1 Korinte 9

₁Mi na wan fri sma. Mi na wan boskopuman fu Yesus. Mi si wi Masra Yesus. Unu na a wroko san mi du gi Masra. ₂Kande tra sma no e si mi leki wan boskopuman fu Yesus, ma gi unu mi na wan. Bika unu na a stampu tapu a wroko san mi du gi Masra leki wan boskopuman fu En.

₃Disi na san mi e piki sma te den e krutu mi: ₄Wi abi a leti fu teki nyanyan nanga dringi. ₅Wi abi a leti tu fu teki wan sisa di e bribi, leki uma fu waka nanga wi. Na dati den tra boskopuman fu Yesus, den brada fu Masra, èn Kefas e du tu. ₆Fu sanede mi nanga Barnabas wawan abi fu wroko fu kon na un nyanyan? ₇Sortu srudati e pai ensrefi? Sortu gronman e prani wan droifibon sondro fu a nyan den froktu fu en? Sortu sma e kweki meti dan a no e dringi a merki fu den meti. ₈San mi taki dyaso no de wan libisma prakseri, ma a wèt e taki a srefi sani. ₉Bika a skrifi ini a wèt fu Moses taki: “Yu no mus tai a mofo fu wan kaw san e masi a graan fu puru a buba.” Yu denki taki na fu a kaw Gado e broko En ede? ₁₀Noso na fu wi ede Gado e taki a sani disi? Iya, na gi wi a ben skrifi. Bika a man di e drai a gron nanga a man di e masi a graan, e du en nanga a ferwakti taki a o kisi san a mus abi fu a wroko san a du. ₁₁Na wi ben sai den yeye sani na un mindri. So a no mus de wan bigi sani gi unu fu yepi wi nanga san wi abi fanowdu. ₁₂Efu tra sma abi a leti fu kisi sani fu unu, dan un mus yepi wi moro ete! Ma wi no teki a leti san wi ben abi, bika wi wani taki noti mus tapu a bun nyunsu fu Kristus. Dat' meki wi e nyan ala den sani disi. ₁₃Na sabi un no sabi taki den man di e wroko ini a tempel e kisi den nyanyan fu a tempel? Èn taki den man di e wroko na a altari e nyan fu den ofrandi fu a altari? ₁₄Na so Masra poti en tu taki den sma di e preiki a bun nyunsu mus libi fu a bun nyunsu.

₁₅Ma mi no teki no wan fu den leti disi. Mi no e skrifi en tu fu un go du sani gi mi now. Kwet'kweti! Dan moro betre mi dede! Bika no wan sma o tapu mi fu meki bigi tak' mi e sorgu gi misrefi. ₁₆Mi no kan meki bigi fu di mi e preiki a bun nyunsu. Na wan sani san mi musu fu du. Efu mi no ben preiki a bun nyunsu mi ben o de fu sari! ₁₇Bika efu mi du en fu di na mi wani, dan mi mus kisi pai fu en. Awinsi mi no e du en nanga wan fri wani, a e tan wan wroko san mi kisi fu du. ₁₈San na a pai san mi o kisi dan? A pai di mi o kisi na tak' mi e preiki a bun nyunsu sondro fu teki sani, èn taki mi no teki a leti di mi abi leki wan preikiman fu a bun nyunsu. ₁₉Aladi mi na wan fri sma, mi e saka misrefi gi ala sma fu wini someni leki mi man gi Masra. ₂₀Fu ben kan wini den Dyusma, mi ben libi leki wan Dyusma te mi ben de nanga den. Fu wini den sma di e hori a wèt, mi ben libi leki wan sma di e hori a wèt te mi ben de nanga den, aladi a wèt disi no abi fu taki na mi tapu. ₂₁Fu wini den sma di no e hori a wèt, mi ben libi leki wan sma di no e hori a wèt te mi ben de nanga den. Ma mi sabi taki mi no e libi sondro a wèt fu Gado, bika mi de ondro a wèt fu Kristus. ₂₂Fu wini den swakiwan ini bribi, meki mi ben e libi leki den swakiwan te mi ben de nanga den. Fu ben kan ferlusu awinsi wantu sma nomo, meki mi ben e libi ala fasi fa ala den sma ben e libi. ₂₃Ala den sani disi mi e du fu a bun nyunsu ede, fu mi kan teki prati ini den blesi fu en.

₂₄Na sabi un no sabi taki ala den sma di e lon ini wan streilon e lon makandra, ma taki na wan enkri sma nomo kan wini a prijs? Un srefi mus lon tu na sowan fasi fu kan kisi a prijs! ₂₅A sma di e teki prati na wan streilon e hori ensrefi fu no du ala sani. Den e du en fu wini wan sani san no e tan fu têgo. Ma wi e du en fu wini wan sani di e tan fu têgo. ₂₆Dat' meki wi no e lon tu leki wan sma di no sabi gi san a e lon. Mi no e feti tu, dan mi e naki winti. ₂₇Kwet'kweti! Mi e dwengi a skin fu du san mi wani, soso fu no lasi a strei baka di mi srefi preiki gi trawan.