3Samuel ben dede wan pisten kba. Heri Israel ben low gi en, èn den ben beri en na Rama, a foto pe a ben e libi. Baka dati Saul ben yagi den sma di ben e meki den yeye fu dedesma sori den san de fu kon nanga den sma di ben e aksi den yeye fu dedesma rai, puru ini a kondre. 4Den Filistijnsrudati ben kon na wan, dan den hari go meki den kampu na Sunem. Saul srefi ben kari ala den srudati fu Israel kon na wan, dan den go meki den kampu na a bergi Gilboa. 5Ma di Saul si a legre fu den Filistijnsrudati, a kon frede tak' a ben e beifi. 6Dat' meki a go aksi MASRA san a mus du, ma MASRA no piki en: no na ini dren, no nanga a tumimston fu den priester, èn a no meki no wan profeiti taigi en wan sani tu. 7Ne Saul komanderi den knekti fu en taki: “Un go suku wan uma gi mi di kan meki den yeye fu dedewan sori en san de fu kon. Dan mi o go na en go suku rai.” Den knekti piki Saul taki: “Arki, wan uma e libi na Endor di man meki den yeye fu dedesma sori en sani.” 8Dan Saul weri tra sortu krosi, fu sma no sabi tak' na en, dan a gwe nanga tu fu den man fu en. Di den doro neti drape, Saul aksi a uma taki: “Aksi a yeye fu wan dedesma rai gi mi. Mi o taigi yu suma yu mus kari kon.” 9Ma a uma piki en taki: “Yu no sabi san Saul du? A yagi den sma di e meki den yeye fu dedewan sori den san de fu kon nanga den sma di e aksi den yeye fu dedewan rai, gwe fu a kondre. Dan fu sanede meki yu e suku fu fanga mi fu den kiri mi?” 10Ma Saul sweri gi en na MASRA taki: “Mi e sweri gi yu na a libilibi MASRA tak' noti no o psa nanga yu.” 11Ne a uma aksi en taki: “Suma mi mus kari kon gi yu.” Saul piki en taki: “Kari Samuel kon.” 12Di a uma si Samuel, a bari. Dan a taigi Saul taki: “Fu sanede meki yu bedrigi mi? Yu na Saul!” 13Ma kownu Saul piki en taki: “Yu no abi fu frede, ma taigi mi san yu e si.” A uma piki Saul taki: “Mi e si wan yeye e kmoto ondro a gron.” 14Saul aksi en baka taki: “Fa a tan?” A uma piki: “Na wan owru man di domru ensrefi na ini wan langa dyakti.” Dan Saul kon ferstan tak' na Samuel. Ne a kindi nanga en fesi na gron. 15Dan Samuel aksi Saul taki: “Fu sanede meki yu no e libi mi fu mi rostu? Fu sanede meki yu kari mi kon?” Saul piki taki: “Mi de na ini bigi nowtu. Den Filistijnsrudati kon feti nanga mi, èn Gado gwe libi mi. A no e piki mi moro. A no e meki den profeiti taigi mi wan sani èn no nanga dren tu. Na dat' meki mi kari yu kon, fu yu kan taigi mi san mi mus du.” 16Ma Samuel piki en taki: “Fu sanede meki yu e kon suku rai na mi, now di MASRA gwe libi yu èn tron yu feyanti? 17MASRA du soleki fa A ben meki mi taigi yu kba. A puru a makti leki kownu na yu anu, èn a gi en na wan tra sma. A gi en na David. 18MASRA e du disi nanga yu now fu di yu no du san A ben taigi yu di A ben wani lusu En atibron tapu Amalek. 19Na fu a srefi sani dati MASRA o gi yu nanga den Israelitisma abra ini a makti fu den Filistijnsma. Tamara yu nanga den boi fu yu o de pe mi de, èn MASRA o gi a legre fu Israel abra ini a makti fu den Filistijnsma.” 20Saul skreki so hebi di a yere san Samuel taki, tak' a fadon langalanga na gron a srefi momenti dati. A ben kon firi swaki tu, bika a heri dei nanga a heri neti dati a no ben nyan noti. 21A uma waka go na Saul dan a si tak' a sani ben seki Saul hebi. Ne a taigi en taki: “Luku, yu knekti du san yu ben aksi. Mi du en, ma mi prei nanga mi eigi libi. 22Now mi e aksi yu fu yu du san mi e aksi. Meki mi tyari wan sani gi yu fu yu nyan, fu yu kan kisi krakti baka te yu o gwe.” 23Ma Saul no ben wani. A taki: “Mi no wani nyan noti.” Ma fu di den man nanga san a ben go drape, nanga a uma tan dwengi en, a arki den. Ne a opo fu a gron go sidon tapu a bedi. 24A uma ben abi wan yongu kaw na en oso di a ben kweki kon fatu. Ne a srakti en es'esi. Dan a teki blon, a masi en, dan a baka brede sondro dyesi. 25A uma poti a nyanyan disi gi Saul nanga den man di ben kon nanga en fu nyan. Baka di den nyan, den gwe a srefi neti dati.
