2 Kownu 24

₁Di Yoyakim ben de na makti, kownu Nebukadnesar fu Babel hari kon na Yuda èn teki en abra. Yoyakim ben abi fu saka ensrefi gi en dri yari langa. Ma baka dati a bigin kaka futu gi Nebukadnesar. ₂Dan MASRA ben e meki grupu fu Kaldeasma, fu Aram, fu Moab nanga fu den Amonitisma broko kon ini a kondre. A ben e seni den fu broko a kondre, soleki fa A ben meki den knekti fu En, den profeiti, ben taki na fesi kba. ₃Iya, na den sani disi miti Yuda, leki fa MASRA ben taki, fu di A ben wani puru den na En tapu fu den sondu di Manase ben du, ₄nanga fu a brudu di a meki lon fu soso. A ben furu Yerusalem nanga brudu di ben lon fu soso. Gi a sani dati MASRA no ben wani gi en pardon.

₅Den tra sani di psa ini a libi fu Yoyakim nanga ala den sani di a du, skrifi poti ini a buku fu a historia fu den kownu fu Yuda. ₆Yoyakim dede èn en manpikin Yoyakin teki en presi leki kownu. ₇A kownu fu Egipte no ben e kmoto moro fu en kondre go feti, bika a kownu fu Babel ben teki ala den presi abra di ben de fu a kownu fu Egipte, fu a Kriki fu Egipte go te na a Eufratliba.

₈Yoyakin ben abi tin-na-aiti yari di a tron kownu. A tan dri mun na makti ini Yerusalem. En m'ma ben nen Nekusta, èn a ben de wan umapikin fu Elnatan fu Yerusalem. ₉Yoyakin ben e du san no bun ini MASRA ai, neleki en p'pa.

₁₀Di Yoyakin ben de na makti, den ofisiri fu kownu Nebukadnesar fu Babel, hari go feti nanga Yerusalem dan den lontu a foto fu alasei. ₁₁Kownu Nebukadnesar fu Babel srefi kon drape di den srudati fu en ben lontu a foto. ₁₂Dan kownu Yoyakin fu Yuda gi ensrefi abra na a kownu fu Babel makandra nanga en m'ma, den knekti fu en, den ofisiri fu en nanga den heihei man fu a kownu-oso. Kownu Nebukadnesar ben de aiti yari na makti di a teki Yoyakin tyari gwe. ₁₃Nebukadnesar teki ala den gudu fu a oso fu MASRA nanga di fu a kownu-oso tyari gwe. A puru a gowtu teki tu fu ala den sani di kownu Salomo fu Israel ben meki gi a tempel fu MASRA, soleki fa MASRA ben taki na fesi kba tak' dati ben o psa. ₁₄Ala den sma fu Yerusalem a teki tyari gwe nanga tranga, ala den ofisiri nanga ala den man di ben fiti fu feti ini a legre, tin dusun sma. A teki ala den temreman tyari gwe tu nanga den smeti. Soso den moro pôti sma fu a kondre a libi na baka. ₁₅Nebukadnesar tyari Yoyakin nanga tranga go na Babel, makandra nanga en m'ma, den uma fu en, den man di ben e wroko ini a kownu-oso nanga den heihei sma fu a kondre. Den alamala a tyari nanga tranga gwe leki strafuman fu Yerusalem go na Babel. ₁₆A kownu fu Babel tyari seibi dusun man di ben fiti fu feti ini a legre, makandra nanga wan dusun temreman nanga smeti nanga tranga go na Babel. Ala den man dati ben tranga èn fiti fu go na feti. ₁₇Dan a kownu fu Babel poti Matanya, a omu fu Yoyakin, leki kownu ini en presi èn a gi en a nen fu Sedekia.

₁₈Sedekia ben abi tutenti-na-wan yari di a tron kownu. A tan erfu yari na makti ini Yerusalem. En m'ma ben nen Hamutal, èn a ben de wan umapikin fu Yirmeya fu Libna. ₁₉Sedekia ben e du san no bun ini MASRA ai, neleki fa Yoyakim ben du. ₂₀Te fu kba MASRA ben kisi sowan atibron tapu den sma fu Yerusalem nanga Yuda taki a drai En baka gi den.

Ma Sedekia ben kaka futu gi a kownu fu Babel.