Paulus go na a foto Roma
1Di den teki a besroiti fu seni un go nanga sipi na Italiakondre, den gi wan ofisiri di ben nen Yulius a frantwortu abra Paulus nanga wantu tra straf'man. Yulius ben de wan ofisiri ini a grupu srudati di den ben kari: A Grupu fu a Grankownu. 2Dan so wi go ini wan sipi fu Adramitium di ben o go na den lanpresi ini Asia. Di wi e gwe, Aristarkus kon nanga wi. A ben de wan man fu a foto Tesalonika ini Masedonia. 3A tra dei wi doro na a foto Sidon èn Yulius ben de so bun fu gi Paulus okasi fu a go luku den mati fu en fu den sorgu gi en. 4Di wi kmopo fu drape, a winti ben wai kon na a sipi tapu. Fu dat'ede wi seiri psa krosbei fu a eilanti Siprus. 5Na ini a birti fu Silisia nanga Pamfilia, wi koti a se abra go na a foto Mira ini a Lisia. 6Drape a ofisiri feni wan sipi fu a foto Aleksandria di ben o go na Italiakondre. Dan a meki un go ini a sipi dati. 7Wan heri pisten un ben e go safrisafri nomo èn nanga furu muiti un ben man doro ini a birti fu Knidus. Èn fu di a winti ben e wai tranga kon na wi tapu, un seiri go na a zuidsei fu a eilanti Kreta, dan un psa a presi di den e kari Salmone. 8Di un psa Salmone nanga furu muiti, un doro wan presi di den e kari Bun Ankra Presi, krosbei fu a foto Lasea.
9Un ben lasi furu ten kba èn a no ben de wan bun ten moro fu de nanga sipi tapu se, bika a ten pe den Dyusma e faste ben psa kba. Fu dat'ede Paulus warskow den taki: 10“Brada, mi e si taki un kan kisi bigi problema efu un kmopo dyaso fu go moro fara. A kan taki un lasi a sipi nanga den lai, ma a kan tu taki un lasi un libi srefi.” 11Ma a ofisiri ben fertrow a kapten nanga a man di ben tyari a sipi moro leki Paulus. 12Fu di a lanpresi pe den ben de no ben bun fu psa a kowruten, meki moro furu fu den man gi a rai fu kmopo drape go moro fara. Den ben wani meki muiti fu doro na Feniks fu psa a kowruten drape. Feniks ben de wan lanpresi na Kreta èn wan sipi ben kan doro drape fu zuidwest nanga fu noordwest sei.
13Di a winti bigin wai safri kmopo fu zuidsei, den man prakseri taki den ben o man du san den ben wani du. So den lusu a ankra èn den seiri krosbei fu a syoro fu Kreta. 14Ma no langa baka di den lusu, wan bun hebi winti bigin wai di den ben kari a Noordoost Winti. 15A winti dati bigin hari a sipi e tyari gwe, èn fu di un no ben man drai a sipi, meki un libi en gi a winti. 16Di un doro na a pikin eilanti Klauda na a sei pe a winti no ben wai so tranga, un ben abi furu muiti ete fu un no lasi a pikin boto. 17So den hari en kon ini a sipi. Dan den meki titei waka ondro a sipi kon na loktu fu tai den planga fu en hori na wan. Baka dati den saka den seiri fu a watra tyari a sipi. Bika den ben frede taki a sipi ben kan fasi tapu den santi-bangi fu Sirta. 18A winti ben e rigeri srefsrefi. Dat' meki a tamara fu en den bigin trowe den lai go ini a se. 19A di fu dri dei den srefi trowe sani fu a sipi, soleki seiri nanga titei. 20Wan lo dei son noso stari no ben de fu si èn a winti ben tan wai tranga. Te fu kba un no ben abi howpu moro taki un ben o feni yepi.
Paulus gi den man dek'ati
21Someni dei langa den man no ben nyan. Dan Paulus go tnapu na den mindri èn a taigi den taki: “Brada, efu un ben arki mi fu no seiri kmopo fu Kreta, dan den problema disi no ben miti unu èn un no ben lasi den sani. 22Ma mi e begi unu now fu no lasi ati, bika no wan fu unu o lasi un libi. A sipi wawan o lasi. 23Mi na fu Gado èn mi e dini En. A neti di psa wan engel fu En kon na mi, 24dan a taigi mi taki: ‘Paulus, yu no abi fu frede, bika yu mus tnapu fesi a grankownu. Luku, fu yu ede Gado sa kibri a libi fu ala den sma di de ini a sipi nanga yu.’ 25Brada, dat' meki un no mus lasi ati, bika mi e bribi Gado. Ala sani sa waka leki fa A seni taigi mi. 26Ma a sipi o go fasi na tapu wan eilanti.”
27A ben de tin-na-fo dei kba di un ben lasi pasi tapu a se fu Adria. Dan mindrineti so den sipiman ben kisi a firi taki un de krosbei fu wan syoro. 28Dat' meki den saka wan pisi loto na wan titei go ini a watra fu marki o dipi a se ben de drape. Den marki taki a watra ben dipi dritenti-na-siksi meter. Pikinso moro fara den marki tutenti-na-seibi meter. 29Dan den bigin frede taki a sipi o naki panya na den bigi ston ini a watra. Fu dat'ede den saka fo ankra na bakasei fu a sipi go ini a watra. Dan den bigin begi fu dei broko. 30Ma den sipiman ben wani lowe kmopo fu a sipi. Den saka a pikin boto ini se dan den du leki den ben o go saka ankra na fes'sei fu a sipi. 31Ne Paulus taigi a ofisiri nanga den srudati taki: “Efu den man disi no tan ini a sipi, un no o tan na libi.” 32So den srudati kapu den titei fu a pikin boto, meki a fadon go ini se. 33Pikinso fosi dei broko Paulus taigi den alamala tak' den mus nyan. A taigi den taki: “Na tin-na-fo dei kba di un e sidon e wakti nomo sondro fu un nyan wan sani. 34Ma mi e taigi unu fu un nyan, bika un abi en fanowdu fu tan na libi. Not'noti sa psa nanga no wan fu unu.” 35Di Paulus taki so, ensrefi teki brede èn a taki Gado tangi let' fesi den alamala. Dan a broko en èn a bigin nyan. 36Ala den man kisi dek'ati èn den bigin nyan tu. 37Wi ben de nanga tu hondro nanga seibitenti-na-siksi sma tapu a sipi. 38Baka di den nyan te den bere furu, den trowe a graan go ini se fu a sipi kon moro lekti.
39Di dei broko den si a syoro, ma den no ben sabi na sortu kondre den ben de. Dan den si wan presi pe santi ben de. So den teki a besroiti fu tyari a sipi go na syoro drape efu a ben man. 40Den kapu den titei, libi den ankra ini a watra. Den lusu den titei nanga san den ben tai a stuur, dan den opo a fes'sei seiri baka fu a winti tyari a sipi go na a syoro. 41Ma a sipi kon fasi tapu wan santi-bangi. A fesi pisi no ben man beweigi srefsrefi moro. Dan den tranga skwala naki a bakasei pisi broko. 42Den srudati ben wani kiri ala den straf'man fu no wan fu den swen gwe. 43Ma a ofisiri no meki den du dati fu di a ben wani taki Paulus mus tan na libi. Dan a komanderi taki den sma di ben sabi swen ben mus dyompo fosi fu swen go na syoro. 44Den tra sma ben mus teki planga noso tra pis'pisi fu a sipi fu doro syoro. Na so den alamala doro bun na syoro.
