Revelation 10

₁Molopai tùulon meluntà inchelù uttà epùn poi yeneppù uya. Katuppluk yak iwepontàsak wechippù, molopai melemleik wechippù ippai woi, itenpata wechippù wei kasa, molopai ichi yamùk wechippù apok pe, wakapu yamùk kasa. ₂Elekkwà lùkkwà kaleta yakkokasak wechippù itemyau. Kamik pen tùtta tùlùppù ya palau pona, molopai kamik tùtta tùlùppù ya a'mun non pona. ₃Molopai iwentaimeppù eke pe palauya tàwù useta kasa. Iwentaime tùpo, 7 pan kon wala'napi yamùk uya yeikuppù. ₄Tok uselupa pe, kaleta menuka pàk wekkupùppù. Tùse mayin uselupa epùn poi yetappù uya, “7 pan kon wala'napi yamùk nekamappù ikukkà tùttusen pe pùla, molopai kù'menukai!” tukaik.

₅Màlàyau inchelù uneneppù satippe palau po molopai non po uya kamik pen temyatù yenkappù epùn winàkàik. ₆Molopai suwa wechi màlà teppù ya Katù yesek yau, mùkkàlà tàwàlàlà tùwemassen, mùkkàlà epùn, non, palau, molopai tamù'nawolon màlà yamùk yawon kon, konekanàippù. Inchelù uya wateppù, “Eichilà man iweyu uyàssak man!” teppù ya. ₇“Tùse 7 pe iku'nài inchelù uya tùwayi tàulùnpasak yau nen uchi màlà, Katù uya màlà tonantau tùnkupù yenuka'nùpù màlà, tapyoto ton tùmaimu yenpoikannan pàk yekamappù tùuya kasa,” teppù ya nàlà.

₈Màlàyau mayin iichelupa unetappù epùn poi uya uyelupa tu'mappù, “Itàkà molopai màlà yakkokasak kaleta yekkwatta inchelù satippe nai'nùk palau po molopai non po yemyapai,” tukaik. ₉Utàppù inchelù piyak molopai yekamappoppù uya elekkwà lùkkwà kaleta tùtoppe ya uyemyak. “Yekkwakkà molopai inakkà, so'lipe iwena màlà àlotta yau, antau assekku pe iwechi màlà wan kasa,” teppù ya upàk. ₁₀Elekkwà lùkkwà kaleta yekkwatùppù uya itemyapai molopai inapùppù uya, iwessonpappù assekku pe wan kasa untau. Tùse yeuno'masak uya tùpo, so'li pe iwenappù ulotta yau.

₁₁“Tewin itekkwaloppe tu'maichi Katù Maimu menpoikatukkaik tukkan kon kappon yamùk pàk, pata yamùk non pon yawolon kon pàk, tùpatalo'nan mayin yamùk, molopai kin yamùk pàk,” teppù màlà upàk.