Ephesus Pon Sochi Ponalok Itekale
1“Ephesus pon Sochi inchelùyi piyak sàlà imenukakà:
“Sàlàichi màlà mùkkàlà 7 pan chilùkà yamùk yachinài kamik pen temyatù yau winàpaino itekale, mùkkàlà 7 pan kolù yapai ikonekasak lanppu yapon kùlottawà tùusasen,” teppù ya. 2“Ànkupùppù tùttuyaik sa'man pe ewe'wotokomappù molopai pàlikanài pe ewechippù. Àliton kappon yamùk pàlika auya pùla iwechi tùttuyaik. Molopai mùkyamlo tùusesassan yeunossak kon pe yeunossak kon pe pùla echii'ma ittuppù auya. Kasei pe tok wechi ittuppù auya. 3Pàlikanài àmàlà. Ewettalumattàppù man uyesek pàkànsau, molopai ewe'nonkasak pùla man. 4Tùse sàlàichi màlà wakù pe pùla ewechi pàk usenumenkatok ewinàkàik, wapiya u'nùnmappù auya kasa u'nùnma auya pùla man. 5Ittukàichi mei ewennapposak! Amakuyi winàpai elattàk Katù winàkàik, molopai wapiya ànkupùppù ikukkà. Ewelattà pùla iwechi yau, apyak uyàpù màlà molopai alanppuyi yapon mokka uya màlà ipatassek yapai. 6Tùse sàlà yesappe messaik, Nicolaitan yamùk nùkupù màlà eyewanma, uyewanma pe nàlà ikupù uya kasa.
7“Tàwà tùpana ke nai'nùk Wakù Akkwalù uya Sochi yamùk yelupatok yetai.
Mùkyamlo entaikannannùssan uya, nulà ku'nài kùyali yepelu nattoppe ikupù uya màlà, màlà iwattasak Katù tumà yau,” teppù ya.
Smyrna Pon Sochi Ponalok Itekale
8“Smyrna pon Sochi inchelùyi piyak sàlà imenukakà:
“Sàlàichi màlà itekale mùkkàlà wapiyalok molopai iwenukattok, iwelichak lùppù molopai nulà tu'ma nai'nùk winàpaino. 9Atalumattàtok molopai entuppak ewechi tùttuyaik. Tùse itemaminkek kulu àmàlà. Àli ton uselupantok kon ewinàkàik tùttuyaik Jew yamùk pe tùusesassan winà tùse Jew yamùk pe pùla echii'ma. Settan ponalok kon mùkyamlo.” 10“Yà'làlà ewettalumattàtok ike woton pàk kesenalippai! Masa yetakà! Makui uya eyittu màlà àtonpa yamùk tùlù tùuya patikichi tak winà 10 pe wei màlà ewettalumattà. Ailon pe mechiik, ewelikù ponalà, molopai wema'nàtok yalùko ke elepa uya màlà.
11“Tàwà tùpana ke nai'nùk netai, Wakù Akkwalù uya sochi yamùk yelupatok.”
“Mùkyamlo entaikan nan nùssan umatta yakon itekkwa pe weli'nàtok ke pen màlà.”
Pergamum Pon Sochi Ponalok Itekale
12“Pergamum pon sochi inchelùyi piyak sàlà imenukakà:
“Sàlàichi màlà itekale, mùkkàlà, yàkek asa'lon yà kasupala yesak winàpaino, tukaik.” 13“Ewemattok yau tùttuyaik, molo Settan yapon wettok imotau. Ailon pe lùppù messaik uyesek pàk, molopai ailon tetok auya upàk nonka auya pùn, Antipas yattai, ailon kulu upàk tùuselupasen iwàsak lùppù apata yau, molo Settan wemattok motau. 14Tùse molo man tukkan pen nà ikasa pùla ewechi pàk ewinàkàik usenumenkatok. Tùulon kon àkklottau'nokon man Balaam uya enupantok ku'nài nan. Balak yenupappù ya màlà Israel pon kon wemakuima toppe ikuttoppe ya Katù pen yemyak itùsak lùppù kùyali nattoppe tok uya. Molopai tok uya àli imakuyippù kuttoppe tesak kon ke. 15Màlà kasa làma, tùulon kon molo man apyau Nicolaitan yamùk uya enupantok ku'nài nan. 16Amakuyi winàpai uchi elattàkà! Ewelattà pùla iwechi yau, asse'ne apyak uyàpù màlà molopai mùkyamlo panta'ma uya màlà asa'lon yà kasupala unta yapai tùwepakkasen ke.”
17“Tàwà tùpana ke nai'nùk, Wakù Akkwalù uya sochi yamùk yelupatok yetai.
Mùkyamlo entaikan nan nùssan lepa uya màlà tonantau tùwessen kùyali manna ke. Aimu'nan tàk ke nàlà tok lepa uya màlà. Sàlà wechi màlà emennak esek menukasak ipàk, ànù'là nùttu pen tùse yeponàippù neken nùtttu.”
Thyatira Pon Sochi Ponalok Itekale
18“Thyatira pon sochi inchelùyi piyak sàlà imenukakà:
“Sàlàichi màlà itekale Katù Mumu winàpaino. Itenu tùulenpansen apok kasa, itta tùulenpansen kalukuli kalapaimasak kasa.” 19“Ànkupù tùttuyaik. Pùnùnmantok auya, ailon tetok auya, ewe'wotokomatok molopai pàlikanài pe ewettok. Wakù peiwa ikupù auya tùttuyaik sàlà pe wapiya ikupùppù auya yentai lùiwa. 20Tùse sàlàichi màlà usenumenkatok ewinàkàik. Mùkkàlà nossan Jezebel pàlikanài àmàlà, mùkkàlà Katù Maimu yenpoikanài pe tukaik tùusesassen. Uyapyoto yamùk yenupanài mùkkàlà àli imakuyippù kuttoppe tok uya tesak kon ke, molopai Katù pen yemyak itùsak kùyali nattoppe tok uya iku'nài. 21Tùmakuyi winàpai iwelattàtok yattai ke ilepasak uya man, tùse elattàpai pùla man tesak ke tùwemakuimatok winàpai. 22Màlàpàk uchi yenu'ma uya màlà yapon po. Molo eke pe iwettalumattà màlà mùkyamlo tùtayappù ton pen tùpokonpe àli ku'nàinan nùssan pokonpe. Sàlà kupù uya màlà, tok welattà imakuyi yeselu winàpai pùla iwechi yau. 23Imunkà yamùk tùkka uya nàlà màlà, màlàyau nen uchi tamù'nawolon sochi yamùk uya Iulà pe iwechi ittu màlà, kappon yamùk yewan molopai tok usenumenkatok ittunài pe. Tamù'nawàlà amyamlo ye'ma uya màlà ànkupùppù yawàlà tewinpàk.
24“Tùse amyamlo nàlà tok tonpa yamùk Thyatira pon kon uya àli enupantok ya kupùppù pùla man, ‘Settan nùkupù tonantawon tukaik tùulon kon nesatù pàk eusenupasak kon pùla man. Tùulon tùpàlikasen tùlù uya tu'ma àpona'nokon pen màlà. 25Tùse eyenupatok kon itesappe messatài'nùk kù'nonkatàu kulu uyàpù ponalà. 26Mùkyamlo entaikannan nùssan molopai uwotokoyi ku'nàinan nùssan iwenukapù ponalà, yemyak itepulu pe we'nàtok yapàikketù pata yamùk yepoi tùlù uya màlà. 27Màlà apàikkek yepoloppù uya màlà Ukàipùnù winàpai unepoloppù lùppù. “Meluntà tekessen ke tok yepulu pe tok wechi màlà molopai tok yamokklopù tok uya màlà echikili pe àinà yamokklossak kasa.” 28Molopai ko'làmalok kaiwonok ke nàlà tok lepa uya.
29“Tàwà tùpana ke nai'nùk Wakù Akkwalù uya sochi yamùk yelupatok yeta.! ”
