Kownu Nebukadnesar e gi Gado grani
1Kownu Nebukadnesar ben seni wan boskopu go na ala sma na grontapu, awinsi fu sortu folku den ben kmoto noso sortu tongo den ben e taki. A boskopu ben taki so: Mi e winsi unu freide nanga koloku.
2Mi feni en wan bun sani fu ferteri unu fu den bigi sani fu a Moro Hei Gado, fu den wondru di mi si nanga mi eigi ai. 3Bigi sani Gado e du èn den wondru fu En no abi marki. A e tan kownu fu têgo. Noiti wan kba sa kon na a makti fu en.
4Mi, Nebukadnesar, ben e libi switi fu mi ini mi kownu-oso. Ala sani ben e go mi bun. 5Ma wan leisi di mi didon e rostu, mi kisi wan takru dren. Mi ben e si fa a wan sani baka a trawan e psa na mi fesi, èn den ben e meki mi bruya. 6Dan mi taigi den fu den kari ala den koniman fu Babel kon fu taigi mi san a dren wan taki. 7So den lukuman, den bonuman, den kaldeaman nanga den man di e koti karta, kon. Mi ferteri den a dren, ma den no ben man taigi mi san a dren wani taki. 8Te fu kba Danyel, di ben e tyari a nen fu mi gado Beltesasar, kon na mi. A yeye fu den santa gado e libi ini en. Dan mi ferteri en a dren. 9Mi taigi en taki: “Beltesasar, edeman fu den koniman, mi sabi taki a yeye fu den santa gado e libi ini yu. Ala kibritori yu man tyari kon na krin. Taigi mi san ala den sani di mi si ini mi dren wan taki. 10Di mi didon e rostu, mi si ini mi dren wan bigi bon di ben tnapu leti mindri fu grontapu. 11A bon ben tranga èn a ben e gro moro nanga moro, taki a ben miti heimel. Ala presi na grontapu sma ben man si a bon disi. 12Den wiwiri fu a bon ben moi fu si èn a ben abi someni froktu taki ala sma ben man nyan fu en. Den meti ben e suku kowrupe na en ondro èn den fowru di e frei na loktu ben meki den nesi ini den taki fu en. Ala libisani ben e kisi den nyanyan fu en. 13Mi si moro sani ini mi dren. Mi si wan waktiman, wan santa engel, saka kmoto fu heimel. 14A bari nanga tranga sten: ‘Un kapu a bon. Kapu den taki, puru den wiwiri èn trowe den froktu. Yagi den meti gwe di suku kowrupe na en ondro, nanga den fowru di de tapu den taki. 15Ma un mus libi a tompu nanga den rutu tnapu na mindri a grasi. Un mus tai en hori nanga wan banti fu isri nanga kopro. A dow fu heimel sa nati en, èn a sa nyan grasi fu a wei makandra nanga den meti. 16Meki a lasi en ferstan, meki a tyari ensrefi leki wan meti. Disi sa tan seibi yari so. 17Disi na a besroiti di wi leki waktiman teki. Disi na san wi, den santa engel, taki tak' musu psa. Dan so libisma sa kon sabi taki na a Moro Hei Gado abi fu taki abra den kownu fu grontapu. Suma a wani a e poti leki kownu. Srefi a sma di trawan e si fu noti.’
18Na disi mi, kownu Nebukadnesar, si ini mi dren. Ne mi taki: ‘Beltesasar, taigi mi san a dren wan taki. No wan fu den koniman ini a kondre di mi e tiri leki kownu man du dati. Ma yu man bika a yeye fu den santa gado e libi ini yu.’ ”
19Danyel, di den e kari Beltesasar tu, ben bruya èn a ben tnapu wan pisten nanga opo mofo. Ne kownu taki: “Beltesasar, san a dren wan taki no mus bruya yu.” Danyel piki taki: “Kownu, mi winsi taki a dren nanga san a dren wan taki sa miti den feyanti fu yu. 20A bigi bon di yu si, di e miti heimel èn di de fu si na heri grontapu 21nanga en moi wiwiri nanga furu froktu taki ala sma ben man nyan fu en, a bon dati pe meti e suku kowrupe èn pe fowru e meki den nesi, 22kownu, yu na a bon dati. Yu kon bigi srefsrefi. A makti fu yu e doro heimel èn yu e tiri heri grontapu te na de moro fara uku. 23Kownu, yu ben si fa wan waktiman, wan santa engel, ben saka kmoto fu heimel dan a taki: ‘Kapu a bon trowe meki a pori. Ma un mus libi a tompu tnapu ini a grasi. Un mus tai en hori nanga wan banti fu isri nanga kopro. A dow fu heimel sa de watra gi en. A sa libi na mindri den meti. Seibi yari langa disi o de so.’ 24Kownu, disi na san a dren wan taki. Na disi a Moro Hei Gado poti fu psa nanga kownu, mi basi. 25Libisma o yagi yu puru na den mindri. Na mindri den meti yu o tan. Yu o nyan grasi leki den kaw èn a dow fu heimel sa nati yu. Seibi yari langa disi o de so, te leki yu srefi taki tak' na a Moro Hei Gado abi fu taki suma e tron kownu èn A e poti leki kownu suma A wani. 26Den taki tak' a tompu mus tan tnapu. Disi wan taki tak' yu o tron kownu baka èn yu o tan kownu, a momenti di yu taki tak' na Gado na heimel abi ala makti. 27Dat' meki mi o gi yu rai kownu, di yu no mus poti na wan sei. Du bun now, prefu yu e du ogri. Sorgu gi den pôtiwan prefu yu du kruktudu. Efu yu du dati dan a o go bun nanga yu.”
28Disi na san miti kownu Nebukadnesar. 29Twarfu mun baka dati, a ben e koiri tapu a balkon ini en kownu-oso na Babel. 30Dan a taki: “Luku fa a foto Babel bigi. Na mi bow en nanga a makti di mi abi, meki a tron a mamafoto fu kondre di mi e tiri leki kownu. Dan so sma kan gi mi grani leki kownu.” 31A no ben kba taki ete di wan sten taki kmoto fu heimel taki: “Disi na san mi mus taigi yu kownu Nebukadnesar. Yu no sa de kownu moro langa. 32Libisma o yagi yu puru na den mindri. Na mindri den meti yu o tan. Grasi den o gi yu fu nyan leki den kaw. Seibi yari langa disi o de so, te leki yu taki tak' na a Moro Hei Gado abi fu taki suma e tron kownu èn a e poti leki kownu suma a wani.” 33A srefi momenti dati den sani psa san a sten ben taki. Libisma yagi en puru na den mindri. A ben e nyan grasi leki den kaw èn dow ben e nati en skin. En wiwiri ben kon langa leki den wiwiri fu wan aka èn en nangra ben kon gersi fowru nangra.
34Di den seibi yari psa, dan mi Nebukadnesar luku go na heimel èn mi kisi mi ferstan baka. Mi taki a Moro Hei Gado tangi. Mi prijse en. Mi gi grani na a wan di e libi fu têgo. A e tan kownu fu têgo. Noiti wan kba sa kon na a makti fu en. 35Libisma na grontapu na noti na en fesi, awinsi o suma den de, awinsi ope den e tan. A e tiri den makti fu heimel nanga den libisma na grontapu. Suma o man hori En anu fu A no du san A wani du? Suma o man aksi En fu A gi frantwortu? 36A srefi momenti di mi kisi mi ferstan baka, mi kisi mi grani nanga a lespeki tu di sma ben abi gi mi. Mi ben tron kownu baka nanga ala mi makti èn nanga ala mi krakti. Den man di ben e gi mi rai nanga den heihei man fu a kondre ben e kon baka na mi. Den ben e teri mi leki kownu baka èn mi ben kisi moro makti leki bifo. 37Now mi, Nebukadnesar, e prijse a Kownu fu heimel. Mi e gi en grani nanga bigi nen. Den sani di A e du, A e du bun. A e du den nanga leti. A e broko den sma saka di e opo densrefi.
