1 Historia 18

₁Baka dati David wini den Filistijnsma èn a tyari den kon ondro a tiri fu en. A puru a foto Gat nanga den dorpu fu en na den anu. ₂David wini den Moabitisma tu. Den tron knekti fu David di ben mus tan tyari sani gi en di a ben komanderi den fu tyari kon. ₃David wini kownu Hadadeser fu Soba tu. A du dati na Hamat, di Hadadeser ben e go fu tyari a kontren na a Eufratliba kon baka ondro a tiri fu en. ₄David ben kan teki wan dusun fu den fetiwagi fu Hadadeser, seibi dusun srudati di ben e sidon tapu asi nanga tutenti dusun srudati di ben de nanga futu. A meki den srudati fu en hori wan hondro nomo fu den asi di ben e hari den fetiwagi. Fu ala den trawan a meki den koti den bakafututitei. ₅Dan den Arameesma fu Damaskus kon fu yepi kownu Hadadeser fu Soba. Ma David kiri tutenti-na-tu dusun fu den. ₆Baka dati David poti srudati na difrenti prenspari presi ini Damaskus èn den Arameesma tron knekti fu David di ben mus tan tyari sani gi en di a ben komanderi den fu tyari kon. MASRA ben e meki David wini alasei pe a ben e go.

₇David teki den gowtu schild di den waktiman fu Hadadeser ben e tyari dan a tyari den go na Yerusalem. ₈David teki bun furu kopro tyari gwe tu fu Tibkat nanga Kun, tu foto di Hadadeser ben e tiri. Nanga a kopro dati Salomo meki a bigi kopro beki, den bigi kopro postu nanga den kopro wrokosani. ₉Di kownu Tohu fu Hamat yere tak' David wini a heri legre fu kownu Hadadeser fu Soba, ₁₀a seni en manpikin Hadoram go na David fu aksi en fa a e go nanga en, èn fu fersteri en nanga a wini di a wini Hadadeser. A seni ala sortu gowtu, solfru nanga kopro sani leki kado gi David tu. Tohu du dati fu di en nanga Hadadeser ben de feyanti. ₁₁Kownu David poti den kado dati aparti gi MASRA tu, neleki fa a ben du nanga a gowtu nanga a solfru di a ben teki fu den folku tyari gwe. Dati ben de: den Edomitisma, den Moabitisma, den Amonitisma, den Filistijnsma nanga den Amalekitisma.

₁₂Abisai, a manpikin fu Seruya, wini tin-na-aiti dusun Edomitisrudati ini a Sowtudal. ₁₃Alasei ini a kondre fu den Edomitisma David ben poti srudati èn so ala den Edomitisma ben tron knekti fu en. MASRA ben e meki David wini alasei pe a ben e go.

₁₄Baka di David tron kownu fu heri Israel, a ben e tiri a heri folku na tapu wan bun èn leti fasi. ₁₅Yoab, a manpikin fu Seruya, ben de edeman fu a legre. Yosafat, a manpikin fu Akilud, ben de a takiman fu kownu. ₁₆Sadok, a manpikin fu Akitub, nanga Abimelek, a manpikin fu Abyatar, ben de priester. Sawsa ben de sekretarsi. ₁₇Benaya, a manpikin fu Yoyada, ben de edeman fu den Keretitiman nanga den Peletitiman. Den manpikin fu David ben de den moro prenspari sma di ben e yepi en.