Boskopuman 18

₁Dan Paulus kmopo fu Atena go na Korinte. ₂Drape a miti nanga wan Dyusma di ben nen Akwila. Akwila ben gebore ini Pontus, èn a no langa di en nanga en wefi Prisila ben kmopo fu Italiakondre kon, fu di a grankownu Klaudius ben yagi ala Dyusma puru fu Roma. Dan Paulus go luku den. ₃Den sma disi ben e meki tenti, èn fu di Paulus ben e du a srefi wroko, meki a tan na den dan a wroko nanga den.

₄Ibri sabatdei Paulus ben e go ini a Dyukerki pe a ben pruberi fu meki den Dyusma nanga den Grikisma kon ferstan taki a abi leti. ₅Di Silas nanga Timoteus kmopo kon fu Masedonia, Paulus teki ala en ten fu preiki, èn a sori den Dyusma krin taki Yesus na a Kristus. ₆Ma di den no ben wani arki en moro èn den bigin taki takru fu en, Paulus seki a santi puru fu en krosi leki wan marki taki a kba nanga den. Dan a taigi den taki: “Na un eigi fowtu efu un go lasi, a no mi frantwortu moro. Bigin fu now mi o go na den sma di no de Dyu.” ₇Dan Paulus kmopo fu drape go na a oso fu Titius Yustus, di ben de let' na sei a Dyukerki. A man dati no ben de wan Dyu, ma a ben e anbegi Gado. ₈Krispus, di ben de a edeman fu a Dyukerki, nanga ala den sma fu en oso, teki bribi ini Masra Yesus. Furu tra sma fu Korinte kon na bribi tu di den yere a boskopu fu Paulus, dan den teki dopu. ₉Dan wan neti Gado sori Paulus wan sani. A si fa Masra e taigi en taki: “Yu no abi fu frede! Tan taki nanga den sma, yu no mus tan tiri. ₁₀Mi de nanga yu èn no wan sma o man du yu ogri, bika Mi abi furu sma ini a foto disi.” ₁₁So Paulus tan libi wan yari nanga siksi mun drape èn a leri den sma a wortu fu Gado.

₁₂Ma di Galio ben de granman fu Akaya, den Dyusma opo leki wan man dan den grabu Paulus tyari en go na krutu. ₁₃Den taigi Galio taki: “A man disi e pruberi fu meki den sma dini Gado tapu wan tra fasi leki fa a wèt e taki.” ₁₄Dan leki fa Paulus ben wani opo en mofo fu taki, Galio taigi den Dyusma taki: “Un Dyusma, yere. Efu a man disi ben du wan hebi ogri noso wan tra sani di no bun, dan mi ben o teki ten fu arki san un abi fu taki. ₁₅Ma fu di un no e agri abra wortu, nen, nanga san a wèt fu unu e taki, dan un srefi mus luku san un e du. Mi no wani koti krutu fu den sani disi.” ₁₆Dan a yagi den puru na fesi en krutusturu. ₁₇Ne den alamala grabu Sostenes, a edeman fu a Dyukerki, èn den fon en let' fesi a krutusturu. Ma Galio no hati en ede nanga den srefsrefi.

₁₈Paulus tan wan heri pisten ini Korinte ete, dan a gwe libi den bribisma. Makandra nanga Prisila nanga Akwila, a go na a foto Kenkrea. Drape a meki den krebi en ede leki wan marki taki a ben pramisi Gado wan sani. Dan den teki wan sipi fu go na Siria. ₁₉A sipi go fosi na a foto Efese. Drape Paulus prati pasi nanga Prisila nanga Akwila, dan a go na a Dyukerki fu taki nanga den Dyusma. ₂₀Den sma aksi en fu tan moro langa, ma a no ben wani. ₂₁Ma di a e gwe, a taigi den taki: “Efu Gado wani, mi sa drai kon baka na unu.” Dan a kmopo na Efese nanga sipi. ₂₂Di Paulus doro na Sesarea, a go na syoro èn a taki a gemeente odi. Dan a go na Antiokia ini Siria. ₂₃A tan wan pisten drape, dan a gwe baka. A waka lontu ini Galasia nanga Frigia èn a meki den bribisma kon tranga ini a bribi.

₂₄Dan wan Dyusma fu a foto Aleksandria, di ben nen Apolos, kon doro ini Efese. A ben de wan koni man èn a ben sabi a Santa Buku tapu en tin finga. ₂₅A ben kisi leri abra a Nyun Pasi, èn tapu wan krakti fasi a ben e leri sma fin'fini abra Yesus. Ma a ben sabi soso fu a dopu fu Yohanes. ₂₆Sondro frede Apolos bigin taki na ini den Dyukerki. Ma di Prisila nanga Akwila kon yere san a e taki, den teki en tyari go na den oso, dan den leri en den sani fu Gado moro fini. ₂₇Di Apolos ben wani go na Akaya, den bribisma fu Efese gi en dek'ati fu go. Den skrifi wan brifi gi den bribisma drape taki den mus teki en nanga opo anu. Di a doro drape, a ben de wan bigi yepi gi den sma di ben tron bribisma fu di Gado ben sori den En bun-ati. ₂₈Na tapu wan krakti fasi a ben sori den Dyusma na ala sma fesi taki den no abi leti. A ben sori den kmopo fu a Santa Buku taki Yesus na a Mesias.