A boskopu fu MASRA gi David
1Baka di David go libi ini en kownu-oso, a taigi a profeiti Natan taki: “Luku, mi e libi na ini wan oso di meki fu sedre-udu, ma a santa kisi fu a ferbontu fu MASRA de na ondro wan tenti.” 2Ne Natan piki David taki: “Du ala san yu ati firi fu du, bika Gado de nanga yu.” 3Ma a srefi neti dati Gado taki nanga Natan. A taigi en taki: 4“Go na Mi knekti David, dan yu e taigi en taki: ‘Na disi MASRA e taki: A no yu o bow wan oso gi Mi fu Mi tan. 5Sensi a dei di Mi bigin fu tyari den sma fu Israel kon dyaso, te kon miti now, mi no libi na ini wan oso. Na ini wan tenti, ini wan santa tenti Mi ben e tan. 6Di Mi e hari fu a wan presi ini Israel go na a trawan, noiti Mi taigi wan fu den krutubakra fu Israel di Mi ben poti fu tiri Mi pipel, taki: fu sanede un no e bow wan oso fu sedre-udu gi Mi? 7We dan, taigi Mi knekti, taigi David taki: Na disi MASRA fu ala sani, e taki: Na Misrefi ben puru yu ini a wei, pe yu ben e luku skapu, èn Mi meki yu tron tiriman fu Mi pipel Israel. 8Alape yu ben e go Mi ben de nanga yu. Ala yu feyanti mi puru na pasi gi yu. Mi sa gi yu wan bigi nen tu leki di fu den bigiwan fu grontapu. 9Mi gi Mi pipel, Israel, wan tanpresi. Mi poti den drape fu den kan abi den eigi tanpresi. Den ati no o de na dyompo drape èn ogri-ati folku no sa pina den moro leki fosi, 10leki ini a ten di Mi ben poti krutubakra fu tiri Mi pipel Israel. Mi meki ala den feyanti fu yu saka densrefi gi yu. Mi e taigi yu taki: na MASRA o bow wan oso gi yu. 11Te yu dede èn den beri yu pe den afo fu yu beri, Mi o meki wan fu den eigi manpikin fu yu teki yu presi, èn Mi o meki a de wan tranga kownu. 12Na en o meki wan oso gi Mi, èn Mi o sorgu tak' na soso pikin nanga bakapikin fu en sa de kownu ala ten. 13Mi o de leki wan p'pa gi en, èn a sa de leki wan manpikin gi Mi. Mi no sa tapu fu sori en a bigi lobi fu Mi, leki fa Mi ben tapu fu sori en na a wan di ben de kownu na yu fesi. 14Mi sa poti en fu tiri Mi pipel nanga Mi kondre fu têgo èn noiti wan sma sa man puru unu leki kownu.’ ”
15Dan Natan go taigi David ala san a si nanga ala san a yere. 16Dan kownu David go ini a tenti, a go sidon na MASRA fesi dan a begi taki: “MASRA Gado, suma na mi èn suma na mi famiri tak' Yu opo mi so? 17Tye Gado, efu dati no sari, Yu taki tu fa a o de nanga a famiri fu Yu knekti ini wan ten di de fara na wi fesi. MASRA Gado, Yu e si mi leki wan fu den moro hei libisma fu grontapu. 18San mi o man taki moro fu a grani di Yu e gi Yu knekti? Yu sabi Yu knekti. 19MASRA, fu Yu knekti ede, èn soleki fa yu besroiti na ini yu ati, Yu du ala den bigi sani disi èn taki fu den. 20MASRA, a de leki fa wi yere, no wan no de leki Yu èn no wan Gado no de boiti Yu. 21Èn sortu folku de leki Israel? Den na a enkri folku na grontapu di Yu go ferlusu, fu meki den tron Yu eigi folku, fu Yu kan kisi bigi nen nanga den bigi èn ferwondru sani di Yu du. Yu yagi tra folku gwe gi a folku fu Yu di Yu ben ferlusu puru na Egipte. 22Na so Yu meki Yu folku Israel tron Yu eigi folku fu têgo, èn Yu, MASRA, na den Gado. 23We now, MASRA, mi e begi fu Yu hori Yu ala ten na den sani di Yu pramisi mi nanga mi famiri. Meki a psa soleki fa Yu taki. 24Dan sma sa opo Yu nen èn gi Yu bigi nen fu têgo, fu di den o taki: ‘MASRA fu ala sani, a Gado fu Israel, na a Gado fu Israel.’ Na so wawan den famiri fu mi sa tan leki tiriman fu a kondre. 25Bika Yu, mi Gado, ben meki Yu knekti kon sabi taki na Yu o bow wan oso gi en. Na dat' meki a teki a dek'ati fu begi a begi disi. 26We MASRA, Yu na Gado, èn na Yu taki den bun sani disi fu Yu knekti. 27Abi prisiri now fu blesi Yu knekti nanga en famiri, fu wi kan tan tiriman fu têgo na Yu fesi. Bika na Yu blesi mi nanga mi famiri, dat' meki a blesi fu Yu san tan na wi tapu fu têgo.”
