1 Petrus 3

₁Uma, tapu a srefi fasi un mus saka unsrefi gi un masra. Dan awinsi sonwan fu den no e bribi a wortu, un o man wini den sondro wortu te den e si a fasi fa un e tyari unsrefi. ₂Den o si taki un e tyari unsrefi tapu wan krin fasi, nanga lespeki gi Gado. ₃A moi fu unu no mus de wan sani di de fu si na dorosei nomo. A no mus de a fasi fa un e meki un wiwiri, den gowtu sani san un e weri, noso den moi krosi na un skin. ₄Ma a moi fu unu mus de a safri èn tiri fasi fu un ati, di sma no e si. Na dati prenspari ini Gado ai, èn a e tan fu ala ten. ₅Disi ben de a moi fu den santa uma fu fosten. Den ben poti den howpu tapu Gado, èn den ben e saka densrefi gi den masra. ₆Na so Sara ben e du san Abraham ben e taki èn a ben e kari en “masra.” Efu un e du bun èn efu un no e frede noti, dan unu na bakapikin fu Sara.

₇Mansma, unu fu un sei mus libi nanga ferstan nanga un uma, bika den no tranga so leki unu. Un sori den lespeki, bika neleki unu, den kisi a libi di Gado gi wi fu sori wi En bun-ati. Dan noti o man hori den begi fu unu na baka.

₈Na a kba mi wani taigi un ete tak' un alamala mus abi a srefi prakseri. Un ati mus safu gi makandra. Un mus lobi makandra leki brada nanga sisa. Un mus abi sari-ati gi makandra, èn un mus abi sakafasi. ₉Un no mus pai ogri nanga ogri. Efu wan sma kosi unu, un no mus kosi en baka, ma un mus blesi en. Bika na fu dati Gado kari unu, fu un kisi blesi. ₁₀Bika: “A sma di wani abi prisiri ini a libi èn di wani psa bun ten, mus sorgu taki a no e taki takru fu trawan èn taki a no e lei nanga en mofo. ₁₁A mus drai en baka gi ogri èn a mus du bun. A mus suku freide nanga tra sma èn a mus du ala muiti fu sorgu taki a freide tan. ₁₂Bika Masra ai de tapu den sma di bun ini En ai èn En yesi e yere den begi fu den. Ma Masra e drai En fesi gi den sma di e du ogri.”

₁₃Suma o man du un ogri, efu un e suku fu du bun? ₁₄Bika un na blesi sma, awinsi un abi fu nyan pina fu di un e du san bun ini Gado ai. Un no mus frede den sani san den e frede, èn no wan sani mus bruya unu. ₁₅Ma ini un ati un mus poti Kristus aparti leki Masra. Ala ten un mus de klar'klari fu gi frantwortu na ala sma di e aksi un fu a howpu di un abi. ₁₆Ma un mus du en tapu wan safri nanga lespeki fasi, èn un mus sorgu taki un abi wan krin konsensi. Dan so den sma di e taki takru fu a bun fasi fa un e libi ini Kristus, o kisi syen fu den ogri sani di den taki. ₁₇Bika efu a de a wani fu Gado, a moro bun fu nyan pina te un e du bun, dan fu di un e du ogri.

₁₈Bika Kristus srefi, di ben bun ini Gado ai, dede gi den sondu fu den sma di no bun ini Gado ai. A du en wan leisi nomo fu tyari un kon na Gado èn noiti a sa de fanowdu moro. A ben dede na skinfasi, ma a Yeye ben meki A libi. ₁₉Èn na so A go preiki gi den yeye di ben de na strafu. ₂₀Den yeye disi no ben du san Gado wani, aladi A ben abi langa pasensi nanga den ini a ten di Noa ben e meki a bigi boto. Wantu sma nomo ben feni yepi. Den ben de nanga den aiti nomo di no dede ini a watra. ₂₁A watra na wan eksempre fu a dopu san e ferlusu unu now. A dopu no e wasi a doti puru fu un skin, ma na begi wi e begi Gado fu wan krin konsensi fu di Yesus Kristus opo baka na dede. ₂₂A go na heimel pe A e sidon na a let'anu sei fu Gado. Èn ala engel nanga ala den yeye di abi makti nanga krakti, saka na En ondro.