Kaleta Molopai Kalinilu Mule
1Kaleta yeneppù uya màlà mùkkàlà aponnok po chichiu pe tùwessen yemyatù kamik pen yau, imenukasak wechippù ese'latoi pàk, molopai iki'nàmasak wechippù màlà 7 pan yachittok ke. 2Molopai meluntà inchelù yeneppù uya màlà, Eke pe tùwentaimese yekamappù ya “Ànùk ken kaleta yachittok ikkwà'nài yeppe nai, molopai kaleta yakkokanài yeppe?” tukaik. 3Tùse ànù'là wessepolo pùla iwechippù màlà epùn po, wapùla non po, wapùla non yo'non yau. Sàlà kaleta yakkoka woton molopai yau yene woton pùla iwechippù. 4Ukalawùppù kulu màlà masapùla ànù'là kaleta yakkokanài yek, wessepolo pùla iwessak pàk wapùla yau yene woton pùla iwessak pàk. 5Màlàyau eke ton tùnamasan tonpa uya upàk, “Kakalawùi, yenkà! Palauya Judah pa, David pa, eke kulu uya entaikansak man molopai mùkkàlà 7 pan yachittok ikkwà'nài yeppe man molopai kaleta yakkokanài yeppe,” teppù.
6Màlàyau Kalinilu Mule yeneppù uya màlà satippe aponnok yakkletau, asakùlà'nan kon nulànan kon ànùkyan nànan molopai eke ton tùnamasan wechippù iwoi. Kalinilu Mule useneppù iwàsa'lùppù kasa. 7 pe iletù wechippù, molopai 7 pe itenu, sàlà yamùk wechippù màlà 7 pan kon akkwalù yamùk Katù winàpaino pe yeunossak kon nùssan tamù'nawolon non pona. 7Kalinilu Mule uyàpùppù molopai kaleta yekkwatùppù ya mùkkàlà chichiu pe tùwessen aponnok po yemyatù kamik pen yapai. 8Kaleta yekkwassak ya yau, asakùlà'nan kon nulànan kon ànùkyan nànan molopai 24 pan eke ton tùnamasan wepeimappù Kalinilu Mule yemloto po. Tùkaichalà' ne'nokon tùwayi ke'ne tok wechippù. Molopai kolù pùsau yamùk appoi'nan tùpottàsen ke yanùkkasak yesappe'ne. Sàlà yamùk màlà Katù munkà yamùk wàpùlematok. 9Tok uselenpappù emennak elen pàk:
“Wakù pe messaik sàlà kaleta yekkwa'nài yeppe, molopai yachittok yamùk ikkwà'nài pe. Masapùla àwànàppù màlà, molopai àmùnù winà kappon yamùk ye'mappù auya man Katù ponaloppe, tamù'nawolon kon kappon yamùk kùlottapai, tùpatalo'nan kon imaimu, tùpatalo'nan kon ikkok, molopai tùpatalo'nan kon kappon yamùk. 10Katù wettok itepulu pe yau, paatele yamùk pe tok kussak auya man, Katù ponaloppe tok we'wotokomatoppe, molopai non po itepulu pe tok wechi màlà,” tukaik.
11Uyenu tùtukkappù uya molopai tukkan kon inchelù yamùk yetappù uya. Tukke kulu tok wechippù tok ittu yentai. Aponnok woi sattippe, molopai nulànan kon ànùkyan nànan, molopai eke ton tùnamasan woi. (1000s molopai1000s molopai 10,000 x10,000.) 12Tok uselenpappù eke pe:
“Mùkkàlà Kalinilu Mule iwàsak lùppù wakù pe man apàikkek, mamin, pukkeppe we'nàtok, meluntà yanùnnài yeppe man. Apulàntok molopai namantok yanùnnài yeppe nàlà!” tukaik.
13Molopai tamù'nawolon kon epùn pon kon, non pon kon, non yo'non kon, tamù'nawolon palau pon kon. Tamù'nawàlà nulànan kon uselenpa yetappù uya,
“Tàwà mùkkàlà chichiu pe tùwessen aponnok po molopai Kalinilu Mule piyak apulàntok, namantok, molopai meluntà pe we'nàtok nechii, tàwàlàlà molopai tàwàlalà!” tukaik.
14Asakùlà'nan kon nulànan kon ànùkyan nànan uya yeikuppù, “ Emen,” tukaik. Molopai eke ton tùnamasan wepeimappù molopai yapulàppù tok uya.
