David e tron kownu fu heri Israel
1Dan den fesiman fu ala den lo fu Israel go na David na Hebron èn den taigi en taki: “Yere, wi nanga yu na wan folku. 2Fosi, srefi di Saul ben de wi kownu ete, na yu ben e hari gwe nanga a legre fu Israel èn tyari den kon baka. Boiti dati, MASRA ben taigi yu taki: ‘Na yu sa sorgu gi Mi pipel Israel, na yu sa de a tiriman fu Mi pipel Israel.’ ” 3Na dat' meki ala den fesiman fu Israel ben kon na kownu na Hebron. Dan drape na Hebron, kownu David meki wan ferbontu nanga den na MASRA fesi. Baka dati den salfu David leki kownu fu Israel. 4David ben abi dritenti yari di a tron kownu èn a tiri a folku fotenti yari. 5Ini Hebron a tiri Yuda seibi yari nanga siksi mun èn ini Yerusalem a tiri heri Israel nanga Yuda dritenti-na-dri yari.
David e teki Yerusalem abra
6Dan kownu David nanga den man fu en hari go na a foto Yerusalem fu go feti nanga den Yebusitisma di ben e libi drape. Ma den Yebusitisma taigi David taki: “Dyaso na inisei yu no o doro! Brenisma nanga lansma srefi o man tapu yu fu yu no kon. David no o man kon na inisei.” 7Ma David teki a tranga foto tapu Sion abra, a presi di den e kari now: a foto fu David. 8David ben taigi den man fu en taki: “A sma di wan wini den Yebusitisma, mus psa na a olo pe a watra e go ini a foto. Mi no lobi brenisma nanga lansma srefsrefi.” Na drape a odo kmoto di e taki: Brenisma nanga lansma no e kon ini a oso.
9Dan David go libi ini a tranga foto èn a kari en: Foto fu David. A meki den bow wan skotu di ben waka fu a Milo go te na a kownu-oso. 10A makti fu David ben e kon bigi moro nanga moro, fu di MASRA, a Gado fu ala sani, ben de nanga en. 11Dan kownu Hiram fu Tyrus seni wantu spesrutu boskopuman fu en go na David. Den ben tyari sedre-udu gi en, temreman nanga man di ben sabi fu wroko nanga ston. Den ben mus bow wan kownu-oso gi David. 12Dan David kon ferstan tak' na MASRA ben poti en leki kownu fu Israel èn tak' na En ben meki a tron wan bigi kownu fu En pipel Israel ede.
13Baka di David kmoto fu Hebron go libi na Yerusalem, a teki uma fu drape libi tu. Ma a no alamala fu den ben abi ala leti leki wan trow-uma. Den uma disi ben kisi moro manpikin nanga umapikin gi David. 14Disi na den nen fu den manpikin fu en di gebore na Yerusalem: Samua, Sobab, Natan, Salomo, 15Yibkar, Elisua, Nefeg, Yafia, 16Elisama, Elyada nanga Elifelet.
Den feti nanga den Filistijnsma
17Di den Filistijnsma yere tak' den Israelitisma salfu David leki kownu fu heri Israel, den hari kon nanga a heri legre fu den fu grabu David. Ma di David kisi dati fu yere a go na a tranga kibripresi ini den bergi. 18Di den Filistijnsrudati ben panya densrefi ini a Refaimdal, 19David aksi MASRA taki: “Mi sa go feti nanga den Filistijnsrudati? Yu sa gi den abra na ini mi makti?” MASRA piki David taki: “Yu kan hari go, bika Mi o gi den abra na ini yu makti. Yu no abi fu frede.” 20Dan David go na Baal-Perasim. Drape a wini den Filistijnsrudati dan a taki: “MASRA broko psa gi mi na ini a legre fu mi feyanti leki fa watra e broko psa sani.” Na dat' meki den e kari a presi dati Baal-Perasim. 21Den Filistijnsrudati ben libi srefi den popki fu den na baka di den ben e anbegi leki gado. Dan David nanga den man fu en teki den tyari gwe.
22Ma den Filistijnsrudati ben fu kon feti ete wan leisi èn den ben panya densrefi baka na ini a Refaimdal. 23Dan David go suku rai baka na MASRA, èn MASRA piki en taki: “No go langalanga na den tapu. Ma un lontu go te na den moerbeibon, dan un broko go na den tapu fu bakasei. 24A srefi momenti te un yere leki wan legre e psa abra den bon, un mus broko go na den tapu bika MASRA e hari go na un fesi fu wini a legre fu den Filistijnsma.” 25David du san MASRA komanderi en, èn a wini den Filistijnsrudati fu Geba go te na Geser.
