Luke 9

₁Jesus uya 12 pan kon ta'lon kon kà'mappù tamùkke. Molopai tok lepappù ya meluntà molopai apàikkek ke, tamù'nawàlà àli akkwalù yamùk yenpakka toppe tok uya, molopai palan ipittà toppe tok uya. ₂Màlàyau tok yeunokoppù ya Itepulu pe Katù wettok yekamase molopai e'nek ton ipittàse. ₃Tok pàk, “Yà'làlà kùsatàu aya'là'nokon. Tekessen nà, paiki là, pùlayatta là, kùyali là, wapùla là asa'là pon kùsatàu,” teppù Jesus uya. ₄“Ayanùnsak kon yau, màlà tapùi tau mettàik, màlà pata nàmà auya'nokon ponalà. ₅I'nailàlà kappon yamùk uya ayanùmù kon pùla iwechi yau, màlà pata mùnàntàik molopai non ipunuppù mùtu'metàik atta kon poi tok pàk àsà kan tà te pe,” teppù Jesus uya. ₆Ya'lon kon utàppù màlà tamù'nawolon pata yamùk yawàlà Wakù Itekale yekama pe molopai kappon yamùk ipittà pe màttawàlà.

₇Herod, Galilee yepulu, uya tamù'nawolon tùwekkussan yetappù. Itaimelunpasak wechippù kulu sàlà pàk, masapùla kappon yamùk uya, “Enpataukanài John wennappokasak pàli'yau man,” tesak pàk. ₈Tùulon kon uya Elijah usenpoikasak man teppù. Tùulon kon uya Katù Maimu yenpoikanài tonpa penalok lùppù wennappokasak man, teppù. ₉Herod uya, “John ippai yattà toppe kuichi ikupùppù uya tà. Tùse ànùk ken uchi pùsàlà kàyik sàlà kasaichi ipantomù tetayai'nùk?” teppù. Molopai Jesus yeneiche iwechippù.

₁₀Yeunossak kon wennapoppù màlà molopai tamù'nawolon tùnkupùppù kon yekamappù tok uya Jesus pàk. Tok yalàppù ya ta'là molopai tok utàppù tùyiwalà'nokon pata Bethsaida pona. ₁₁Yetasak tùuya'nokon yau tukkan kon kappon yamùk uya iwenaimappù. Tok yanùmùppù ya tùutauchinpaik. Tok yelupappù ya, Katù wettok itepulu pe pàk, molopai mùkyamlo tipittà kon iche tùwessan ipittàppù ya.

₁₂Wei wewonkapù kùlottau, 12 pan kon ya'lon kon uyàpùppù ipyak. Molopai, “Kappon yamùk yeunokkà pata yamùk molopai umà yamùk sàlà tawolon kon nà yak, tok utàtoppe teipa kon yepose molopai tùwe'nùntok kon patassek woton yepose. Masapùla sàlà pata màlà tùkkenan, ” teppù tok uya. ₁₃Tùse Jesus uya tok pàk, “Amyamlo pe tok yewettàk kon,” teppù.

“Mùyak etoikenan neken eki molopai asa'lon kon molok yamùk tawon neken ina piyau man. Kùyali ye'mase ina utà pùsamlo tukkan kon kappon yamùk ponaloppe?” teppù ya'lon kon uya. ₁₄Tukke kulu kàyik yamùk wechippù màlà 5000 pe molo. Jesus uya ta'lon kon pàk, “Kappon yamùk weleuta toppe ikuttàk kon tamùkke 50 pe'ne,” teppù. ₁₅Ya'lon kon uya ikupùppù molopai tamù'nawolon kon yeleutanùpùppù tok uya. ₁₆Jesus uya mùyak etoikenan eki molopai asa'lon kon molok yamùk tawon yanùmùppù molopai tenu tùlùppù ya epùn winàkàik. Tenki teppù ya Katù pàk màlà yamùk pàk, molopai ipilipàtùppù ya. Molopai itùlùppù ya ta'lon kon yemyak tok uya yekantoppe kappon yamùk yemyak. ₁₇Tamù'nawàlà tok uta'lettàppù màlà tùwenukasse. Molopai Jesus ya'lon kon uya nen uchi 12 pe kaichalà walicha yamùk yak kappon yamùk yeipa tonpappù yanukuppù màlà.

₁₈Tewin tekwa là Jesus wàpùlema tewincha tùse, ya'lon kon uyàpùppù ipyak. “Ànùk tawonnan ken kappon yamùk upàk?” tukaik tok yekamappoppù ya. ₁₉“Tùulon kon Enpataukanài John tawonnan àpàk. Tùulon kon Elijah tawonnan, tùulon kon Katù Maimu yenpoikannan tonpa penalok lùppù wennappokasak tawonnan,” tukaik tok uya yeikuppù. ₂₀“Amyamlo nen? Ànùk mùkayatàu nen upàk?” tukaik tok yekamappoppù ya.

Peter uya yeikuppù, “Katù winàpaino nen àmàlà Christ,” tukaik.

₂₁Màlàyau àsà pe meluntà pe, “Ànù'là pàk kan uchi sàlà kùsekamatàu tà,” teppù ya.

₂₂“Kàyik Mumu wettalumattà màlà eke pe, molopai eke ton tùnamasan uya inulunpa màlà. paatele yamùk yepulu ton, molopai Law pàk enupannan uya inulunpa màlà. Iwànà màlà molopai iwe’wuluuka màlà icholùwano wei yattai,” teppù ya tok pàk.

₂₃Màlàyau tamù'nawolon kon pàk, “Ànù’là wechi uya'là àippai yau tàwà tùwettalumattàtok yanùmùi, molopai uya'là nùyàpùi. ₂₄Masapùla mùkkàlà kappon takkwalù pùnùnmanài uya ilachima màlà, tùse mùkkàlà takkwalù lachimanài upàkànsau uya ipùikattà màlà. ₂₅Yà'là ken wakù yepolo kappon uya tamù'nawàlà wolù yesappe tùwechi winà, tùwe'lachimasak echii'ma. ₂₆Ànù'là kappon wekkuli'masak upàk yau molopai umaimu pàk yau, Kàyik Mumu wekkuli'ma nàlà màlà ipàk tùuyàssak yau, takkwayi, tùkàipùnù yakkwayi, molopai Inchelù yamùk yakkwayi tawon yau yattai. ₂₇Ailon kulu sàlà, tùulon kon talà man tùwelikù woton kon pen, Katù wettok itepulu pe yene tùuya'nokon wapiya, te uya sàlà àpàkù'nokon,” teppù Jesus uya.

₂₈8 pe wei tùpo sàlà yamùk pàk tùuselupa tùpo, Jesus uya Peter, John molopai James tawonnan yalàppù ta'là. Iitàppù àpùlemase wùk pona. ₂₉Iwàpùlema tùse itenpata wemyakanmappù màlà molopai ipon wenappù aimu'ne akkwa pe, liuliu pe. ₃₀Màlàyau asse'ne asa'lon kon kappon yamùk uselupappù màlà ipokonpe. Moses molopai Elijah tawonnan pe tok wechippù, ₃₁Tok usenpoikappù màlà epùn poi akkwa yau, molopai tok uselupappù Jesus pokonpe iitàtok pàk, Jerusalem po tùwekkupù woton. ₃₂Peter molopai itonpa yamùk we'nùnsak wechippù màlà. Tùse tùupakasak kon yau, Jesus yakkwayi yeneppù tok uya molopai asa'lon kon kàyik yamùk ipyau satippe. ₃₃Kàyik yamùk uya Jesus nàmà tùse, Peter uya Jesus pàk, “Enupanài, wakù pe man talà we'nà'nokon. Àsolùwau tapùi yamùpai'nokon man, tewin àponalok pe, tewin Moses ponaloppe, molopai tewin Elijah ponaloppe,” teppù. Yà'là te kulu là tùuya ittuppù ya pen màlà. ₃₄Ichelupa lùppù tùse katuppluk wekkwamùppù molopai tok waputtàppù ya takkwalùppù ke. Molopai Jesus ya'lon kon wettalipasak wechippù màlà katuppluk uyàssak tepoi'nokon yau. ₃₅Mayin uya katuppluk yau, “Pùsàlà mùkkàlà Umu, unanùmùppù, yetatàk kon,” teppù màlà. ₃₆Mayin wàttù'nàsak yau, molo Jesus wechippù màlà tewincha. Ya'lon kon wechippù màlà eppana molopai ànù'là pàk tùneneppù kon yekamappù tok uya pen màlà, màlà yattai.

₃₇Iwemassak yau tok uttàsak wùk poi yau, tukkan kon kappon yamùk uya Jesus yepoloppù. ₃₈Kàyik wentaimeppù tukkan kon kùlottapai, “Enupanài, apawanattàyan sa' tàwà iulà. Umu yenkà, tewinan kulu tàwà umu! ₃₉Àli akkwalù mùkkàlà yeponài tùntaimese, molopai yenu'manài iicha'manta toppe, màlàyau tùwentaklonpitasen. Màlà kasa imattanùppù pàk man inonka ya pùla! ₄₀Aya'lon kon tùpawanattài yenpakka toppe tok uya, tùse tok uya yenpakka pùla. Tok yentaikasak ya man,” teppù ya. ₄₁Jesus uya yeikuppù, “Ailon tetok auya'nokon pùla man, molopai ikasa pùla messatàik amyamlo kappon yamùk! Yà'là pàkàlà là ken uchi apyau'nokon wechi sàlà? Yà'là pàkàlà là wa ewechi kon pàlika uya?” tukaik. Màlàyau Jesus uya kàyik pàk, “Àmu inekkà sà motak,” teppù. ₄₂Walawok muleppù uyàpù tùse, àli akkwalù uya ikawai'mappù non pona, iicha'mantappù. Tùse Jesus uya àli akkwalù yapyontàppù iwepakka toppe. Walawok muleppù ipittàppù ya molopai innapoppù ya nen uchi ikàipùnù yemyak. ₄₃Tamù'nawolon kon kappon yamùk usenumenkasak wechippù màlà Katù meluntàlù pàk.

Kappon yamùk wechippù màlà tùusenumenka kon pàk lùppù tamù'nawolon Jesus nùkupù pàk, ta'lon kon pàk suwa tesak ya yau, ₄₄“Yekama pàk wekkussai’nùk kùpputtàka'nùttàu! Kàyik Mumu tùlù màlà kappon yamùk meluntàlù yemyak,” tesak ya pàk. ₄₅Tùse yà'là pà'là sàlà uya wate ittuppù tok uya pen màlà. Yonansak wechippù màlà tok winàpai tok uya ittu tukaik. Molopai tok usenalippappù enekamapopai pùla màlà pàk.

₄₆Usàulàmantok wessepoloppù màlà Jesus ya'lon kon kùlottau, i'nai wechi eke pe kulu tùklottau’nokon, tawon pàk. ₄₇Jesus uya tok usenumenkatok ittuppù màlà. Màlàpàk mule yanùmùppù ya molopai i'mùssakappù ya tùpyau. ₄₈Molopai tok pàk, “Kappon uyesek yau pùsàlà mule yanùnnài uya uyanùmù màlà. Molopai ànù'là uyanùnnài uya nàlà uyeuno'nàippù yanùmù màlà. Masapùla mùkkàlà elekkwà kulu àklottau'nokon, wechi màlà eke pe kulu,” teppù ya tok pàk.

₄₉John uselupappù, “Itepulu, kàyik yentai nen mà ina tà, àli akkwalù yamùk yenpakka ya eyesek yau. Ina kan nekamatai iweleuta toppe, masapùla kùklottawon pe pùla iwechi pàk,” teppù ya. ₅₀“Yeleutanùpùiche chi kettàu, masapùla àpokonoma ya pùla nai'nùk mùkkàlà àponalok,” teppù Jesus uya.

₅₁Mei pùla Jesus yanùntok epùn pona weyu wechi pàk, ichenumenkappù iwessalattàppù te'ma tawà Jerusalem pona tùutà pàk. ₅₂Tùmaimu yekaman nan yeunokoppù ya màlà tùwapiya. Màlàyau tok utàppù Samaria pon pata yak tamù'nawolon konekase iponalok pe. ₅₃Tùse kappon yamùk molon kon nà uya yanùmù pùla iwechippù, masapùla tok uya ittuppù màlà Jerusalem pona iità. ₅₄Jesus ya'lon kon James molopai John tawonnan uya yensak tùuya'nokon yau, “Itepulu, apok kà'ma na' ina uya epùn poi iche messan, tok mattanùttoppe ya ?” teppù. ₅₅Jesus welattàppù tok winàkàik molopai tok yàulàmappù ya. ₅₆Molopai tok utàppù tùulon pata yak.

₅₇Te'ma kon tawà tok utà tùse kàyik uya Jesus pàk, “Aya'là utà màlà i'nailàlà àutà yau,” teppù. ₅₈Jesus uya ipàk, “Maikan yamùk mùkyamlo teuta kenan kon molopai tolon yamùk mùkyamlo tùpon kenan kon, tùse Kàyik Mumu mùkkàlà iwàlàkkattok patassek pùn,” teppù. ₅₉Jesus uya tùulon kàyik pàk, “Uya'là àikkà,” teppù. Tùse kàyik uya, “Itepulu, masa wapiya utàiche ukàipùnù wu'nattàse.’ teppù. ₆₀Jesus uya yeikuppù, “Tàwà iwelichak kon tàkàpù kon wu'nattài. Itàkà molopai Katù wettok itepulu pe yekamata,” tukaik yeikuppù ya. ₆₁Tùulon kàyik uya, “Aya'là nen utà, Uyepulu, tùse masa wapiya utàyaik ukataiche utonpa yamùk pàk,” teppù. ₆₂Jesus uya yeikuppù, “Ànù'là umà yaka pàk iweppyattàsak lùppù molopai tenu tùpà'nài te'mappùtak mùkkàlà tapulàsen yek pen Katù wettok itepulu pe yau,” tukaik.