Boskopuman 24

₁Baka feifi dei a granpriester Ananias nanga wantu fesiman fu a folku doro na granman Feliks fu kragi Paulus. Den ben tyari wan afkati kon nanga den di ben nen Tertulus. ₂Di den seni teki Paulus, Tertulus bigin kragi en taki: “Mi lespeki granman Feliks, wi sabi taki na a fasi fa yu e tiri a kondre meki taki wi e libi ini freide èn dati sani e go moro bun nanga a pipel disi. ₃Disi wi e taki ala leisi na ala sei, èn wi e taki yu grantangi fu ala den sani disi. ₄Ma mi no wani teki furu ten fu yu. Dat' meki mi e begi yu fu sori wi yu bun-ati èn fu arki san wi o taki wan syatu fasi. ₅Bika wi si taki a man disi de leki wan takru siki. A e tyari dyugudyugu na mindri den Dyusma na ala sei fu grontapu. A de wan fesiman fu a grupu di den e kari Nasaretsma. ₆A ben pruberi tu fu pori a tempel fu unu, ma un grabu en. Wi ben wani strafu en soleki fa a wèt fu den Dyusma e taki, ₇ma komandanti Lisias kon ini a tori, èn nanga tranga a puru en na un anu. ₈Dan a taigi den sma di e kragi en fu kon na yu. Te yu taki nanga en fu ala den sani disi, dan yu srefi o yere taki ala den sani di wi taki fu en tru.” ₉Den tra Dyusma agri nanga ala san Tertulus ben taki. Den taki tak' a tru.

₁₀Di granman Feliks sori Paulus dati a abi a okasi fu taki, Paulus taigi en taki: “Mi sabi taki someni yari kba yu e koti krutu gi a pipel disi. Dat' meki mi no e frede fu taki na yu fesi taki mi no fowtu. ₁₁A no moro leki twarfu dei di psa mi go na Yerusalem fu go anbegi Gado. Efu yu aksi, yu srefi sa yere taki na so a de. ₁₂Den no kan taki tak' den si pe mi hari taki nanga sma ini a tempel noso pe mi meki dyugudyugu ini den kerki, noso wan tra presi ini a foto. ₁₃Den no man sori yu tu tak' den sani tru fu san den e kragi mi now. ₁₄Mi e bribi ala sani san de ini a wèt èn san den profeiti ben taki. Ma a de tru taki mi e dini a Gado fu wi afo tapu wan fasi di den e kari a Nyun Pasi. Ma den e si en leki wan falsi leri. ₁₅Mi e ferwakti a srefi sani leki den, taki Gado o meki ala dedesma kon na libi baka: den sma di bun ini Gado ai, nanga den sma di no bun ini En ai. ₁₆Dat' meki mi e du muiti fu abi wan krin konsensi fesi Gado nanga libisma. ₁₇Baka someni yari mi drai go baka na Yerusalem fu tyari moni gi mi pipel èn fu tyari ofrandi gi Gado. ₁₈Di mi ben e du den sani dati, den kon miti mi ini a tempel. Mi ben krin misrefi leki fa a wèt fu den Dyusma e taki. A no de so taki furu sma ben drape, noso taki dyugudyugu ben de. ₁₉Ma wantu Dyusma fu Asia ben drape. Na den dati ben mus kon dya fu kon kragi mi na yu fesi efu den ben abi wan sani nanga mi. ₂₀Noso meki den man disi taki sortu fowtu den feni na mi di mi ben tnapu fesi a grankrutu fu den. ₂₁Kande na fu a wan sani di mi bari, di mi ben tnapu na den fesi taki: ‘Un tyari mi kon na krutu tide fu di mi e bribi taki dedesma o kon na libi baka.’ ”

₂₂Dan granman Feliks, di ben sabi heri bun fu a Nyun Pasi, tapu a krutu. A taigi den taki: “Te komandanti Lisias kon, mi sa koti krutu ini a tori disi.” ₂₃Dan a taigi a ofisiri fu a hori Paulus na straf'oso, ma den no ben mus du nanga en leki fa den e du nanga den tra straf'man. Èn den no ben mus tapu den mati fu Paulus fu kon sorgu en.

₂₄Wantu dei na baka Feliks kon drape nanga en wefi Drusila di ben de wan Dyusma. Dan a seni kari Paulus meki a ferteri en fu a bribi na ini Kristus Yesus. ₂₅Ma di Paulus bigin taki fu san bun ini Gado ai, èn taki un mus hori unsrefi, èn taki Gado o krutu libisma, Feliks kon frede. Dat' meki a taigi Paulus taki: “A nofo fu tide. Te mi abi ten mi sa seni kari yu baka.” ₂₆Ma a srefi ten Feliks ben e howpu taki Paulus ben o gi en moni. Fu dat'ede a ben e seni kari en ala yuru fu taki nanga en. ₂₇Baka tu yari, Porsius Festus tron granman na Feliks presi. Ma fu di Feliks ben wani du den Dyusma wan bun, meki a libi Paulus ini a straf'oso na baka.