Luke 7

₁Tamù'nawolon sàlà yamùk yekama tùuya kappon yamùk pàk yenuka'nùssak tùuya yau, Jesus utàppù Capernaum pona. ₂Molon nà Soicha yamùk yesak wechippù tapyoto ke, tùwakùli pe kulu inkupù wechippù e'nek pe, iwelikù piyau. ₃Jesus yekale yetasak tùuya yau, Soicha yamùk yesak uya tùnamasan Jew yamùk tonpa yamùk yeunokoppù Jesus yekamappose iyàttoppe tapyoto ipittàse. ₄Tok uyàpùppù Jesus piyak molopai tok uya ipawanattàppù tùuseka'nonkaik, “Pùsàlà kàyik ànpùikattà yek pe kulu man. ₅Ina tonpa yamùk ku'nài mùkkàlà tù'nùn pe, molopai ina wepilittok itak woton yamùppù ya ina ponaloppe, tùmàlà pe,” tukaik. ₆Màlàyau Jesus utàppù tok ya'là. Mei pùla là tapùi pàk iwechippù màlà. Màlà yattai soicha yamùk yesak uya tùwechi yakon non yeunokoppù yelupase. “Uyepulu, kataimelunpai kulu là. Uyùwùk tak àuyàpù iche kulu pùla là wessaik. ₇Wakù pe uchittu pùla tàwà man, apyak uyàttoppe. Eselupakà neken nà molopai uyapyoto wenna màlà,” ₈“Iulà nàlà mùkkàlà eke ton itepulu yamùk yo'no iwettoppe itùsak lùppù, molopai soicha yamùk molo man uyo'non kon. Pùsà yapyontànài iulà, ‘Itàkà,’ tukaik, molopai tùutàsen. Mùkklà pàk, ‘Àikkà!’ tawon, molopai tùuyàssen. Uyapyoto pàk, ‘Sàlà ikukkà!’ tawon Iulà, molopai iku'nài mùkkàlà,” tesak tùuya yekamase. ₉Jesus usenumenkasak kulu wechippù màlà sàlà yetasak tùuya yau. Iwelattàppù molopai ilinà kappon yamùk tùwenaiman nan pàk, tekamayaik àpàkù'nokon “Sàlà yekkwa eke là ailon tetok yensak uya pùla kulu man, Israel pon kon winà là,” teppù ya. ₁₀Mayin yekaman nan nùssan wennapoppù itepulu yùwùk tak molopai itapyoto yepoloppù tok uya pàli'yau.

₁₁Iwemassak pe Jesus utàppù pata Nain itesek pona, ya'lon kon molopai tukkan kon kappon yamùk utàppù ya'là. ₁₂Iwelepamù pata mùlatta winàkàik yau, kappon welichak yanài nan wepakkappù màlà. Mùkkàlà kàyik, wechippù màlà tewinan tùtayappù patappù yawon nossan mule. Tukkan kon kappon yamùk wechippù màlà nossan ya'là. ₁₃Yensak tùuya yau Jesus usentupappù màlà tewan yapai ipàk. Molopai ipàk “Kakalawùi!” teppù ya. ₁₄Màlàyau iitàppù molopai ekek yen yappàtùppù ya, molopai yanài nan kàyik yamùk weleutappù. Jesus uya, “Emoine! À'mùssakkakà, ukayaik àpàk!” teppù. ₁₅Kàyik wà'mùssakkappù molopai iichelupappù, molopai Jesus uya innapoppù ichan piyak. ₁₆Tamù'nawolon kon usenalippasak wechippù màlà, molopai Katù yapulàppù tok uya. “Eke Katù Maimu yenpoikanài usenpoikasak man kùkklottakù'nokon!” molopai, “Katù uyàssak man tùponalok kon kappon yamùk pùikattàse!” tukaik. ₁₇Sàlà Jesus yekale usetappù màlà tamù'nawàlà Judea yawàlà molopai iwoino kon pata yawàlà.

₁₈John ya'lon kon uya ipàk sàlà yamùk yekamappù màlà. John uya asa'là tok tonpa yamùk kà'mappù tùpyak. ₁₉Molopai tok yeunokoppù ya Itepulu Jesus piyak yekamappose, “Àmàlà ken na' mùkkàlà iyàpù woton teppù lùppù John uya, wapùla ka' ina uya tùulon màmuku màlà lù?” tukaik. ₂₀Jesus piyak tùuyàssak kon yau, “Enpataukanài John uya ina yeunossak sàlà eyekamappose, ‘John uya ken na' iyàpù woton teppù lùppù àmàlà, wapùla ka' ina uya tùulon màmuku màlà lù?’ tukaik,” teppù tok uya. ₂₁Màlà yattai làma tukkan kon kappon yamùk ipittàppù Jesus uya màlà tok yepalan yamùk winàpai, molopai àli ton akkwalù winàpai, molopai enpùnon uya yentok ke tok lepappù ya molopai tok uya pata yeneppù. ₂₂John maimu yekaman nan yeikuppù Jesus uya, “Ennappotàk kon molopai John pàk eneneppù kon molopai enetappù kon yekamatantàk. Enpùn nenyan, tùusasen pen nùsayan, welei pokon kon uchipittàsak man, panattàppan netayan, iwelichak kon wuluukasak ya man, molopai Wakù Itekale yekama man entuppa'nokon pàk. ₂₃Tùutauchinpasen mùkkàlà kasei tetok ya upàk, pùla tùwessen.” tukaik yeikuppù ya.

₂₄John maimu yekaman nan utà tùpo, Jesus weppyattàppù John pàk tùuselupa pàk, ilinà kappon yamùk pokonpe, “John piyak wontaik yak àutàsak kon yau, yà'là yene ken auya'nokon pàk enpen mettantàu? Wanak peimasak assetun uya? ₂₅Yà'là yense ken mùtàtantàu? Kappon wepontàsak wakù pon, yak yense? Wakù pe tùwepontàsan màlà kasa molopai wakù pe tùwemassan mùkyamlo eke kin patassek yau tùwemassan. ₂₆Yekamatàk kon upàk, yà'là yene ken auya pàk enpen mettantàu? Katù Maimu yenpoikanài? Ewaik, àpàkù'nokon tekamayaik, Katù Maimu yenpoikanài yentaino nen mentantàu. ₂₇Masapùla John uchi mùkkàlà Katù Maimu uselupappù lùppù ipàk, ‘Pùsàlàichi mùkkàlà umaimu yekamanài, yeunoko uya màlà awapiya eye'ma konekase àponalok pe,’ teppù Katù uya lùppù. ₂₈Tekamayaik àpàkù'nokon, John mùkkàlà ànù'là nossan wentuppù ike lùppù kappon yentaino. Tùse elekkwà pe Katù wettok itepulu pe yau tùwessen wechi màlà, mùkkàlà, yentai,” tukaik Jesus uya tùmaimu pùkkùttàppù.

₂₉Tamù'nawolon kon kappon yamùk molopai pùlayatta pili'nài nan uya yetappù màlà. Mùkyamlo uya Katù yeselu wechi ikasa ittuppù John nenpataukassan pe tùwechi kon pàk. ₃₀Tùse Pharisee yamùk molopai Law pàk enupan nan uya Katù nùkupù tùponalok kon pe nulunpappù masapùla John nenpataukappù pe pùla tùwechi kon pàk.

₃₁“Yà'là kasa ken sàlà pe nai'nan nùk kappon yamùk wechi te uya pe mùttuyatàu? Yà'là kasa ken tok nai? ₃₂Mule yamùk wechi chichiu pe makitti tau molopai tok wentaimepàtù tùtonpa kon pàk kasa tok man. ‘Manùnnà yelemu tàulùnpai ina àponalok kon pe tùse amananù kon pùn! Ina nùselenpai usewankono'man yelemu pàk tùse akalawù kon pùn!’ tukaik. ₃₃Masapùla Enpataukanài John uyàpùppù, molopai ita'lettàppù pen, so'li là iwuku pe iwechippù pen. Molopai ‘Àli akkwalù yen mùkkàlà!’ teppù auya'nokon. ₃₄Kàyik Mumu uyàpùppù, molopai itta'lettàppù molopai tùwuku inchippù ya, màlàpàk ‘Eke pe tùuta'lettàsen mùkkàlà molopai ipla tùwetùnsen, pùlayatta pili'nài nan wechi yakon molopai àli ku'nài nan wechi yakon,’ teppù auya'nokon. ₃₅Katù yapàikketù màlà ailon pe tuùsensen tamù'nawolon kon yanùnnài nan winà,” teppù Jesus uya.

₃₆Pharisee uya Jesus kà'mappù màlà iita'lettà toppe tùpokon pe. Jesus utàppù itùwùk tak molopai iweleutappù uta'lettàn yapon piyak. ₃₇Molo nossan wechippù, màlà pata yau àli pe tùwemassen, Jesus uta'lettà Pharisee yùwùk tau yekale yetappù ya màlà. Màlàpàk apoi'nan ten yawon kalapa nepùppù ya. ₃₈Molopai satippe iwechippù Jesus mùpoi winà, itta piyau, tùkalawù pàk. Molopai itta yaiku'mappù ya tenu palu ke. Ya'munakkappù ya tùnsek ke molopai itta yamùk kismappù ya. Molopai apoi'nan kalapa mappù ya ipona. ₃₉Yensak tùuya yau Pharisee, Jesus kà'manàippù uya tùyiwalà, “Pùsàlà wechi Katù Maimu yenpoikanài pe yau, ànùk pe pùsàlà tappàppà'nài nossan wechi ittuppù ya sàlà eppaino, yà'là yekkwa là iwemattok pe iwechi!” teppù. ₄₀Jesus uselupappù, “Simon, unekama molo man àpàk,” tukaik. “Ewaik Enupanài, yekamakà,” teppù ya. ₄₁“Asa'lon kon kàyik yamùk wechippù molo, pùlayatta tùnài winàpai yekkwa'nài nan nùssan. Tewinan uya 500 pe pùlayatta yale mokkasak wechippù molopai tùulon uya 50 pe pùlayatta yale mokkappù. ₄₂Asakklàma tok uya ye'ma tok pùla iwechippù màlà. Wa iwechi pàk tok uya tùwoyi kon ye'ma tukaik ikupùppù ya. I'nai uya ken eke peiwa tù'nùn pe ikupù?” teppù Jesus uya. ₄₃“Eke pe iwoyi tùse usentupa'nàppà ipàk lùppù uya i'nùnma màlà,” tukaik Simon uya yeikuppù. “Ikasa yeittok auya man,” teppù Jesus uya. ₄₄Màlàyau iwelattàppù nossan winàkàik, molopai Simon pàk, “Pùsàlà na' nossan menyan?” teppù ya. “Apatassek yak uyàpùi molopai tuna ke ulepa auya pùn utta kuka toppe uya, tùse pùsàlà utta kukai tenu palu ke molopai na'munakkai tùnsek ke. ₄₅Uyanùmù auya'nokon yau ukisma auya'nokon pùn, tùse pùsàlà uya utta kisma tùuya yeleutanùpù pùla man uyàpùppù motapai. ₄₆Kalapa nepù auya upai ponaloppe pùn, tùse utta kalapaimasak ya man eke pe kulu apoi'nan kalapa ke. ₄₇Tekamayaik àpàk eke uchi'nùnmantok nenpoikapàssaik nùk nekamayan tukkan àli kuttok ya pàk usentuppansak. Ànù'là malalà usentuppa'nàppà ipàk lùppù mùkkàlà malalà uchinùnmantok yenpoikanài,” teppù Jesus uya. ₄₈Màlàyau Jesus uya nossan pàk, “Àli kuttok auya pàk usentuppansak man,” teppù. ₄₉Tùulon kon chichiu pe tùwessan kùyali yapon woi uya, “Ànùk ken pùsàlà àli kuttok pàk là tùusentupasen?” teppù. ₅₀Tùse Jesus uya nossan pàk, “Ailon tetok auya uya àpùikattàsak man, eyewan wàlàkattok yau itàkà,” teppù.