Luke 16

₁Jesus uya ta'lon kon pàk, “Mamin yesak kàyik wechippù màlà molo tùpùlayattayi mainanpanài kenan. Molopai màlà ipùlayattayi mainanpanài uya imainanpa pùla iwechi yekamappù ipàk. ₂Ikà'mappù mamin yesak uya. Molopai ipàk, ‘Yà'là yekkwa sàlà tetayaik nùk àpàk? Tamù'nawàlà uyemamin mainanpa auya kaletayi itùkà upyak. Sàlà yentak uyemamin mainanpanài pe ewettu'ma pen màlà,’ teppù ya. ₃‘Uyepulu wekkussak uwotokoyi yapai unonka pàk man te.’ Teppù ya tùyiwalà, ‘ Yà'là kupù uya là sa' uchi ko? Meluntà pe pùla tàwà wechi non yaka toppe uya, molopai wekkuli'mayaik enkui pe eppai pùla lù,’ teppù ya. ₄Tùttupàssaik unkupù woton! Uwotokoyi pùla iwechi yau, tùwechi yakon non ke wechi màlà molopai tok uya uyewonùppù tùwùk kon tak,’ teppù ya. ₅Màlàpàk tamù'nawolon kon tepulu ye'man nan nùssan pen kappon yamùk ka'mappù ya. Wapiyalok yekamappoppù ya, ‘Yà'là kaichalà ken uyepulu ye'mappù auya pùla nai?’ tukaik. ₆‘Tukke 100 pe eke iten kaiwan palu yanùmùppù uya,’ teppù ya.

“‘Sàlàichi màlà ayatuwanchiyi ye'mappù auya pùla nai'nùk uyepulu piyak, eleutakà molopai 50 pe imenukakà,’ teppù ya.

₇“Tùulon pàk, ‘Àmàlà nen, yà'là kaichalà ye'mappù auya pùla nai?’ teppù ya. ‘1000 pe iten àlichi walai,’ teppù mùkkàlà uya.

“‘Sàlà yenkà ye'mappù auya pùla teppù itepulu uya ipàk, 800 pe imenukakà,’ teppù ya.

₈“Ailon pen pùlayatta mainanpanài yepulu uya yapulàppù màlà ittunài pe iwessak pàk. Kappon yamùk sàlà non pon kon mùkyamlo ikasa pe tukaik tùwotokoyi kon ku'nài nan, akkwa yawon kon kappon yamùk yentai,” teppù Jesus uya.

₉Jesus uya wateppù, “Màlàpàk tekamayaik àpà'kù'nokon, Echitonpa pe ettàk kon, wakù ikuttàk kon sàlà wolù yawon mamin ke, iwu'massak yau tùutauchinpaik ayanùntoppe tàwàlàlà wema'nà pata yak. ₁₀Ànù'là ailon pe tùwessen malalon yau, wechi màlà ailon pe eke ton yau. Ànù'là ailon pe pùla tùwessen malalon yau wechi màlà ailon pe pùla eke ton yau. ₁₁Ailon pe pùla ewessak talà non pon mamin mainanpa pàk yau, yà'là kasa ken enpen we'nà àpàk ailon nen uchi mamin pàk? ₁₂Molopai ailon pe pùla ewessak tùulon ponalok pàk yau, ànùk uya ken elepa àponalok ke?

₁₃“Ànù'là pùla iwechi màlà tùwe'wotokomasen asa'lon kon itepulu yamùk ponaloppe. Tewinan yeya'noma ya màlà molopai tùulon kupù ya tù'nùn pe. Ailon pe iwechi màlà tewinan pàk molopai tùulon iche pùla iwechi. Asakklàma Katù molopai pùlayatta tawon ponaloppe ewe'wotokoma pen màlà,” teppù Jesus uya.

₁₄Pharisee yamùk uya sàlà yamùk yetappù màlà, molopai tok wàkklàppù Jesus pàk italumattà pe, masapùla tùwakùli kon pe pùlayatta ku'nài nan pe tùwechi kon pàk. ₁₅Jesus uya tok pàk, “Amyamlo mùkyamlo ikasa tùwekkussan kappon yamùk yenu yau, tùse Katù mùkkàlà eyewan kon ittunài. Masapùla wakù pe kulu kappon nùttu màlà àli Katù yewanma.

₁₆“ Law molopai Katù Maimu yenpoikannan nùmenukappù lùssan wechippù màlà tapulàsan pe John Enapataukanài wessepolo ponalà. Màlà motapai nen uchi Wakù Itekale Katù wettok itepulu pe yekama man, molopai tamù'nawolon kon nettùyan Katù yemyak tùuseka'nonkaik. ₁₇Tùse sa'man pùla lùiwa màlà kak molopai non tawon waliwomù, malalon nà imenukasak lùppù Law yau pùla iwena yentai lùiwa.

₁₈“Kappon uya tùnmali'mappù tùnonkaik tùulon mali'masak yau iwekumasak pe iwechi màlà, molopai kappon uya inonkasak lùppù mali'masak yau iwekumasak pe iwechi màlà,” teppù.

₁₉“Molo iwechippù mamin yesak kàyik tùwepontàsen linen molopai epekkek pon yak, molopai wakù pe kulu tùwemassen wei kaichalà. ₂₀Molo nàlà iwechippù màlà italumayippù kàyik, Lazarus itesek, sukkwetùppe iwechippù màlà ipolo. Mamin yesak mùlatta pona ineppàtùppù màlà. ₂₁Enpen iwechippù kùyali punuppù mamin yesak yeipa yapon poi tùwessolokasen napù tùuya pàk. A'a yamùk lànen uchi uyàpùppù màlà ichukkwetù yamikkase.

₂₂“Italumayippù kàyik welikùppù màlà molopai inchelù yamùk uya yalàppù Abraham piyak, uta'lettàntok Epùn pon yak. Mamin yesak welikùppù nàlà màlà molopai iwu'nattàppù. ₂₃Apok yau tùwettalumattài'ma tenu tùlùppù ya kakàik molopai Abraham yeneppù ya mei Lazarus nen uchi ipyau. ₂₄Màlàpàk iwentaimeppù, ‘Ukàipùnù Abraham! Esentupakkà tàwà upàk, molopai Lazarus yeunokkà temyatù putu kiche tuna kak molopai uyani pùnàppanka toppe ya, masapùla e'nek pe kulu uyassaik sàlà apok yau!’ tukaik.

₂₅“Tùse Abraham uya, ‘Umu, masa ittukà, ewemapù yau wakù ton yepoloppù auya, Lazarus uya àli ton yepolo tùse. Tùse nen uchi sàlà pe iichipittàsak man talà, e'nek pe ewechi tùse. ₂₆Màlà neken pe pùla eke i'nawon molo man kùyakkletau, mùkyamlo sàlà motapai àwukklàppaino kon apyak uya ikupù pen, wapùla ànù'là ukklàtù ina piyak, yau messai'nùk yapai pen nàlà,’ teppù.

₂₇“Mamin yesak lùppù uya, ‘Ukàipùnù, apawanattàyan Iulà, Lazarus yeunokkà ukàipùnù yùwùk tak. ₂₈Mùyak etoikenan kon utonpa yamùk molo man. Tàwà nùtài tok yelupase tok uyàpù sàlà wettalumattàn patassek yak tukaik,’ teppù.

₂₉“Abraham uya, ‘Àlunan Moses kaletayi yesappe man molopai Katù Maimu yenpoikannan tu'ma molo man tok panamannan pe. Tàwàichi mùkyamlo uya telupa kon yetai tok,’ teppù.

₃₀“Mamin yesak lùppù uya yeikuppù, ‘Kane! Papai Abraham! Iwelichak lùppù làkku nen we'wuluukasak utàsak tok piyak yau, tok welattà tùmakuyi kon winàpai,’ tukaik.

₃₁“ Tùse Abraham uya, ‘Moses molopai Katù Maimu yenpoikannan yeta tùuya'nokon pùla iwechi yau, ànù'là we'wuluukasak lànen tùwelikù tùpo tùse, tùmakuyi kon winàpai tok welattà pen màlà,’ teppù ipàk,” teppù Jesus uya tok pàk.