2 Samuel 9

₁Wan leisi David aksi: “Wan famiri fu Saul de na libi ete? Efu dati de so, dan mi sa libi bun nanga a sma dati fu Yonatan ede.” ₂A famiri fu Saul ben abi wan knekti di ben wroko gi den. A ben nen Siba. Dan David seni kari en. Di a kon kownu aksi en taki: “Na yu na Siba?” Siba piki taki: “Iya, mi kownu.” ₃Ne kownu aksi en taki: “Yu sabi efu wan sma fu a famiri fu Saul de na libi ete? Efu dati de so, mi wan libi bun nanga a sma dati soleki fa mi ben pramisi Gado.” Siba piki kownu taki: “Wan manpikin fu Yonatan de na libi ete. A lan na ala den tu futu fu en.” ₄Dan kownu aksi en taki: “Pe a de?” Siba piki taki: “A e tan nanga Makir, a manpikin fu Amiyel, na Lo-Debar.”

₅Dan kownu David meki den go teki Mefiboset na a oso fu Makir, a manpikin fu Amiyel, na Lo-Debar. ₆Di Mefiboset, a manpikin fu Yonatan èn granpikin fu Saul, doro na David, a go na tapu en kindi dan a boigi dipi gi en. David aksi en taki: “Na yu na Mefiboset?” A piki taki: “Iya mi kownu, na mi.” ₇Dan David taigi en taki: “Yu no abi fu frede. Mi e gi yu a dyaranti tak' mi o libi bun nanga yu fu yu p'pa Yonatan ede. Mi o gi yu ala den gron di yu granp'pa Saul ben abi, èn bigin fu tide yu o nyan makandra nanga mi.” ₈Mefiboset boigi baka gi David, dan a taigi en taki: “Mi kownu, suma na mi tak' yu e luku fu mi? Wan dede dagu srefi betre moro mi.”

₉Ma kownu seni kari Siba, a knekti fu Saul, dan a taigi en taki: “Ala san Saul nanga en famiri ben abi, mi e gi na a granpikin fu en. ₁₀Yu mus prani den gron fu en makandra nanga den manpikin èn den knekti fu yu. Un mus koti den nyanyan fu a gron fu a granpikin fu yu basi kan abi nyanyan. Ma bigin fu tide Mefiboset, a granpikin fu yu basi, san nyan makandra nanga mi.” Siba ben abi tin-na-feifi manpikin nanga tutenti knekti. ₁₁Dan Siba piki kownu taki: “Masra, mi kownu, yu knekti sa du ala sani san yu komanderi en.” Na so Mefiboset bigin nyan makandra nanga David leki wan fu den manpikin fu kownu. ₁₂Mefiboset ben abi wan pikin boi di ben nen Mika. Ala den sma di ben e wroko na a oso fu Siba kon tron knekti fu Mefiboset. ₁₃Ma Mefiboset srefi ben e libi na ini Yerusalem, bika a ben e nyan makandra nanga kownu. A ben lan na ala tu futu.