A kownu fu Seba kon fisiti Salomo
1A uma di ben de kownu fu Seba, ben yere fu a bigi nen di Salomo ben abi. Dat' meki a go na Yerusalem fu tesi Salomo nanga aksi di no ben makriki fu piki. A go drape nanga bun furu sma nanga kameel di ben e syow spesrei, bun furu gowtu nanga diriston. Di a doro na Salomo, a aksi en ala sani di ben de tapu en ati. 2Salomo piki en tapu ala den aksi fu en. Ala den dipidipi sani a ben tyari kon na krin gi en. 3Di a kownu fu Seba si fa Salomo koni, di a si a kownu-oso tu di a bow, 4a nyanyan di ben de tapu tafra, a fasi fa den wrokoman fu en ben e sidon na tafra, a fasi fa den sma di ben e sorgu gi a nyanyan ben tnapu èn fa den ben e weri, den man di ben e kanti win gi kownu nanga a fasi fa den ben weri nanga den meti di Salomo ben e bron leki ofrandi ini a oso fu MASRA, a fruwondru srefsrefi. 5Dat' meki a taigi kownu taki: “Den sani tru di mi yere ini mi kondre fu yu nanga a fasi fa yu koni. 6Mi no ben e bribi te leki mi kon dyaso èn si nanga mi eigi ai. Ma den no ben ferteri mi afu srefi fu san mi si. A koni nanga a gudu fu yu no de fu marki nanga den tori di mi yere fu yu. 7Den sma di yu e tiri, den knekti fu yu di e dini yu èn di e yere den koni sani di yu e taki, na blesi sma. 8Mi e prijse MASRA, a Gado fu yu, di abi sowan prisiri nanga yu tak' A poti yu tapu a kownusturu, leki kownu fu MASRA, yu Gado. Na fu di Gado lobi Israel èn A wani fu a tan fu têgo, meki a poti yu leki kownu fu tiri a kondre tapu wan bun èn leti fasi.”
9Dan a gi Salomo dritenti-na-siksi hondro kilo gowtu nanga bun furu switismeri sani nanga diriston. Noiti moro so bun spesrei, leki san a kownu fu Seba ben gi kownu Salomo ben de fu feni ini Israel. 10Boiti dati, den knekti fu Huram nanga Salomo di ben e go teki gowtu na Ofir, ben tyari sandel-udu nanga diriston kon tu. 11Nanga a sandel-udu kownu meki trapu gi a oso fu MASRA nanga gi a kownu-oso fu en. A meki citer nanga harp tu gi den singiman. Noiti bifo so wan sani ben de fu si ini Yuda. 12Kownu Salomo gi a kownu fu Seba ala san ben e angri fu abi nanga san a ben aksi. Salomo gi en moro dan san a ben tyari kon gi en. Baka dati a kownu nanga den knekti fu en drai go baka na a kondre fu den.
Den gudu fu Salomo
13A gowtu di Salomo ben e kisi ala yari, ben de tutenti dusun kilo, 14boiti san den bai nanga seriman ben e tyari kon. Ala den kownu fu Arabia nanga den man di kownu ben poti fu tiri den foto, ben e tyari gowtu nanga solfru kon gi Salomo tu.
15Kownu Salomo meki tu hondro bigi schild fu fini gowtu. Ibri schild ben meki fu siksi kilo gowtu. 16A meki dri hondro pikin schild tu fu fini gowtu. Ibriwan fu den ben meki fu wan nanga afu kilo gowtu. Dan kownu poti den ini a oso: Busi fu Libanon. 17Moro fara kownu meki wan bigi kownusturu fu ivoor. Dan a poti lala gowtu na en tapu. 18A kownusturu ben abi siksi tree nanga wan futubangi fu gowtu di ben fasi na a kownusturu. A sturu ben abi tu pisi fu poti yu anu èn sei iniwan fu den pisi fu poti yu anu wan lew ben tnapu. 19Twarfu lew ben tnapu tapu den tree fu a trapu, siksi na a wan sei nanga siksi na a tra sei. Noiti ete sowan kownusturu ben meki ini wan kondre. 20Ala den sani fu dringi fu kownu Salomo ben de fu gowtu. Ala den tra kukru sani fu a oso: Busi fu Libanon ben de fu lala gowtu. Solfru no ben abi warti ini a ten fu Salomo. 21Kownu ben abi sipi di ben e go nanga den knekti fu Huram na Tarsis. Wan leisi na ini dri yari den sipi dati ben e drai kon fu Tarsis nanga gowtu, solfru, ivoor, yapyapi nanga prodokaka.
22No wan kownu fu grontapu ben gudu noso koni moro kownu Salomo. 23Ala den kownu fu grontapu ben e kon na Salomo fu arki a koni di Gado ben gi en. 24Iniwan fu den ben e kon nanga kado: solfru nanga gowtu sani, krosi, fetisani, spesrei, asi nanga buriki. Na so a ben e go ala yari.
25Salomo ben abi fo dusun presi fu poti den asi nanga den fetiwagi fu en. A ben abi twarfu dusun man di ben e tyari den wagi. Dan a poti afu fu den ini den foto di ben meki spesrutu fu poti den wagi, a tra afu ben de na en ini Yerusalem.
26Ala den kownu fu a Eufratliba te go miti a kondre fu den Filistijnsma nanga Egipte ben saka densrefi gi Salomo. 27Kownu ben meki tu taki solfru ben furu leki ston na ini Yerusalem. Sedre-udu ben lai tu leki den figabon di e gro bogobogo ini den kontren na den bergifutu. 28Den asi fu Salomo ben e kmoto fu Egipte nanga ala tra kondre.
A dede fu Salomo
29Den tra sani di psa ini a libi fu Salomo, fu a bigin go te na a kba, skrifi poti ini a buku fu a historia fu a profeiti Natan. Akia fu Silo taki tu fu den ini den sani di Gado ben gi en fu taki èn Yedo, a man di Gado ben e sori sani, taki fu den di Gado ben e sori en sani fu Yerobeam, a manpikin fu Nebat. 30Ini Yerusalem, Salomo tiri heri Israel fotenti yari langa. 31Baka dati a dede èn den beri en ini a foto fu en p'pa David. En manpikin Rekabeam teki en presi leki kownu.
