David nanga Goliat
1Den Filistijnsma ben kari den srudati fu den kon na wan baka, fu go na feti. Den ben kon na wan na Soko, ini a kontren fu Yuda. Den ben meki a legrekampu fu den na Efes-Damim, di ben de mindri Soko nanga Aseka. 2Saul nanga den srudati fu Israel kon na wan tu. Den ben meki a legrekampu fu den ini a Dal fu den bigi bon. Dan den seti densrefi na abrasei fu den Filistijnsrudati. 3Den Filistijnsrudati ben de na a wan sei, na a futu fu wan bergi, èn den srudati fu Israel ben de na abrasei fu den na a futu fu wan tra bergi. A dal ben prati den fu densrefi. 4Dan wan bun fetiman fu a legre fu den Filistijnsrudati waka kon na fesi. A ben nen Goliat, èn a ben de fu a foto Gat. Pikinso moro dan a man disi ben langa dri meter. 5A ben abi wan kopro fet'ati tapu en ede, èn a ben weri wan kopro dyakti di ben meki leki fisibuba. A kopro dyakti dati ben e wegi sowan feifitenti kilo. 6A ben weri koproplaat na en bonfutu, èn wan kopro kron deigri ben anga tapu en baka. 7A tiki fu a lansri fu en ben gersi wan pikin postu èn a srapu isri ede ben wegi sowan siksi kilo. Wan srudati ben e waka na en fesi di ben e tyari en schild. 8Goliat tan tnapu ini a dal, dan a bari gi den srudati fu Israel taki: “Fu sanede un hari kon dyaso fu kon feti? Mi na wan Filistijnsma, unu na knekti fu Saul. Un teki wan man na un mindri dan un seni en kon dyaso na mi. 9Efu a kan ori feti nanga mi èn kiri mi, den Filistijnsma sa tron srafu fu unu. Ma efu mi wini en èn kiri en, dan unu o tron srafu fu wi èn dini wi.” 10A Filistijnman tak' moro fara taki: “Tide mi e afrontu a legre fu Israel: un seni wan man kon fu feti nanga mi.” 11Saul nanga ala den srudati fu Israel bruya di den yere san a man taki, èn den bigin frede srefsrefi.
David ini a legrekampu
12David ben de wan manpikin fu Isai fu Betlehem. Betlehem ben de ini a kontren fu Efrata ini Yuda. Isai ben abi aiti manpikin. A ten di Saul ben de na makti Isai ben grani kba. 13Den dri moro bigi boi fu en ben go nanga Saul ini a feti. A moro owruwan ben nen Eliab, a di fu tu ben de Abinadab, a di fu dri ben de Sama. 14David ben de a moro yonguwan fu den boi fu Isai. Den dri moro owru brada fu en ben de nanga Saul na a feti. 15Ma dorodoro David ben e gwe fu Saul fu go wei den skapu fu en p'pa na Betlehem.
16A pisten dati, a Filistijnsrudati ben e kon tnapu wakti ala dei, mamanten nanga neti, fotenti dei langa.
17Dan Isai taigi en boi David taki: “Luku dritenti kilo losi karu nanga tin brede dyaso. Tyari den es'esi go gi den brada fu yu na a legrekampu. 18Den tin kasi disi yu mus gi a kapten fu den. Go luku fa den brada fu yu e meki en èn tyari wan sani fu den kon gi mi fu mi kan si tak' den de na libi. 19Den nanga Saul nanga ala den srudati fu Israel de ini a Dal fu den bigi bon e feti nanga den Filistijnsrudati.” 20A tra mamanten David opo frukufruku. A poti wan tra sma fu luku den skapu, a teki ala den sani di en p'pa ben taigi en fu teki, dan a go soleki fa Isai ben komanderi en. A srefi momenti di David doro a legrekampu, den srudati ben e meki babari fu seti densrefi fu den ben hari go feti. 21A legre fu Israel nanga di fu den Filistijnsrudati ben seti densrefi abra nanga abra fu feti. 22David libi den sani di a ben tyari kon na a srudati di ben e sorgu gi a nyanyan fu den srudati, dan a lon go pe den srudati ben tnapu. Di a doro drape, a aksi den brada fu en fa a e go nanga den. 23David ben e taki nanga den brada fu en ete, di a bun fetiman fu den Filistijnsrudati waka kon na fesi. A ben nen Goliat fu a foto Gat. A waka kmoto na mindri fu den Filistijnsrudati dan a bigin taki den srefi sani di a ben e taki aladei. Dan David yere san a taki. 24A heri legre fu Israel lon di den si a man, bika den ben e frede srefsrefi gi en. 25Den srudati fu Israel ben e taigi densrefi taki: “Yu si a man dati, a e kon baka fu afrontu Israel. Kownu o gi a man di man kiri en furu gudu, a o meki a trow nanga en umapikin, èn a o fri a famiri fu en fu den plekti di den abi ini Israel.” 26Dan David aksi den man di ben tnapu na en sei taki: “San o psa nanga a man di o kiri a Filistijnman dati èn puru a syen di de tapu Israel? Suma na a Filistijnman dati di no besnei? A denki tak' a kan afrontu a legre fu a libi Gado?” 27Den srudati taigi en den sani di kownu pramisi fu du gi a man di ben man kiri Goliat. 28Di Eliab, a moro bigi brada fu David, yere taki David e taki nanga den srudati, en atibron srefsrefi. A aksi David taki: “San yu kon du dyaso? Gi suma yu libi den tu skapu drape na baka ini a wei? Mi sabi a don dek'ati fu yu nanga fa yu bemui. Na kon yu kon fu kon luku fa a feti e feti.” 29Ma David piki en taki: “Mi no du noti san no bun. Na wan sani nomo mi aksi.” 30David waka gwe libi en brada dan a go aksi wan tra srudati a srefi sani. Den piki en a srefi sani baka.
31Ma sma ben yere den sani di David ben e aksi èn den go taigi Saul. Dan Saul seni kari David. 32David taigi Saul taki: “No meki no wan sma lasi ati fu a man dati ede. Yu knekti sa go feti nanga en.” 33Ma Saul piki David taki: “Yu no o man feti nanga a Filistijnman dati. Yu yongu ete. A man dati gro kon leki fetiman.” 34Ma David piki Saul taki: “Mi kownu, mi gwenti luku den skapu fu mi p'pa. Te wan lew noso wan beer fufuru wan fu den skapu tyari gwe, 35mi e go na en baka, mi e naki en dan mi e puru a meti ini en mofo. Efu a wani feti nanga mi, mi e grabu en na en gorogoro dan mi e naki en kiri. 36Mi kiri lew, mi kiri beer. A srefi sani o psa nanga a Filistijnman dati di no besnei, fu di a afrontu a legre fu a libi Gado. 37Na MASRA ben ferlusu mi fu den lew nanga den beer, na En sa ferlusu mi tu fu a makti fu a Filistijnman dati.” Dan Saul taigi David taki: “Yu kan go, MASRA sa de nanga yu.” 38Dan Saul gi David den fetikrosi fu en fu a weri. A poti wan kopro fet'ati tapu en ede èn a meki a weri wan kopro dyakti. 39David tai a leribuba nanga a deigri fu Saul na en seibere, tapu den fetikrosi di a ben weri. Dan a pruberi fu waka nanga den, bika noiti bifo a ben du disi. Ne David taigi Saul taki: “Mi no man waka nanga den sani disi, bika mi no gwenti en.” Dan David puru ala den sani na en skin, 40a teki a tiki nanga san a ben e luku den skapu, a suku feifi moi grati ston ini a pikin drei liba, dan a poti den ini a saka di a ben abi na en, a saka pe a ben gwenti poti den ston fu en slinger. A slinger fu en a ben hori na en anu. Na so David waka go miti a Filistijnman.
David e kiri Goliat
41A Filistijnman ben e waka kon miti David tu. A srudati di ben e tyari a schild fu en, ben e waka na en fesi. 42Di a Filistijnman ben man si David bun, a luku en fu en ede go na en futu, ma a ben e si David fu noti fu di a ben yongu ete, wan gesontu moi pikin boi. 43Ne a Filistijnman taigi David taki: “Na si yu e si mi leki wan dagu, taki yu e kon nanga wan tiki na mi tapu?” Dan a fluku David ini a nen fu den gado fu en. 44Baka dati a taigi David taki: “Waka kon doro, dan mi o meki den tingifowru nanga den krasi meti nyan a dedeskin fu yu.” 45Ma David piki en taki: “Yu e kon na mi tapu nanga deigri, lansri nanga wan kron deigri. Ma mi e kon na yu tapu ini a nen fu MASRA fu ala sani, a Gado fu a legre fu Israel, di yu afrontu. 46Tide MASRA o gi yu abra ini mi makti. Mi o kiri yu èn mi o kapu yu ede puru fu yu neki. Tide mi o gi den tingifowru nanga den krasi meti den dedeskin fu den Filistijnsrudati. Dan heri grontapu sa sabi tak' Israel abi wan Gado. 47Ala sma dyaso o ferstan tak' MASRA no abi deigri nanga lansri fanowdu fu ferlusu En pipel. Bika MASRA sabi fa a feti o waka, èn na En o gi yu abra ini wi makti.” 48Di a Filistijnman bigin waka go miti David fu feti nanga en, David lon go na en tapu tu. 49A sutu en anu go ini a saka, a teki wan ston, dan a fringi a ston nanga en slinger go tapu a Filistijnman. A ston naki a man so tranga na en fes'ede tak' a psa go ini a ede èn a man fadon tapu en fesi na gron. 50Na so David wini a Filistijnman nanga wan slinger nanga wan ston. A wini a Filistijnman èn a kiri en sondro tak' a ben abi wan deigri srefi fanowdu. 51Dan David lon go na a Filistijnman, a hari a deigri fu en puru ini a kokro, dan a kapu en ede puru fu en neki. Di den Filistijnsrudati si tak' a dyadya fetiman fu den dede, den lon gwe. 52Dan den srudati fu Israel nanga Yuda dyompo opo. Den meki wan babari dan den lon go baka den Filistijnsrudati te go miti Gat èn go te na den bigi doro fu a foto Ekron. Den dedeskin fu den Filistijnsrudati ben didon tapu a heri pasi, fu Saaraim, go te na Gat nanga Ekron. 53Di den srudati drai kon baka fu a lon di den ben lon baka den Filistijnsrudati, den go teki ala sani puru ini a legrekampu fu den Filistijnsrudati. 54David ben teki a ede fu Goliat, a Filistijnman, tyari go na Yerusalem. Den fetisani fu en, David poti na ini en tenti.
55Saul ben e luku di David ben e go feti nanga a Filistijnman. Dan a ben aksi Abner, a edeman fu a legre, taki: “Abner, suma na a p'pa fu a boi dati?” Abner ben piki en taki: “Mi kownu, mi e sweri na a libi fu yu, mi no sabi.” 56Ma kownu ben taigi en taki: “Go ondrosuku suma na a boi en p'pa.” 57Fa David ben drai kon, baka di a ben kiri a Filistijnman, na so Abner teki en tyari go na Saul. David ben ori a ede fu a man ini en anu ete. 58Dan Saul aksi David taki: “Boi, suma na yu p'pa?” David ben piki en taki: “Mi na a boi fu yu knekti Isai fu Betlehem.”
