Mark 3

₁Jesus wewomùppù synagogue tak. Màlà motau kàyik iwaipùtasak itemyatù wechippù. ₂Molo kappon yamùk wechippù, Chisek antalumattàpai nokon ikasa pùla iwechi pe tukaik. Tok wechippù Jesus yenupàkàlà ànù'là ipittù ya Wàlàka'nàtok weyu yattai yen toppe tùuya'nokon. ₃Jesus uya kàyik iwaipùtasak itemyatù pàk, “Àikkà sà motak yakkletak,” teppù. ₄Kappon yamùk yekamappoppù ya nen uchi “ Yà'là wechi ken ikasa màlà Law yailà Wàlàka'nàtok weyu yattai tùkussen pe, wakù kupù ka'lù, wapùla ka' àli kupù? Kappon yakkwalù kupù ka' nulà lù wapùla ka' kappon wànà lù?” teppù Jesus uya tok pàk. Tùse yeikuppù tok uya pen. ₅Jesus we'naikasak wechippù màlà tok yenei'ma, tùse ichentupappù masapùla sa'man pe tok yewan wechi pàk molopai tok wechi ikasa pùla pàk. Màlàyau nen uchi kàyik pàk, “Eyemyatù yenkakà,” teppù ya. Temyatù yenkappù ya màlàyau itemyatù umeluntàtappù. ₆Màlàyau Pharisee yamùk utàppù synagogue tapai eselupaik Herod tonpa yamùk pokonpe Jesus winàkàik. Iwàtok tùuya'nokon woton ittuse.

₇Jesus utàppù màlà tùnenupa ton pokonpe Galilee tuna yena pona. Ilinà kappon yamùk uya iwenaimappù Galilee, molopai Judea, tawon poi nokon uya, ₈Jerusalem poi nokon, Idumea poi nokon, Jordan tuna pàk màwinàpai nokon, Tyre poi nokon molopai Sidon poi nokon. Pùsamlo tukkan kappon yamùk uyàpùppù màlà Chisek piyak masapùla inkupùssan yamùk yekale yetasak tùuya'nokon pàk. ₉Jesus uya tùnenupa ton pàk, “Kanau inettàk kon yak wenuttoppe,” teppù. Masapùla tukke kulu kappon yamùk wechi tùwoi pàk. ₁₀Tukkan kon kappon yamùk ipittàppù ya màlà yatai. Màlàpàk tok uselemlukuppù ipyak anappàppai tùwechi kon pàk. ₁₁Àliton nà yakkwalù wekkawai'ma itemlotopo yene tùuya'nokon pàk, “Àmàlà mùkkàlà Katù Mumu,” tukaik tok wentaimeppù. ₁₂Chisek uya àsà pe àliton akkwalù yamùk yekamappoppù ànùk pe là tùwechi yekama tok uya tukaik.

₁₃Màlà tùpo Jesus wenukuppù wùk pona molopai kàyik yamùk iche tùwettok kon kà'mappù ya tùpyak molopai tok uyàpùppù ipyak. ₁₄Tok yanùmùppù ya 12 pe molopai tok pàk “Uya'là ewechi kon pa ayanùnsak kon uya sàlà, eyeunoko kon uya làma màlà itekale yekamaik, ₁₅Tùmeluntàlù ke ewechi kon màlà àli akkwalù yamùk yenpakka kon pa,” teppù ya tok pàk. ₁₆12 pe kaichalà inkà'massan wechippù màlà. Simon, yesettàppù ya Peter pe, ₁₇James, John tawonnan, Zebedee munkà, (Jesus nesettàssan Boanerges pe “Wala'napi walainon Kàyik yamùk” te ya pe iwechi). ₁₈Andrew, Philip, Bartholomew, Matthew, Thomas, James, Alphaeus mumu, Thaddaeus, Simon, Canaan pon tawonnan, ₁₉molopai Judas Iscariot, Katù Mumu yeimippo woton wechippù ya'là. Mùkyamlo pokonpe iitàppù tapùi tak.

₂₀Ilinà kappon yamùk wepilittukkappù ipyak. Jesus molopai inenupa ton uta'letàtok yattai pùla iwechippù. ₂₁Jesus yekale yetasak tùuya'nokon yau, itonpa yamùk utàppù yachiik, masapùla, “Ittayaupa màlà!” teppù kappon yamùk uya.

₂₂Tùse Law pàk enupannan Jerusalem poi iyàsssak kon uya, “Beelzebul wechi màlà yau! Àliton akkwalù yamùk yepulu, Settan uya imeluntàlùttà màlà tok yenpakka toppe ya,” teppù. ₂₃Màlàyau Jesus uya tok kà'mappù tùpyak, molopai panton yekamappù ya tok pàk. “Yà'là kasa ken Settan uya Settan yempakka?” tukaik tok yekamappoppù ya. ₂₄Sàlà pata yawon kon kappon yamùk wechi esseyaton pàk tùyiwalà'nokon yau, echi tonpa pe tok wechi pen màlà ₂₅Echitonpa pe tùwùk kon tau tùwemassan wechi esseyaton pàk tùyiwalà'nokon yau, echi tonpa pe tok wemapù pen,” teppù ya tok pàk. ₂₆“Yattai pùla Settan we'latoikasak tùyiwalà tùwepanta'ma yakon pe pe iwechi yau tachinpe iwemapù pen tùse ipla iwena màlà. Iwenukapù.

₂₇“Ànù'là wewomù meluntà kàyik yùwùk tak molo là itesak tùse itappluli mokkaik pen, tùse wapiya làkku mùkkàlà meluntà kàyik yaulonpàssak tùuya yau, itappluli mokka ya làichi màlà,” teppù Jesus uya.

₂₈“Ailon kulu sàlà, tamù'nawolon kon àli ku'nài nan kappon yamùk molopai Katù winàkàik tùwe'namaik pùla là àli pe tùuselupasan pàk usentupan màlà. ₂₉Tùse àli pe nùselupayai'nàk Wakù Akkwalù winàkàik, pàk Katù usentupa pen màlà. Tùse tùmakuyi yau iwechi tàwàlàlà,” teppù Jesus uya. ₃₀Jesus uya wa teppù màlà masapùla tùpàk tùulon kon uya, “Àli akkwalù wechi màlà yau,” tesak pàk.

₃₁Jesus yan molopai yakon non welepamùppù. Satippe tok wechippù polopo, tùse ikà'manài yeunokoppù tok uya. ₃₂Jesus woi tukkan kon wechippù chichiupe'ne, “Asan molopai ayakon non eyiwayan polopo,” teppù tok uya Jesus pàk. ₃₃Màlàyau Jesus uya tok maimu yeikuppù, “Ànùk uchi usan? Ànùk uyakon non?” tukaik. ₃₄Màlàyau tùwoinokon yenei'ma, “Imasa yentàk, pùsamo kunaik usan yamùk, pùsamo uyakon non,” teppù ya. ₃₅“Ànù'là Katù yeselu ku'nài wechi màlà uyakon non pe, uwàlichi ton pe, usan pe là,” teppù Jesus uya.