Luke 24

₁Ko'làma kulu, Suntayaka yattai, nossan yamùk utàppù uluwaik pona apoi'nan tùnkonekappù kon yalàppù tok uya. ₂Tùutàsak kon yau tàk yamasak uluwaik mùlatta poi yepoloppù tok uya màlà. ₃Tok wewomùppù màlà yak, tùse tok uya Itepulu Jesus yàkàppù yepoloppù pen màlà. ₄Tok wechippù màlà satippe tùusenumenka kon pàk ipàk, màlà yattai asa'lon kon kàyik yamùk usenpoikappù tok piyak, akkwa pe tok pon wechippù. ₅Tùusenalippaik kulu nossan yamùk wepeimappù non pona, màlàyau kàyik yamùk uya tok pàk, “Yà'là peichi iwechi pàk iwelichak kon kùlottau pàli'yawon nà iwa auya'nokon màlà?” teppù. ₆‘Ipla man talà, iwe'wuluukappù man. Ittutàk kon wa teppù ya lùppù àpàkù'nokon Galilee po tùwechi yau. ₇‘Kàyik Mumu tùlù màlà àli ton kappon yamùk yemyak, ipukapàttoppe pulusuk pona molopai iwuluuka toppe icholùwano wei yattai,’ teppù asa'lon kon kàyik yamùk uya. ₈Màlàyau nen uchi nossan yamùk uya Jesus maimuppù ittuppù màlà. ₉Tok wennapoppù uluwaik poi, tok uya màlà yekamappù 11 pan kon ya'lon kon nùssan pàk molopai tamù'nawolon kon tok tonpa yamùk pàk. ₁₀Pùsamlo nossan yamùk wechippù màlà Mary Magdalene, Joanna, molopai Mary, James yan, tawonnan. Mùkyamlo molopai tùulon kon nàlà nossan yamùk uya sàlà yamùk yekamappù màlà yeunossak kon nùssan pàk. ₁₁Tùse yeunossak kon nùssan uya nossan yamùk usennaka pe yekamappù màlà, molopai ailon teppù tok uya pen tok pàk. ₁₂Tùse Peter we'wuluukappù molopai aitunpe iitàppù uluwaik pona, iwepeimappù màlà uluwaik yak yense màlàyau yassan nùssan neken linen yeneppù ya màlà molopai yà'là là pùla. Màlàyau iwemeikuppù tùusenumenka pe ipàk.

₁₃Màlà wei yattai là asa'lon kon kappon yamùk utàppù màlà pata lùkkwà Emmaus itesek yak, mei lùkkwà là Jerusalem poi. ₁₄Tok uselupappù màlà tamù'nawolon iwekkussak lùssan pàk. ₁₅Tok uselupa màlà yamùk pàk tùse, Jesus uya tok yepoloppù molopai iitàppù tok ya'là. ₁₆Tok uya yeneppù, tùse ànùk pe là tok uya ittuppù pen. ₁₇Jesus uya tok pàk, “Yà'là pàk euselupa kon màlà tùuseippàsse là, àutài'ma'nokon?” teppù. Molopai tok weleutappù peten satippe ichewankono'masak pe'ne itenpata. ₁₈Tewinan nà tok tonpa Cleopas itesek uya yekamappoppù, “Àmàlà neken na' mùkkàlà kàyik Jerusalem po tùwemassen ko'manyakù'ne iwekkussak lùppù ittunài pen?” tukaik. ₁₉“Yà'là yamùk uchi?” tukaik, tok yekamappoppù ya. “Màlà yamùk uchi Jesus Nazareth pon pàk iwekkussak lùppù,” tukaik tok uya yeikuppù. “Pùsàlà kàyik wechippù màlà Katù Maimu yenpoikanài pe. Katù nùttu, molopai kappon yamùk nùttu, meluntà pe imaimu yau molopai iwotokoyi yau. ₂₀Eke ton paatele yamùk molopai ennài nan uya itùlùppù màlà iwàtoppe molopai tok uya ipukapàtùppù pulusuk pona. ₂₁Molopai mùkkàlà uya Israel pùikattà pe yekamasakù'nokon tùse! Sàlà màlà icholùwano wei nai'nùk iwekkupùppù motapai. _22-23Nossan yamùk ina kùlottawon kon ina usenumenkatok ke ina lepai, tok nùtài ko'làma pata utakkwaka pe uluwaik pona, tùse tok uya Jesus yàkàppù yepoloppù pùla nechii. Tùwennapposak kon yau we'nepà'nà kasa Inchelù yamùk yenei ina nùkai tok, mùkyamlo uya Pàli'yau iwechi yekamappù nechii tok pàk. ₂₄“Màlàpàk ina tonpa yamùk nùtài uluwaik pona, màlà yau tok uya yepoloppù nechii nossan yamùk uya yekamappù kasa, tùse tok uya mùkkàlà yeneppù pen,” teppù tok uya.

₂₅Màlàyau Jesus uya tok pàk, “Pakko pe messatàik, asse'ne ailon tawonn pe pùla messatìk Katù Maimu yenpoikannan nekamappù pàk! ₂₆Yà'là woton pe pùla ken na' uchi màlà, mùkkàlà Christ wettalumattàtok wechippù, molopai nàlà iitàtok tapulàtok yak?” teppù. ₂₇Molopai Jesus uya tok pàk tamù'nawàlà Katù Maimu uselupasak tùpàk lùppù yekamappù màlà tok pàk, iweppyattàppù màlà Moses kaletayi yamùk motapai molopai tamù'nawàlà Katù Maimu yenpoikannan nùmenukappù pùkkù yak. ₂₈Tok uyàpùppù màlà mei pùla lùiwa nen uchi pata tùutàtok kon yak winàkàik molopai miya lùiwa tùutà pe tukaik Jesus utàppù. ₂₉Tùse tok wechippù iità iche pùla, màlàyau tok uya, “Talà ina piyau we'nàpai, pata uko'mansak man molopai ewalupà pe nenayan,” teppù. Màlàyau iwewomùppù, tok piyau esse. ₃₀Iweleutappù màlà kùyali yapon piyau tok pokonpe, pùlomù pusak yanùmùppù ya, ipùlemappùya. Màlà tùpo ipilipàtùppùya, tok yemyak nen uchi itùpàtùppù ya. ₃₁Tok yenu utakkokappù nen uchi màlà molopai tok uya ittuppù ipe, tùse iwaliwomùppù màlà tok piyapai. ₃₂Tok uya tùyiwalà'nokon, “Wakù peichi kùyewan kon yauchinpaya pùn, asantau kùyelupakon ya Katù Maimu pàk yau?” teppù.

₃₃Tok we'wuluukappù màlà asse'ne molopai tok wennapoppù Jerusalem pona, molo 11 pan kon Jesus ya'lon kon nùssan wepilichak tamùkke tùulon kon pokonpe yepoloppù tok uya, ₃₄molopai tok uya, “Itepulu we'wuluukasak lù'man! Simon uya yeneppù man!” teppù. ₃₅Asa'lon kon kappon yamùk uya nen uchi iwekkussak lùppù asantau molopai Itepulu Jesus ittuppù tùuya'nokon pùlomù pusak pilipàtù ya yau yekamappù tok pàk.

₃₆Sàlà yekama pàk tok wechi tok pàk tùse, asse'ne kulu Itepulu Jesus usenpoikappù tok kùlottak satippe molopai tok pàk, “Echitonpa pe we'nàtok wechi àkklottau'nokon màlà,” teppù ya. ₃₇Tok usenalippasak wechippù kulu màlà, wolo'yan yene tùuya'nokon pe tok uya yekamappù. ₃₈Tùse tok pàk “Yà'là peichi iwechi pàk autaimelunpa kon màlà, molopai eusenumenkatok kon yau ailon tetok ma'le ewechi kon? ₃₉Masa uyemyatù yamùk, molopai utta yamùk yentàkkon molopai Iulà pe iwechi ittukon pa. Kùyappàttàk kon molopai yene auya'nokon màlà, wolo'yan mùkkàlà ipun pùn molopai yàppù pùn, itesak pe wechi menyatàik,” teppù ya. ₄₀Temyatù molopai tùtta tawon yenpoikappù ya màlà tùuselupai'ma. ₄₁Ailon te tok uya pùla lùppù là tùse tok utauchinpasak kulu wechippù màlà molopai tok usenumenkasak. Màlàpàk tok yekamappoppù ya, “Yà'làlà na' talà tùnassen molo nai apyau'nokon?” tukaik. ₄₂Tok uya molok pusak pilikasak ke ilepappù. ₄₃Yekkwatùppù ya màlà molopai yanùppù ya tok yemloto po.

₄₄Màlàyau tok pàk, “Sàlà yamùk uchi màlà àpàkù'nokon unekamappù apyau'nokon nùppù wechi yattai, tamù'nawolon imenukasak lùppù upàk Law Moses winàpaino yawon, molopai Katù Maimu yenpoikannan nùmenukappù yawon, molopai Psalms kaletayi yawon tawonnan wekkupùppù màlà ailon pe,” teppù Jesus uya. ₄₅Màlàyau tok usenumenkatok yakkokappù ya Katù Maimu ittutoppe tok uya. ₄₆Molopai tok pàk, “Sàlàichi màlà imenukasak lùppù mùkkàlà Christ wettalumattà màlà molopai iwe'wuluuka tùwelikù tùpo icholùwano wei yattai, tawon. ₄₇Molopai itesek yau àli kuttok winàpai welattàntok Katù winàkàik, molopai àli kuttok pàk usentuppantok yekale yekama màlà tamù'nawàlà pata yamùk yawàlà, Jerusalem poi tùpyattàse. ₄₈Amyamloichi mùkyamlo sàlà yamùk yekaman nan. ₄₉Molopai Ukàipùnù uya itùlù uya màlà teppù lùppù yeunoko uya màlà àpona'nokon Iulà pe. Mùmàmuttàik uchi Jerusalem po meluntà uttà àpona'nokon ponalà,” teppù ya.

₅₀Màlàyau tok yalàppù ya pata yapai, Bethany pona, molo temyatù yanùmùppù ya molopai tok pùlemappù ya. ₅₁Tok pùlema ya tùse tok nàmàppù ya, yanùmùppù màlà Epùn pona. ₅₂Tok uya yapulàppù molopai tok wennapoppù Jerusalem pona, eke pe tùutauchinpaik. ₅₃Molopai tàwàlàlà tok weppàtùppù màlà Katù yùwùk tau tenki te pàk ipàk.