Gado e pramisi David wan sani
1Baka di kownu David go libi na ini en kownu-oso èn MASRA ben meki taki fu no wan sei feyanti ben e feti nanga en, 2David taigi a profeiti Natan taki: “Luku, mi e libi na ini wan oso di meki fu sedre-udu, ma a santa kisi fu Gado de na ondro wan tenti.” 3Ne Natan piki kownu taki: “Du ala san yu ati firi fu du, bika MASRA de nanga yu.” 4Ma a srefi neti dati MASRA taki nanga Natan. A taigi en taki: 5“Go na Mi knekti David, dan yu taigi en taki: ‘Na disi MASRA e taki: A no yu na a sma di o meki wan oso gi Mi fu Mi libi. 6Sensi a dei di Mi puru den sma fu Israel ini Egipte te kon miti now, mi no libi na ini wan oso. Wan tenti, wan santa tenti, ben de Mi oso alape a pipel ben e go. 7Di Mi ben e hari fu a wan presi go na a trawan nanga den sma fu Israel, noiti Mi taigi wan fu den edeman fu den lo fu Israel, di Mi ben poti fu tiri Mi pipel, taki: fu sanede un no e bow wan oso fu sedre-udu gi Mi? 8We dan, taigi Mi knekti, taigi David taki: Na disi MASRA fu ala sani, e taki: Na Mi ben puru yu ini a wei, pe yu ben e luku skapu, èn Mi meki yu tron tiriman fu Mi pipel, fu Israel. 9Alape yu ben e go Mi ben de nanga yu. Ala yu feyanti mi puru na pasi gi yu. Mi sa gi yu wan bigi nen tu leki di fu den bigiwan fu grontapu. 10Mi gi Mi pipel, Israel, wan tanpresi. Mi poti den drape fu den kan abi den eigi tanpresi. Den ati no o de na dyompo drape èn ogri-ati folku no sa pina den moro leki fosi, 11leki ini a ten di Mi ben poti krutubakra fu tiri Mi pipel Israel. Mi meki tak' no wan feyanti e feti yu. Mi, MASRA, e taigi yu now taki: na MASRA o bow wan oso gi yu. 12Te yu dede èn den beri yu pe den afo fu yu beri, Mi o meki yu eigi manpikin teki yu presi, èn Mi o meki a de wan tranga kownu. 13Na en o meki wan oso gi Mi, èn Mi o sorgu tak' no wan sma o man puru en leki kownu. 14Mi o de leki wan p'pa gi en, èn a sa de leki wan manpikin gi Mi. Efu a sondu, Mi o fon en nanga wipi, leki fa wan p'pa e du. 15Mi sa tan sori en a bigi lobi fu Mi. Mi no sa tapu fu sori en, soleki fa Mi ben tapu fu sori en na Saul, di Mi ben poti na wan sei fu yu ede. 16Na a famiri fu yu sa de kownu ala ten, èn noiti wan sma sa man puru unu leki kownu.’ ”
17Dan Natan go taigi David ala san a si nanga ala san a yere. 18Dan kownu David go ini a tenti, a go sidon na MASRA fesi dan a begi taki: “Masra MASRA, suma na mi èn suma na mi famiri tak' Yu du disi gi wi? 19Masra MASRA, efu dati no sari, Yu taki tu fa a o de nanga a famiri fu Yu knekti ini wan ten di de fara na wi fesi. Masra MASRA, a no wan gwenti fu Yu fu du den sani disi gi libisma. 20San mi kan taigi Yu moro. Yu sabi Yu knekti Masra, MASRA. 21Fu di Yu e du san Yu e taki èn soleki fa Yu besroiti na ini Yu ati, Yu du ala den bigi sani disi èn taki nanga Yu knekti fu den. 22Masra MASRA, a de leki fa wi yere, Yu bigi, no wan no de leki Yu èn no wan Gado no de boiti Yu. 23Sortu folku de leki Yu pipel Israel? Den na a enkri folku na grontapu di Yu ferlusu fu meki den tron Yu eigi folku, fu Yu kan kisi bigi nen. Yu du bigi èn ferwondru sani gi den. Bika gi Yu pipel di Yu ferlusu puru ini Egipte, Yu yagi tra folku nanga den gado fu den. 24Na so Yu meki Yu folku Israel tron Yu eigi folku fu têgo èn Yu, MASRA, na den Gado. 25We now, MASRA Gado, mi e begi fu Yu hori Yu ala ten na den sani di Yu pramisi mi nanga mi famiri. Meki a psa soleki fa Yu taki. 26Dan sma sa opo Yu nen fu têgo, fu di den o taki: ‘MASRA fu ala sani na a Gado fu Israel.’ Na so wawan den famiri fu mi sa tan leki tiriman fu a kondre. 27Bika Yu, MASRA fu ala sani, Gado fu Israel, ben meki Yu knekti kon sabi taki na Yu o bow wan oso gi en. Na dat' meki a teki a dek'ati fu begi a begi disi. 28We, Masra MASRA, Yu na Gado, san Yu taki Yu e du tu. Na Yu taki den bun sani disi fu Yu knekti. 29Abi prisiri now fu blesi Yu knekti nanga en famiri, fu wi kan tan tiriman fu têgo na Yu fesi. Bika na dati Yu pramisi Masra MASRA èn efu Yu blesi mi nanga mi famiri, a blesi fu Yu san tan na wi tapu fu têgo.”
