùkkàlà lepanài tùusetakkaik pùla molopai tùusàulàmaik pùla tamù'nawolon kon pàk. ₆Tùse ailon mùkatàik Katù yekamappo auya'nokon yau, molopai iwekkupù na'màichi lù tukaik pùla; masapùla ànù'là na'màichi lù tawon wechi màlà chipachipa palau pon kasa, màlà tùutàsen molopai tùutasse'masen assetun winà. ₇Ànù'là mùkkàlà yekkwa kappon yà'làlà yepolo tùuya Itepulu winàpai pe kùsekamatak, ₈masapùla asa'là ichenumenkatok wechi màlà tamù'nawolon tùnkupù yau.

₉Tàwà yà'là pùn ailon tawon nùtauchinpai, masapùla Katù uya tanùnsak kon pàk, eke kulu mùkkàlà Katù yenu yau. ₁₀Tàwà temamin kenan kon ailon tawon kappon tùutauchinpaik nechii masapùla Katù uya tùnuttàsak pàk, àsà'mùla tùmasak ya pàk. Masapùla temamin kenan wena ippla màlà wanak yùpùlù kasa. ₁₁Wei tùwepakkasen molopai tùwa'mintasen a'neppe molopai tùwattasen yaipùtanù'nài; itùpùlù tùwessolokasen molopai wakù pe iwettok tùumattasen. Màlà kasa làma temamin kenan kappon umatta màlà tùusemaminnùttà pe yekama ya tùse.

₁₂Tùutauchinpasen mùkkàlà kappon ailon pe tùwessen ittuntok kùlottawàlà. Masapùla ittuntok yentaika ya yau ilepa màlà wema'nà yalùko ke, e'mantok Katù uya itùlù tùuya tù'nùnmanài nan piyak teppù lùppù ke. ₁₃Ànù'là “Sàlà ittuntok màlà Katù winàpaino,” kùkkatak. Masapùla Katù mùkkàlà ànù'là ittunài àli ke pen molopai àli uya Katù ittu pen màlà. ₁₄Tùse kappon mùkkàlà tùttutok ke tàutamùipasen, molopai màlà uya imalentàsak àli ànkupai iwettoppe; ₁₅màlàyau àli ànkuppai iwettok màlà àli yak yanài, molopai àli kuttok ya màlà yanài weli'nàtok yak iwenukattoppe.

₁₆Màlàpàk kesennakatàu, utonpa yamùk u'nùn ton! ₁₇Tamù'nawolon wakù iwalai lepantok màlà tùuyàssen epùn poi; Katù winàpai, tamù'nawolon pata weyu yamùk kau nai'nùk màlà inkonekappù. Tùwemyakammasen pen, màlà tùse pùla tùwelattà yau ewalupà ne'nài pen. ₁₈Teselu winà Katù uya kùnepùppù kon emennak wema'nàtok yak màlà ailon tùmaimu yai, wapiyalok pata yau we'nàtoppe tùponalok kon kappon yamùk kùlottau.

₁₉Sàlà ittutàk kon, utonpa yamùk kulu! Tàwà tamù'nawolon kon asse'ne yetanài nan pe nechii, tùse tànànpàk tùuselupasan pe, molopai asse'ne tùwe'naikasen pe pùla. ₂₀Masapùla kappon we'naikatok màlà wakù Katù yeselu wekuttok pùikattànài pen. ₂₁Màlàpàk uchi tamù'nawolon àli ton eyeselu kon inonkatàk kon Katù Maimu yawàlà ettàk kon àssà'mùla, àsà pe pùla molopai màlà imaimu inpàmàppù eyewan kon yak yanùntàk kon, màlà àpùikattànài'nokon yeppe nai'nùk.

₂₂“ Tetatai là te, ” tukaik kesennakatàu Katù Maimu yetasak auya'nokon yau. Tùse ikuttàk kon làkku. ₂₃Masapùla ànù'là imaimu yetanài tùse iku'nài pen wechi màlà kappon wanamali yak tenpata yennài kasa. ₂₄Tùusensen mùkkàlà molopai tùutàsen molopai asse'ne ànùk kasa là tùuseneppù puttàka'nù'nài. ₂₅Tùse mùkkàlà, Law Katù winàpaino yennài echipalà, kappon yamùk pùikattànài àli kuttok yapai yennài molopai yene pàk tùwessen, tùnetappù tùputtà'ka'nùsse pùla tùse iku'nài, mùkkàlà pùlema màlà inkupù yawàlà.

₂₆Ànù'là àkklottau'nokon nai'nùk, “Katù ya'lon Iulà,” tawon, molopai tani yesappe tùwessen pen wechi màlà yà'làlà wakù pùla, molopai ichennaka Katù ya'lon pe iwechi wechi yà'la pe pùla. ₂₇Sàlà màlà wakù esuken we'nàtok Katù, Kùkàipùnù yemloto po: ichan pùnon molopai ikàipùnù pùnon mainanpa molopai itayappù iwelichak kon mainanpatok wettalumatàntok yau, molopai mattanù'nài àli yeselu winàpai we'nà màlà wakù.