1Baka di David ben kba taki nanga Saul, Yonatan firi wan tranga lobi leki mati gi David. A ben kon lobi David leki fa a ben lobi ensrefi. 2Sensi a dei dati Saul hori David na en èn a no meki a drai go moro na en p'pa oso. 3Dan Yonatan meki wan ferbontu nanga David, fu di a ben lobi David leki fa a ben lobi ensrefi. 4Yonatan puru a dyakti di a ben weri dan a gi en na David. A gi David den fetikrosi fu en tu, en deigri, en bo nanga en leribuba.5Ala leisi te David ben e hari go feti a ben e wini den feti, awinsi pe Saul ben e seni en go. Fu dat'ede Saul ben poti en leki edeman fu den srudati. Den srudati nanga den knekti fu Saul ben agri nanga a sani dati.
Saul kon dyarusu tapu David
6Ma baka di David ben wini a Filistijnman èn a legre ben e drai go baka na oso, den umasma fu ala den foto fu Israel ben e singi èn dansi kon miti kownu Saul nanga tamboerijn nanga tra instrumenti. 7Den umasma ben e dansi èn den ben e singi taki:
“Saul ben e kiri dusundusun,
ma David tin dusun tin dusun.”
8Saul no ben lobi a singi srefsrefi, èn en atibron. A prakseri taki: “Den e gi David a grani tak' a kiri tin dusun tin dusun. Ma mi e kisi grani fu dusundusun. Dyonsro den o poti en leki kownu tu.” 9Sensi a dei dati Saul bigin ori David na ai bika a no ben e fertrow en moro.
10A tamara fu en, a takruyeye di Gado ben seni, kon tapu Saul. Dan Saul bigin rigeri ini a oso leki a lasi en ferstan. A ben abi a lansri fu en na ini en anu. Dan David ben e prei na tapu en citer soleki fa a ben gwenti. 11Ne Saul fringi en lansri nanga a prakseri taki: “Mi e spikri David fasi na a ososkin.” Ma te tu leisi David ben man kmoto gi a lansri. 12Dan Saul bigin frede gi David, bika a ben kon ferstan tak' MASRA ben de nanga David, ma A ben gwe libi en. 13Dat' meki Saul no ben wani David moro krosbei fu en. A poti en leki edeman fu wan dusun srudati. Leki edeman fu a legre dati, David ben e go na feti èn a ben e drai kon baka. 14David ben e wini ala den feti fu en, bika MASRA ben de nanga en. 15Di Saul si tak' David ben e wini ala den feti fu en, a ben kon frede moro gi en. 16Ma ala den sma fu Israel nanga Yuda ben lobi David fu di na en ben e go na feti nanga den èn a ben e drai kon baka.
David e trow nanga a umapikin fu Saul
17Dan Saul taigi David taki: “Luku mi moro bigi umapikin Merab dyaso. Mi sa meki yu trow nanga en efu yu sa tan wroko gi mi leki wan dyadya man di e go na fesi ini den feti fu MASRA.” Ma Saul du a sani dati nanga a prakseri tak' ensrefi no ben abi fu kiri David, ma taki den Filistijnsrudati bo kiri en gi en. 18Ma David piki en taki: “Suma na mi nanga den famiri fu mi. A famiri fu mi p'pa no de not'noti na ini Israel fu mi tron a masra fu kownu en umapikin.” 19Ma di a ten ben doro fu Merab trow nanga David, Saul meki a trow nanga wan man fu a foto Mekola, di ben nen Adriyel. 20Ma Mikal, wan fu den tra umapikin fu Saul, ben kon lobi David. Di sma taigi Saul a sani dati, a ben feni en bun. 21Bika Saul ben prakseri na ini ensrefi taki: “Mi o aksi en fu a trow nanga Mikal. Efu a trapu na ini, den Filistijnsrudati o abi a okasi baka fu kiri en.” Ne a taigi David taki: “Wan okasi de baka fu yu trow nanga wan umapikin fu mi.” 22Dan Saul seni wrokoman fu en go na David. Den ben mus taigi en bakabaka tak': “Yu si taki kownu lobi yu? Ala den knekti fu en lobi yu tu. Teki a okasi, trow nanga kownu en umapikin.” 23Di den wrokoman fu Saul go taigi David den sani dati, David piki den taki: “A no wan makriki sani fu trow nanga kownu en umapikin. Mi na wan pôtiman di no de noti.” 24Den wrokoman fu Saul go taigi en san David taki. 25Ne Saul taigi den taki: “Un taigi David tak' kownu no wan no wan tra sani leki kado fu a sma di o trow nanga en umapikin, dan wan hondro fesibuba fu a manpresi fu den Filistijnsma, fu pai den feyanti fu en baka.” A ben de a prakseri fu Saul fu den Filistijnsma kiri David. 26Di den knekti go taigi David san Saul ben wani, David agri fu trow nanga a umapikin fu kownu. Fosi a ten doro di Saul ben poti tak' a wani den sani, 27David nanga den man fu en hari gwe. Den kiri tu hondro Filistijnsrudati dan den tyari den fesibuba fu den gi Saul. Den gi den alamala na kownu, fu a ben kan trow nanga a umapikin fu kownu. Dan Saul gi David en umapikin Mikal leki frow.
28Saul ben kon si trutru taki MASRA ben de nanga David. Èn Mikal, a umapikin fu Saul, ben lobi en. 29Dat' meki Saul ben e kon frede gi David moro nanga moro. Saul ben tan si David leki en feyanti, te leki a dede. 30Ala leisi te den edeman fu den Filistijnsrudati ben kon nanga den legre fu feti, David ben e wini moro feti dan ala den tra knekti fu Saul. A sani dati ben meki David kisi moro bigi nen.
