Luke 10

₁Sàlà tùpo Itepulu uya tùulon kon kàyik yamùk yanùmùppù 72 pe. Molopai tok yeunokoppù ya asa'là'ne, tùwapiya tok utàtoppe tamù'nawàlà pata yamùk tùutàtok yak woton kon yak. ₂Tok pàk, “Eke pe kulu temeikkasan man tùse tukke pùla kulu ipili'nài nan man. Temeikkasan yesak ipawanattàtàk kon tù'mà yak tùwe'wotokoma woton kon yeunotoppe ya,” teppù Jesus uya. ₃“Itàtàk kon! Eyeunoko kon uya sàlà kalinilu munkà kasa, àsà ton kamo yamùk kùlottak,” teppù ya. ₄“Pùlayatta yen kùsatàu wapùla paiki wapùla sappattu là. Molopai ànù'là yelupa pàk keleutatàu asantau. ₅Yà'là yattai là tapùi tak ewewonsak kon yau, wapiya, ‘Tàwà echitonpa pe we'nàtok sàlà tapùi tau nechii!’ mùkatàik. ₆Wakù pe alomùla tùwessen kappon wechi molo yau, pùlemantok auya wechi màlà ipo. Màlà kasa pùla iwechi yau, iwennappo màlà apyak. ₇Molo màlà tapùi tau mettàik, tok uya elepatok kon mànattàik molopai minchitàik masapùla tùwe'wotokomasen mùkkàlà te'masen. Katamapàttàu tewinan tapùi tapai tùulon tapùi tak. ₈Pata yak àutàsak kon yà'là yattai là yau, molopai ayanùnsak kon yau, eyemloto kon pona inonkasak mùnattàik. ₉E'nek ton mipittàtàik màlà pata yau. Molopai kappon yamùk pàk, ‘Itepulu pe Katù wettok uyàssak man mei pùla kulu apyakù'nokon,’ mùkatàik. _10-11Tùse yà'là yattai là àutàsak kon pata yak tùse ayanùnsak kon pùla iwechi yau, asantak mùtàtàik molopai, ‘Non ippunuppù apatassek kon yawon tùtta kon pàk iwekki'nàmasak lùppù kuka ina uya sàlà ewinàkàik nokon. Tùse sàlà ittutàk kon, Katù wettok itepulu pe uyàssak man mei pùla kulu apyakù'nokon,’ mùkatàik. ₁₂Tekamayaik àpàkù'nokon, Ittuntok Weyu yattai Katù uya eke peiwa usentuppantok yenpoika màlà Sodom winàkàik màlà pata yentai!” teppù Jesus uya tok pàk.

₁₃“Àsà pe nen mà iwechi kupù màlà àpona'nokon tà Korazin pon kon! Àsà pe nàlà mà iwechi kupù màlà àpona'nokon tà Bethsaida pon kon! Masapùla eke ton wotoko yamùk ikussak lùppù àklottau'nokon wekkussak Tyre molopai Sidon po yau, pena kappon yamùk weleutappù sàlà eppaino. Molopai àlichi wonpù yak tok wepontàppù eppaino, molopai ulumlàppà sululukkappù tok uya eppaino tùpona'nokon àli pe tùwettok kon winàpai tùwelattàsak kon yekama pe. ₁₄Katù uya eke peiwa usentuppantok yenpoika màlà Ittuntok Weyu yattai Tyre molopai Sidon pon kon pàk amyamlo yentai. ₁₅Amyamlo nen Capernaum pon kon kakàik epùn pona ausanùmùiche' nokon mettantàu. Eyenu'ma kon màlà tàwàlàlà tùuyassen apok patassek yak,” teppù Jesus uya.

₁₆Ta'lon kon pàk, “Ànù'là eyetanài'nokon uya uyeta màlà. Ànù'là ànulunpanài'nokon uya unulunpa màlà. Ànù'là unulunpanài uya uyeuno'nàippù nulunpa màlà,” teppù ya.

₁₇72 pan kon kàyik yamùk wennapoppù màlà eke pe tùutauchinpaik. “Itepulu, àli akkwalù yamùk là màichi ina maimu yawàlà nettai tà, eyesek yau tayontà pe ina uselupasak yau!” teppù tok uya. ₁₈Jesus uya tok yeikuppù, “Settan wepuka tentai pata wekamlippù kasa Epùn poi. ₁₉Apàikkek ke elepasak kon uya man, àkài yamùk polo ausalà kon pa, molopai malità yamùk polo, molopai tamù'nawolon eya'nomanài yapàikketù yepoi ewechi kon pa. Yà'làlà uya amattanùpù kon pen màlà. ₂₀Katauchinpatàu àli akkwalù yamùk wechi amaimu kon yawàlà pàk. Tùse atauchinpatàk kon eyesek kon we'menukasak làkku epùn po pàk,” tukaik tok yeikuppù ya.

₂₁Màlà yattai Jesus wanùssak utauchinpatok ke Wakù Akkwalù winà uya, “Ayapulàyan Iulà Ukàipùnù, epùn molopai non Yepulu. Masapùla pukkek ton molopai ichenupasak kon winàpai ànonamùppù yenpoikasak auya ichenupasak kon pen yemyak pàk. Ewaik, Ukàipùnù, sàlà wekkussak màlà iche ewettok kasa molopai ayauchinpanài pe,” teppù ya.

₂₂“Tamù'nawolon tùsak ukàipùnù uya man uyemyak, ànù'là uya ànùk pe là Imu ittu pùla iwechi màlà, tùse Ikàipùnù neken, molopai ànù'là uya ànùk pe là Ikàipùnù ittu pùla iwechi màlà tùse Imu neken, molopai mùkyamlo Imu uya tùkàipùnù yenpoikatok itemyak ton nàlà,” teppù ya.

₂₃Màlàyau Jesus welattàppù ta'lon kon winàkàik molopai tok pàk, “Matauchinpayatàik màlà yamùk menyatài'nùk yene auya'nokon pàk! ₂₄Masapùla tukkan kon Katù Maimu yenpoikannan molopai kin yamùk wechippù menyatài'nùk enenpai, tùse tok uya yene pùla iwechippù molopai metayatài'nùk enetapai, tùse tok uya yetappù pen, ukayaik àpàkù'nokon,” teppù ya.

₂₅Màlàyau wakù pe kulu law ittunài wà'mùssakkappù Jesus ittu pe yekamappoppù ya. “Enupanài, yà'là kupù uya tàwàlàlà wema'nàtok yepotoppe uya?” tukaik. ₂₆Jesus uya yeikuppù, “Yà'là tawon ken Law yau iwe'menukasak? Yà'là tesak ya yennài àmàlà?” tukaik. ₂₇Kàyik uya yeikuppù, “ ‘Itepulu Akatùyi i'nùnmakà tamù'nawàlà eyewan ke tamù'nawàlà ayakkwalù ke, tamù'nawàlà emeluntàlù ke, tamù'nawàlà eusenumenkatok ke, {DEU 6.5}’ molopai, ‘Àtonpa i'nùnmakà eyiwalà mechi'nùnma yai'nùk kasa,’ ” tukaik. {LEV 19.18} ₂₈“Ikasa yeitok auya man. Sàlà mùkupùik molopai ewemapù màlà,” tukaik Jesus uya yeikuppù màlà.

₂₉Tùse ikasa tùwechi enenpoikapai iwechippù, màlàyau Jesus yekamappoppù ya, “Ànùk ken uchi mùkkàlà utonpa?” tukaik. ₃₀Jesus uya yeikuppù, “Kappon utàppù màlà Jerusalem poi Jericho pona, màlàyau ite'ma tau amak ton uya yachippù. Tok uya ipon kalapàtùppù molopai ippoppàtùppù, molopai tok utàppù. Iwenpulumansak nàmàppù tok uya. ₃₁Màlà yattai nàlà paatele utàppù màlà, màlà lùppù asantawà, kàyik yensak tùuya yau iitàppù iwoi. ₃₂Màlà yattai làma Levi uyàpùppù màlà motak, kàyik yeneppù ya, iitàppù làma iwoi. ₃₃Tùse, kappon Samaria pon, màlà yawàlà nàlà tùutàsen uyàpùppù ipyak. Yensak tùuya yau ichentupappù kulu màlà. ₃₄Iitàppù ipyak, ite'netù pona wain molopai ailù mappù ya, molopai iwontàppù ya. Màlàyau nen uchi tùkùn pona inonkappù ya. Yalàppù ya te'mai'no tapùi tak. Molo imainanpappù ya. ₃₅Iwemassak pe, asa'lon chilùpa pun mokkappù ya, itùlùppù ya tapùi mainanpanài yemyak. ‘Pùsàlà imainanpakà, molopai wennaposak yau ipàk anapulàppù lùppù ye'ma uya màlà,’ teppù ya tapùi mainanpanài pàk,” tukaik. ₃₆Jesus uya, “I'nai ken pùsamlo kùlottau, kàyik, amak yamùk nachippù tonpa pe mùttuyan?” teppù. ₃₇Wakù pe kulu law ittunài uya yeikuppù, “Mùkkàlà ichentupasak lùppù ipàk,” tukaik. Jesus uya yeikuppù, “Itàkàichi molopai màlà kasa mùkupùik,” tukaik.

₃₈Tùutà kon pe Jesus molopai ya'lon kon uyàpùppù pata yak, molo nossan Martha itesek uya tok yanùmùppù màlà tùwùk tak. ₃₉Takon ke iwechippù màlà Mary itesek. Mùkkàlà weleutappù màlà Itepulu pùta piyau enupantok ya yeta pàk. ₄₀Martha utaimelunpappù màlà, tamù'nawolon wotoko tùnkupù kupù pàk. Màlàyau iyàpùppù, “Itepulu, uyakon uya ken na' unànsak tewincha wotoko kutoppe uya pàk yà'là là te auya pùla nai? Yeunokkà upùikattàse iyàtoppe!” teppù ya. ₄₁Itepulu uya yeikuppù, “Martha, Martha, mataimelunpayaik molopai mesenumenkayaik eke pe tukkan pàk. ₄₂Tùse tewinan nà molo man iche kulu we'nàtok. Mary uya iwalai yanùnsak man molopai imokka là iwinàpài pen màlà,” tukaik.