Luke 6

₁Jesus utàppù màlà àlichi walai yek kùlottawà Jew wàlàkkattok weyu yattai. Ya'lon kon wepyattàppù àlichi walai pàika pàk, ichokossoko'mappù tok uya temyau'nokon, molopai tok uya inapùppù. ₂Pharisee tonpa yamùk uya, “Yà'là peichi iwechi pàk ina Law winàpaino uya kùkkuttàu Jew wàlàkkattok yattai tetok kupù auya'nokon màlà?” teppù. ₃Jesus uya tok yeikuppù, “Yennài nan pen ken na' amyamlo David uya yà'là là kupùppù tùmàlà molopai ta'lon kon kàyik yamùk wapàkkassak yau? ₄Iitàppù Katù yùwùk tak, eki napùppù ya itùsak lùppù Katù yemyak, molopai itùlùppù ya nàlà ta'lon kon kàyik yamùk yemyak. Tùse kùyenupatok kon maimu yawàlà pùla mà ànù'là uya inapù wechi màlà tà, tùse paatele yamùk neken nùnapù pe iwechi màlà,” tukaik. ₅Molopai Jesus uya itonpatàppù, “Kàyik Mumu mùkkàlà Jew yamùk wàlàkkattok yattai Yepulu,” tukaik.

₆Tùulon Jew yamùk wàlàkkattok weyu yattai Jesus utàppù Jew yamùk wepilittok itak tak molopai kappon yamùk yenupappù ya. Kàyik wechippù molo kamik pen itemyatù ichei'mesak. ₇Tùulon kon Law pàk enupannan tonpa yamùk molopai Pharisee yamùk wechippù màlà iwalai pen kussan tukaik tùuselupatok kon Jesus winàkàik ittuiche. Màlàpàk tok wechippù itenupàkà ànù'là ipittà ya Jew yamùk wàlàkkattok weyu yattai yeneiche. ₈Tùse Jesus uya tok usenumenkatok ittuppù màlà molopai kàyik ichei'mesak itemyatù pàk, “À'mùssakkakà molopai àikkà sàlà motak yakkletak,” teppù. Kàyik wà'mùssakappù molopai satippe iwechippù molo. ₉Màlàyau Jesus uya tok pàk, “Eyekamappoyatàu Iulà, Yà'là kupù ken Jew yamùk wàlàkkattok weyu yattai wechi màlà Law yawàlà? Wakù kupù wapùla àli kupù? Kappon yakkwalù pùikattà wapùla imattanùpù?” teppù. ₁₀Tok yeneppù ya tùwoi molopai kàyik pàk, “Eyemyatù yenkakà,” teppù ya. Màlà kasa ikupùppù ya molopai itemyatù uchipittàppù. ₁₁Tùse tok we'naikasak wechippù, tok uselupappù yà'là là kupù tùuya'nokon Jesus winàkàik pàk.

₁₂Màlà yattai Jesus utàppù wùk pona àpùlemase, iwàpùlemappù pata temakkwase. ₁₃Wei wepakkasak yau ta'lon kon kà'mappù ya tùpyak molopai 12 pe tok yanùmùppù ya.Tok yesettàppù ya “teunossan” tukaik. ₁₄Simon (Peter pe nàlà inesettàppù) molopai Andrew itonpa, James, John, Philip, Bartholomew, ₁₅Matthew, Thomas, James Alphaeus mumu, Simon Zelotes tukaik tesassen, ₁₆Judas James mumu, molopai Judas Iscariot, Katù Mumu yeimipponài pe iwenasak lùppù.

₁₇Jesus uttàppù ta'lon kon pokonpe wùk poi, molopai satippe iwechippù nomon po tukkan kon tùwenaimanài nan kùlottau. Ilinà pe kulu kappon yamùk wechippù màlà molo tamùnawàlà Judea pon kon molopai Jerusalem pon kon, molopai palau yena pon Tyre molopai Sidon pon kon. ₁₈Tok uyàpùppù màlà Jesus yetase molopai echipittàse tepalan kon yapai. Mùkyamlo àli akkwalù naimelunpa ton uyàpùppù nàlà màlà molopai tok uchipittàppù. ₁₉Tamù'nawolon kon kappon yamùk wechippù yapàtùiche màlà, masapùla meluntà wepakkappù màlà yapai molopai tok ipittàppù ya tamù'nawàlà.

₂₀Jesus uya ta'lon kon yeneppù màlà molopai, “Tùutauchinpasan amyamlo entuppak tùwessan. Katù wechi eyepulu kon pe màlà!

₂₁“Tùutauchinpasan amyamlo napàkkassai'nannùk sàlà pe, auta'lettà kon màlà tùwenukasse. Tùutauchinpasan amyamlo nùsewankono'mayainan'nùk sàlà pe, masapùla àwàkklà kon màlà.

₂₂“Tùutauchinpasan amyamlo kappon yamùk uya eyeya'noma kon yau, ànulunpa kon yau, àmottùnpa kon yau, molopai àli ton amyamlo te, Kàyik Mumu pàkànsau yau! ₂₃Tùuseka'nonkaik matauchinpatàik màlà wekkupù yau, masapùla eke e'mantok kupù man àponalok kon pe epùn po. Masapùla tok tamo yamùk uya màlà, màlà kupùppù Katù Maimu yenpoikannan winàkàik.

₂₄“Tùse àsà àpo'nokon man, amyamlo, italumayippù pe pùla temamin ke nai'nan nùk sàlà pe, masapùla wakù pe talà ewemassak kon pàk!

₂₅“Àsà àpo'nokon man, amyamlo, wakù pe yewetù nai'nannùk sàlà pe, masapùla awapàkkappù kon màlà! Àsà àpo'nokon man, amyamlo nàkklàyai'nan nùk sàlà pe. Masapùla eusewankono'ma kon màlà molopai akalawù kon.

₂₆“Àsà pe iwechi màlà àpàkù'nokon tamù'nawolon kon uselupa wakù pe yau, masapùla tok tamo yamùk uya màlà, màlà yamùk teppù ailon ton pen itekale yenpoikannan pàk,” teppù ya.

₂₇“Tùse tekamayaik àpàkù'nokon mùkyamlo uyetayai'nannùk. Eyeyaton kon i'nùnmatàk kon, wakù ikuttàk kon eyeya'nomanài' nokon winàkàik. ₂₈Wakù ikuttàk kon apa'nùssatài'nùk winàkàik molopai àli pe tùuselupasen ewinàkàik nokon pona àpùlematàk. ₂₉Ànù'là uya àwànà eyenpata yai yau, tàwà ilatoi yai nàlà àwànài. Ànù'là uya ayassan kon yalà yau, tàwà àpon kon yepoino nàlà yalài. ₃₀Ànù'là yà'làlà yennanài àpàkù'nokon mùlepatàik, molopai ànù'là uya emamin yasak yau kùsekamapotàu inappo toppe ya. ₃₁Kappon yamùk uya ewinàkài ikupù iche ewettok ikukkà tok winàkàik.

₃₂“À'nùnmanài nan neken pùnùnma auya'nokon yau, yà'là ken wakù yepolo auya'nokon? Àli ton là mà mùkyamlo tù'nùnmanài nan pùnùnmanài nan tà! ₃₃Molopai wakù ku'nài nan neken ewinàkàik winàkàik wakù kupù auya'nokon yau, yà'là ken wakù yepolo auya'nokon? Àli ton nà mùkyamlo màlà ku'nài nan! ₃₄Molopai itesak pe ewettok kon tùlù auya'nokon yapulà toppe, mùkyamlo tok uya innappo pe neken ànùttu kon yemyak yau, yà'là ken wakù yepolo auya'nokon? Àli ton nà mùkyamlo itesak pe tùwettok kon tùnài nan yapulà toppe wa làma innapposak yepotok pe tùuya' nokon. ₃₅Tùse làkku eyeyaton kon i'nùnmatàk kon, wakù ikuttàk kon tok winàkàik. Itesak pe ewettok kon itùtàk kon yapulà toppe molopai innappo pàk enpen kettàu. Eke pe iche ewettok kon yepolo auya'nokon màlà, molopai Eke Meluntà tùnamasen Katù ponalok kon pe ewechi kon màlà. Masapùla wakù mùkkàlà tenki tawonnan pen pàk molopai àli ton pàk. ₃₆Tùusentuppaik ettàk kon, Katù Àkàipùnù kon wechi tùusentuppaik kasa làma,” teppù Jesus uya.

₃₇“Ànù'là winàkàik àli pe kesenumenkatàu àli pe usenumenkan ewinàkàik tukaik. Ànù'là kùttalumattàtàu, Katù uya atalumattà kon tukaik ànù'là pàk mesentuppatàik molopai Katù usentuppa màlà àpàkù'nokon. ₃₈Ànù'là ilepatàk kon, molopai Katù uya elepa kon màlà, eke pe yepolo auya'nokon ewe'lepappù kon yentai, yachi auya yentai. Anapulà ànù'là ponaloppe yapulà Katù uya màlà àponalok pe, wa lùppù,” teppù Jesus uya.

₃₉Molopai Jesus uya sàlà panton yekamappù, “Enpùn kappon uya tùulon enpùn yalà yentai iwechi màlà, yalà ya yau, asakklàma tok wepuka màlà non yakasak yak. ₄₀Tenupasen mùkkàlà tenupanài yentaino pen. Tùse tamù'nawolon yenupasak kon wechi màlà tenupanàippù kasa.

₄₁“Yà'là pe ken iwechi pàk àtonpa kon yenu yawon elekkwà kulu apok ippunuppù yennài nan amyamlo, tùse eke yei tense pùla eyenu kon yau? ₄₂Atta ken uchi àtonpa kon pàk, ‘Utonpa, masa elekkwà kulu apok ippunuppù tùmokkaiche eyenu yapai,’ te auya'nokon, eke yei eyenu yawon tense pùla là? Tùwetapansan amyamlo! Eke yei imokkakà eyenu yapai wapiya, molopai nen uchi elekkwà apok ippunuppù àtonpa kon yenu yawon yene auya'nokon màlà molopai imokka auya'nokon,” teppù Jesus uya.

₄₃“Wakù nulà nan yei màlà àli pe itepelu tùwessen pen molopai italumayippù yei màlà wakù pe itepelu tùwessen pen. ₄₄Tamù'nawolon yei màlà tùttusen itepelu winà fig itesek kùyali, pàikanài nan pen amyamlo àmà'nà yek poi, wapùla chi'nak itek grape itesek pàikanài nan pen amyalo kalalaik yek poi. ₄₅Wakù kappon mùkkàlà wakù ne'nài wakù tewan yawon kon yapai, molopai àli kappon mùkkàlà àli ne'nài àli tewan yawon kon yapai. masapùla kappon mùta màlà tewan wanùssak ike nai'nùk pàk tùuselupasen,” teppù Jesus uya.

₄₆“Yà'là pe ken uchi iwechi pàk uyesatù auya'nokon màlà, ‘Uyepulu, Uyepulu,’ tukaik unekamappù àpàkù'nokon kupùi'ma pùla? ₄₇Ànù'là tùuyàssen upyak molopai umaimu yetanài, molopai iku'nài umaimu yawàlà wechi yà'là kasa là yekama uya màlà àpàkù'nokon. ₄₈Tapùi yamùnàippù kasa iwechi màlà i'nak yakanàippù molopai yapon tùnàippù tàk pona. Tuna'ma uyàpùppù molopai tapùi wànàppù ya tùse ilaikappù ya pen, masapùla wakù pe kulu yamùsak pàk. ₄₉Tùse mùkkàlà umaimu yetanài molopai iku'nài pen wechi màlà tapùi yamùnàippù yapon woton tùnonkaik pùla kasa. Tuna'ma uya tapùi wàssàk pon wàsak yau asse'ne kulu iwàpàppù. Àsà pe kulu iwekkawai'mappù màlà!” teppù Jesus uya.