2 Historia 24

₁Yoas ben abi seibi yari di a tron kownu. A tan fotenti yari na makti ini Yerusalem. En m'ma ben nen Sibya èn a ben de fu Berseba. ₂Yoas ben e du san ben bun ini MASRA ai, solanga priester Yoyada ben de na libi. ₃Yoyada teki tu uma gi Yoas, èn a kisi manpikin nanga umapikin nanga den.

₄Baka wan pisten Yoas teki a besroiti fu meki den pisi fu a oso fu MASRA di no ben bun. ₅A kari den priester nanga den Lefitiman kon na wan, dan a taigi den taki: “Un hari go na den foto fu Yuda èn un teki moni na ala den Israelitisma fu a wroko di mus du ala yari na a tempel fu Gado kan du. Un mus du es'esi!” Ma den Lefitiman ben e draidrai. ₆Dat' meki kownu seni kari granpriester Yoyada kon dan a aksi en taki: “Fu sanede yu no sorgu taki den Lefitiman go teki a spesrutu ofrandi ini Yuda nanga Yerusalem, di Moses, a knekti fu MASRA, ben poti taki ala den sma fu Israel mus fu pai en fu un kan sorgu gi a tenti fu a ferbontu? ₇Bika den boi fu Atalya, a ogri-ati uma, ben broko go ini a oso fu Gado èn den teki srefi santa wrokosani fu a oso fu MASRA gi Baal.” ₈Dan kownu komanderi fu den meki wan kisi di den ben mus poti na a doro fu a oso fu MASRA. ₉Baka dati, kownu seni boskopu lontu ini Yuda nanga ini Yerusalem tak' den sma ben mus tyari a spesrutu ofrandi kon di Moses, a knekti fu Gado, ben komanderi den Israelitisma taki den mus du en, di den ben de ini a bigi dreisabana. ₁₀Den edeman nanga a heri pipel ben breiti srefsrefi. Den tyari moni kon na wan, di den go poti ini a kisi, te leki a furu. ₁₁Ala leisi te den Lefitiman ben tyari a kisi go na den man di kownu ben gi a frantwortu fu a moni èn den man disi ben si taki furu moni de na ini a kisi, den ben e seni kari a sekretarsi fu kownu nanga wan man di a granpriester ben seni dan den ben e leigi a kisi. Baka dati a kisi ben go baka na en presi. So a sani ben e go, dei fu dei, èn na a fasi dati den ben piki bun furu moni.

₁₂Dan kownu nanga Yoyada ben e langa a moni gi den fesiman di ben abi a frantwortu fu a wroko na a oso fu MASRA. Den man dati ben yuru man di e kapu ston puru na bergi, temreman nanga smeti fu meki a tempel fu MASRA kon bun baka. ₁₃Dan den wrokoman bigin nanga a wroko èn a wroko ben e go. Den meki den pisi baka di no ben bun na a oso fu Gado leki fa a ben de bifo èn pe a ben de fanowdu, den ben meki kon moro steifi. ₁₄Di a wroko ben kba, den tyari a moni di ben libi go gi kownu nanga Yoyada. Den dati seni meki ala sortu sani gi a oso fu MASRA nanga en: wrokosani di ben de fanowdu gi a wroko nanga fu tyari ofrandi, skarki nanga tra sani fu gowtu nanga solfru.

Solanga leki di Yoyada ben de na libi den sma ben e bron meti leki ofrandi ini a oso fu MASRA. ₁₅Yoyada kon owru srefsrefi, dan a dede. Di a dede, a ben abi wan hondro nanga dritenti yari. ₁₆Den beri en pe den tra kownu ben beri ini a foto fu David, bika a ben du bun sani ini Israel, ini a ai fu Gado nanga gi a oso fu Gado. ₁₇Ma baka a dede fu Yoyada, den edeman fu Yuda go na kownu go boigi gi en. Sensi a ten dati kownu bigin arki den. ₁₈Dan den drai den baka gi a oso fu MASRA, a Gado fu den afo fu den. Den go dini den postu di den ben meki gi kruktu gado nanga den popki fu kruktu gado. Dan Gado strafu Yuda nanga Yerusalem fu a sondu dati. ₁₉Ne MASRA seni profeiti go na den fu meki den drai kon baka na En. Den profeiti warskow den trangatranga, ma den no ben wani yere.

₂₀Ne a Yeye fu Gado meki Sekarya, a manpikin fu granpriester Yoyada, go tnapu fesi a pipel dan a taigi den taki: “Disi Gado e taki: Fu sanede un no e hori unsrefi na den gebod fu MASRA? Fu sanede un no wani fu sani waka bun gi unu? Fu di un drai un baka gi MASRA, meki MASRA drai En baka gi unu tu.” ₂₁Ma den meki mofo fu kiri Sekarya èn den fringi ston kiri en tapu a pren fesi a oso fu MASRA, fu di kownu ben komanderi dati. ₂₂Kownu Yoas no prakseri fa Yoyada ben yepi en nanga lobi, di a kiri Sekarya a manpikin fu Yoyada. Di Sekarya e dede, a taki: “MASRA si èn A sa pai yu fu en!”

₂₃Na a bigin fu a nyun yari, a legre fu Aram ben hari kon feti nanga Yoas. Den doro te ini Yuda nanga Yerusalem, den kiri ala den fesiman fu Israel, dan den seni ala san den ben wini ini a feti gi a kownu fu den na Damaskus. ₂₄A legre fu Aram no ben bigi, ma MASRA meki den wini wan bun bigi legre fu den sma fu Yuda, fu di den sma fu Yuda ben drai den baka gi MASRA, a Gado fu den afo fu den. Na so Yoas kisi en strafu. ₂₅Den Arameesrudati libi Yoas nanga hebi mankeri na baka. Di den gwe, den wrokoman fu en meki mofo fu kiri en, fu di a ben kiri a manpikin fu priester Yoyada. Dan den naki en kiri tapu en bedi. Den beri en ini a foto fu David, ma den no beri en pe den tra kownu ben beri. ₂₆Den man di ben meki mofo fu kiri en ben de: Sabad, a manpikin fu Simat, wan uma fu Amon nanga Yosabad, a manpikin fu Simrit, wan uma fu Moab. ₂₇Den sani fu den manpikin fu Yoas, den sani di Gado seni taigi en furu leisi nanga a meki di a meki a oso fu Gado kon bun baka, skrifi ini a buku di e meki wi ferstan a buku fu den kownu moro bun. En manpikin Amasya teki en presi leki kownu.