Kownu Belsasar no e lespeki Gado
1Kownu Belsasar ben gi wan bigi fesa pe a ben kari sowan dusun fu den heihei man fu a kondre kon. A ben e dringi win makandra nanga den sma dati. 2Di a win ben e bigin wroko, Belsasar taigi den sma fu tyari den gowtu nanga den solfru kan kon di en afo Nebukadnesar ben teki puru ini a tempel na Yerusalem. Den sma ben mus tyari den kon fu kownu dringi ini den, makandra nanga den heihei man fu a kondre, den trow frow fu en nanga den tra umasma di a ben abi leki frow tu. 3Dan den sma tyari den kan kon di den ben tyari kmoto fu a tempel ini Yerusalem. Ne kownu nanga den heihei man fu a kondre, den trow frow fu en nanga den tra umasma di a ben abi leki frow tu, teki den kan dringi. 4Di den ben e dringi a win, den ben e taki fa den gado fu den bigi, di ben meki fu gowtu, solfru, kopro, isri, udu nanga ston. 5A srefi momenti dati den finga fu wan anu ben de fu si di ben e skrifi na a ferfi na a sei planga fu a kownu-oso, leti abra den kandra di ben anga na loktu. Di kownu si taki den finga e skrifi wan sani na a sei planga, 6en fesi kenki kloru èn a no ben sabi sa a ben mus prakseri. A no ben abi krakti moro ini en futu èn en kindi ben e beifi. 7Ne a bari taki den mus seni teki den bonuman, den Kaldeaman nanga den man di e koti karta kon. Dan kownu taigi den koniman fu Babel taki: “A sma di man leisi a sani disi èn di man taigi mi san a wani taki, sa kisi wan moi lila krosi. Den sa anga wan gowtu keti na en neki èn a sa de a di fu dri man di sa abi fu taki ini a kondre disi.” 8Ma no wan fu den koniman fu kownu ben man leisi san skrifi na a sei planga èn den no ben man taigi kownu san a ben wani taki. 9Disi meki taki kownu Belsasar kon bruya moro. En fesi ben kon weti. Den heihei man srefi no ben sabi san fu taki.
10Di a m'ma fu kownu yere san psa nanga kownu nanga den heihei man, a go na ini a kamra pe a fesa ben e hori. Dan a taigi kownu taki: “Kownu, mi e winsi yu langa libi. A no de fanowdu fu yu bruya so taki yu fesi kenki kloru. 11Wan man de ini a kondre di yu afo, kownu Nebukadnesar, ben poti leki edeman fu den lukuman, den bonuman, den Kaldeaman nanga den man di e koti karta. A yeye fu den santa gado e libi ini en. Di yu afo ben de na libi ete, a man dati ben abi wan krin ferstan, a ben sabi sani èn a ben koni leki wan gado. 12Na Danyel mi e taki. Yu afo ben gi en a nen fu Beltesasar. Fu di a ben denki srapu, èn fu di a ben abi furu sabi nanga ferstan, a ben man puru dren, tyari kibritori kon na krin èn puru laitori. Seni kari Danyel, a sa taigi yu san a sani wani taki.”
13Dan de tyari Danyel wantron go na kownu. Ne kownu taki: “Na yu na Danyel, wan fu den man di mi afo, a kownu, tyari leki srafu kmoto fu Yuda? 14Mi yere taki a yeye fu den gado e libi ini yu, sosrefi taki yu ede krin, taki yu abi ferstan èn taki yu koni srefsrefi. 15A de so taki mi seni kari den koniman nanga den bonuman kon fu den leisi san skrifi na a sei planga èn fu den taigi mi san a wani taki. Ma den no man du dati. 16Mi yere fu yu taki yu man puru dren nanga laitori. Efu yu man leisi san skrifi èn yu taigi mi san a wani taki, dan yu sa kisi wan lila krosi fu weri. Den sa weri wan gowtu keti gi yu na yu neki èn yu sa de a di fu dri man di abi fu taki san e psa ini a kondre.”
17Danyel piki taki: “Kownu, yu kan hori yu kado noso yu kan gi den na wan tra sma. Ma mi sa leisi san skrifi dan mi taigi yu san a wan taki. 18Kownu, na a Moro Hei Gado ben poti yu afo Nebukadnesar leki kownu, a gi en grani, A opo en, èn a meki sma lespeki en. 19A makti di Gado ben gi en ben meki taki ala sma ben e beifi gi en, awinsi fu sortu folku den ben kmoto noso sortu tongo den ben e taki. Efu a ben wani kiri wan sma, a ben e kiri en. Efu a ben wani wan sma tan na libi, a ben e meki a tan na libi. A ben e opo suma a wani èn a ben e broko saka suma a wani. 20Ma dan a bigin opo en borsu èn a bigin tranga en ati. So Gado puru en leki kownu fu di a ben kisi heimemre èn a lasi ala grani di a ben abi. 21Libisma no ben wani en na den mindri moro. A ben kon gersi wan meti. A ben e tan na mindri den werder buriki. A ben e nyan grasi leki den kaw èn a dow fu heimel ben e nati en skin. Na so a ben mus libi te leki a taki tak' na a Moro Hei Gado abi fu taki suma e tron kownu èn a e poti suma a wani leki kownu. 22Belsasar, yu na en manpikin, èn aladi yu sabi ala den sani disi yu no saka yusrefi. 23Yu abi heimemre èn yu kaka futu gi a Kownu fu heimel. Yu seni teki den kan fu a tempel fu en dan yu, makandra nanga den heihei man, den trow frow fu yu nanga den tra umasma di yu abi leki frow, dringi ini den. Yu ben taki fa den gado fu solfru, gowtu, kopro, isri, udu nanga ston, bigi. Gado di no e si, di no e yere èn di no abi ferstan. Ma yu no gi grani na a Gado di e sorgu taki yu e bro èn taki yu man du ala den sani di yu e du. 24Dat' meki a seni a anu kon di skrifi a skrifi disi poti. 25Disi na san skrifi: Mene, mene, tekel ufarsin. 26Èn na disi a wani taki: Mene – Gado teri olanga yu de kownu èn A tyari wan kba kon na en. 27Tekel – Gado poti yu tapu a wegi èn yu ben lekti tumsi. 28Peres – Gado prati a kondre di yu e tiri leki kownu èn A o gi en na den Meden nanga den Persen.”
29Dan Belsasar taigi den sma fu weri wan lila krosi gi Danyel. Den ben mus weri wan gowtu keti na en neki èn den ben mus meki ala sma sabi taki en ben de a di fu dri man di ben abi fu taki ini a kondre. 30A srefi neti dati den kiri Belsasar, a kownu fu den Kaldeasma.
