Luke 19

₁Jesus utàppù màlà Jericho polo yentaka pe. ₂Molo iwechippù màlà pùlayatta pili'nài nan yepoino itesek Zacchaeus, molopai mamin yesappe iwechippù. ₃Ànùk kasa là Jesus wechi enenpai iwechippù màlà, tùse tokkwen nùkkwà iwechippù màlàyau yeneppù ya pen, masapùla tukke kulu kappon yamùk wechi pàk. ₄Màlàpàk aitun pe iitàppù màlà tukkan kon kappon yamùk wapiya molopai yei Sycamore yek pona iwekainùmùppù, màlà yawàlà Jesus utà yentoppe tùuya. ₅Màlà motak tùuyàssak yau Jesus uya kakàik tenu tùlùppù molopai yeneppù ya, molopai ipàk wateppù ya, “Asse'ne àwuttàkà, Zacchaeus, masapùla sàlà pe àyùwùk tau wechi màlà,” teppù ya. ₆Zacchaeus uttàppù màlà asse'ne molopai yanùmùppù ya tùutauchinpaik kulu tùwùk tak. ₇Yennài nan nùssan kappon yamùk wessa'molùkappù tùusàulàma kon pàk, “Pùsàlà kàyik utàsa'man àli ku'nài yùwùk tak ikaklamu pe,” tukaik. ₈Zacchaeus wà'mùssakkappù molopai Itepulu pàk, “Yetakà, Itepulu! Itesak pe wettok pantaka uya màlà upyau iwechi kaichalà entuppa'nokon yemyak, molopai ànù'là yama'masak uya yau, ye'ma uya màlà asakùlà'ne itekkwa,” teppù ya. ₉Jesus uya ipàk, “Wepùikattàntok uyàssak man sàlà tapùi tak sàlà pe, masapùla pùsàlà kàyik nàlà mùkkàlà Abraham pa. ₁₀Masapùla Kàyik Mumu uyàpùppù màlà iitassak kon iwase molopai tok pùikattàse,” teppù.

₁₁Màlàyau Jesus uya sàlà panton yekamappù wa te tùuya yetan nan nùssan pàk. Jerusalem po lùiwa nen uchi iwechippù màlà, molopai Katù wettok itepulu pe usenpoika winàkàik iwechi pe tok uya yekamappù. ₁₂Màlàpàk, “Tùnamasen kàyik wechippù màlà molo iitàsak lùppù meyon pata yak, kin pe tùma toppe, molopai iwennaposak lùppù. ₁₃Pata nàmà tùuya wapiya 10 pan kon tapyoto yamùk kà'mappù ya, molopai tok lepappù ya tewin pàk kolù pun ke, tok pàk, ‘Masa yà'là kaichalà là yepolo auya'nokon sàlà ke upatappù yau mùttutàik,’ teppù ya. ₁₄Ipatassek yawon kon uya yeya'nomappù màlà, màlàpàk tok uya tùmaimu kon yekaman nan yeunokoppù ite'mappù pàk, ‘Pùsàlà kàyik wechi ina kin pe iche pùla ina man,’ tukaik.

₁₅“Tùnamasen kàyik mappù màlà kin pe, molopai iwennapoppù. Asse'ne tapyoto yamùk pùlayatta tùlùppù tùuya itemyak lùssan uyàtoppe tùpyak tok kà'mappù ya màlà, yà'là kaichalà là yeposak tok uya yentoppe tùuya. ₁₆Wapiyalok uyàpùppù molopai ipàk, ‘Itepulu 10 pe kolù pun yeposak uya man tewinan ulepappù auya ke,’ teppù ya. ₁₇‘Wakù pe kulu man, wakù àmàlà apyoto! Ailon peichi ewessak malalon yau pàk, 10 pan pata yamùk yesappe ewechipa àkupù uya màlà,’ teppù itepulu uya. ₁₈Yakon itappyoto uyàpùppù màlà molopai, ‘Uyepulu, 5 pe kolù pun yeposak uya man tewinan ulepappù auya ke,’ teppù ya. ₁₉Pùsàlà pàk, ‘5 pan pata yamùk yesappe ewechi pa àkupù uya màlà,’ teppù ya. ₂₀Tùulon itappyoto uyàpùppù, ‘Itepulu, sàlàichi yenkà kolù pun àpùlayattayi, tonanse tùkuttai enkicha yau. ₂₁Usenalipappù àpàk, masapùla sa'man pe ewechi pàk. Àponalok pen yanùnnài àmàlà, molopai ànpàmàppù pen mokkanài àmàlà,’ teppù ya. ₂₂Itepulu uya ipàk wateppù. Àmàlà àli apyoto! Amaimu là yapulà uya màlà, atalumattà toppe uya. Mùttuyaik sa'man pe wechi, uponalok pen yanùnnài pe, molopai unpàmàppù pen mokkanài pe wechi. ₂₃Yà'là pe ken uchi iwechi pàk upùlayattayi tùnonkaik pùla mettai pùlayatta pilitok tak? Eke pe lùiwa yepoloppù uya sàlà eppaino tùulon kon pokonpe iwepilichak, wennaposak yau,’ teppù ya ipàk. ₂₄Màlàyau pata yesak uya satippe molo tùwessan pàk, ‘Kolù pun imokkatàk kon iwinàpai molopai itùtàk kon apyoto 10 pe kolù pun yeponàippù yemyak,’ teppù. ₂₅Màlàyau tok uya ipàk, ‘Itepulu, 10 pe nen yepokassak ya man!’ teppù. ₂₆‘Tekamayaik àpàkù'nokon tamù'nawolon kon yà'làlà yesak ton yemyak eke peiwa itùlù màlà. Tùse mùkkàlà yà'làlà yesak pen winàpai malalon lànen itesak pe iwettok mokka màlà. ₂₇Pùsamlo uyeyaton non tùmàlà'nokon kin pe uyiche pùla iwessak kon nùssan inettàk kon sà motak. Molopai tok iwàtàk kon uyemloto po!’ teppù ya,” tukaik.

₂₈Molopai nen uchi tùuselupa tùpo Jesus utàppù Jerusalem pona tok wapiya. ₂₉Mei pùla là pata yamùk Bethphage molopai Bethany tawonnan piyau tùwechi Wùk Olive itesek po yau, Jesus uya asa'là ta'lon kon yeunokoppù tùwapiya. ₃₀Sàlà enupantok pokonpe, “Pata eyemloto kon po nai'nùk yak itàtàk kon. ewelepamù kon pata yak yau tonki mule yewattàsak yepolo auya'nokon màlà ipo we'nàppà pen. Meukatàik molopai mùnettàik sàlà motak. ₃₁Ànù'là uya eyekamappo kon, ‘Yà'là pe iwechi pàk yeuka auya'nokon màlà?’ tukaik yau, ‘Itepulu iche kulu man,’ mùkatàik,” teppù ya. ₃₂Tok utàppù màlà te'ma kon tawà molopai tamù'nawolon yepoloppù tok uya Jesus uya yekamappù kasa. ₃₃Tonki mule yeuka tok uya tùse itesak uya, “Yà'là pe iwechi pàk yeuka auya'nokon màlà?” teppù. ₃₄“Itepulu iche kulu man,” tukaik tok uya yeikuppù. ₃₅Molopai tonki mule yalàppù tok uya Jesus piyak. Màlàyau tùpon kon tùlùppù tok uya ipona molopai Jesus pùikattàppù tok uya iwenuttoppe. ₃₆Tonki po iità tùse tok uya tùpon kon yalenkappù asantawà. ₃₇Jerusalem piyau mei pùla, pata Olive Tùpù yai asanta uttàtok motau iwechi tùse, tukkan kon ya'lon kon wessamolùkappù Katù pàk tenki te pàk. Tok uya yapulàppù eke pe tùwentaimese, tamù'nawolon eke ton tùnenessan' nokon pàk. ₃₈“Ipùlemasak mùkkàlà kin Itepulu yesek yau tùuyàssen! Wàlàkka'nàtok Epùn pon molopai Katù yapulàtok!” tukaik.

₃₉Màlàyau Pharisee tonpa yamùk uya wateppù tukkan kon kappon yamùk kùlottapai ipàk, “Enupanài, eppana aya'lon kon wettoppe yekamakà!” teppù ya. ₄₀Jesus uya yeikuppù, “Eppana tok wechi yau, tàk yamùk wentaime màlà, ukayaik àpàkù'nokon,” tukaik.

₄₁Pata winàkàik lùiwa iyàpùppù màlà molopai pata yensak tùuya yau, ikalawùppù iwenai, ₄₂“Ittu neken auya'nokon yau, sàlà pe yà'làlà iche we'nàtok wakù pe wema'nà toppe! Tùse sàlà pe ewinàpai'nokon yonansak man yene auya'nokon tukaik. ₄₃Masapùla pata weyu uyàpù màlà àpona' nokon eyeyaton non uya àwoinottà màlà non takase molopai tok uya awakkàtù màlà sàwinà'ne. ₄₄Tamù'nawàlà tok uya amattanùpù màlà, ayawon kon mule yamùk ewekupili tawon kon pokonpe. Tewin nà tàk nàmà tok uya ipatassek yau pen màlà, masapùla ittuppù auya pen màlà, yà'là yattai là Katù uyàpùppù àpùikattàse,” tukaik.

₄₅Jesus utàppù màlà Katù yùwùk tak, molopai yà'làlà chilanman nan yenpakkappù ya. ₄₆“Kàtù Maimu yau iwe'menukasak man Katù uya, ‘Uyùwùk yesatù màlà Wàpùleman Yùwùk tukaik, tei'ma tok pàk. Tùse amak ton uso'nantok itak pe imasak auya'nokon man!” teppù ya tok pàk.

₄₇Jesus uya kappon yamùk yenupappù màlà Katù yùwùk tau wei kaichalà. Tùse paatele yamùk yepulu ton, Law pàk enupannan, molopai kappon yamùk yennài nan wechippù màlà ànwàpai. ₄₈Tùse yà'là kasa là ikuttok tùuya'nokon yepolo tok uya pùla iwechippù, masapùla tamù'nawolon kon kappon yamùk wechippù màlà iichelupa yeta pàk.