Deuteronomium 12

₁Disi na den sani di un mus tan du, nanga den sani na san un mus tan hori unsrefi finifini ini a kondre di MASRA, a Gado fu den afo fu unu, gi unu taki na fu unu, solanga un de na grontapu.

₂Den folku fu a kondre di un o go teki abra, ben e dini den gado fu den tapu hei bergi, tapu pikin bergi nanga ondro ala bon di lai wiwiri. Un mus broko ala den presi dati pis'pisi. ₃Un mus broko den altari fu den, naki den ston fu den gado broko di den poti tnapu, bron den postu fu den gado fu den èn un mus kapu den ston noso udu popki fu den kruktu gado fu den trowe. Sma no mus memre den srefsrefi moro na den presi dati. ₄Un no mus dini MASRA, un Gado, a fasi dati. ₅Un sa go na a presi di MASRA, un Gado, sori na mindri fu den lo fu unu, taki na drape A wani libi èn taki na drape A wani fu un memre En nen. Drape un sa suku En. ₆Drape un sa tyari den sani di mus bron leki ofrandi, den meti di mus srakti leki ofrandi, a tin prosenti di un mus gi Gado, den sani di un wani gi Gado leki kado, den sani di un pramisi fu gi Gado leki ofrandi, den sani di un wani gi fri leki ofrandi, nanga den fosi pikin fu den kaw, skapu nanga krabita fu unu. ₇Drape yu nanga den ososma fu yu sa nyan na fesi MASRA, un Gado, èn un sa prisiri fu den blesi nanga san MASRA, un Gado, blesi unu ini ala den sani di un du.

₈Un no sa du moro leki fa wi e du now, taki ala sma e tyari en ofrandi leki fa a wani. ₉Un e du en so now, fu di un no doro na a presi ete di MASRA, un Gado, o gi unu taki na fu unu, a presi pe un kan rostu. ₁₀Ma te un koti a Yordanliba abra, te un e libi ini a kondre di MASRA, un Gado, o gi unu taki na fu unu, te A meki taki fu no wan sei den feyanti fu unu wan feti nanga un moro, èn taki un kan libi sondro frede, ₁₁dan un mus go na a presi di MASRA, un Gado, sori unu taki na drape un mus memre En nen. Drape un mus tyari ala den sani di mi e komanderi unu. Den sani di mus bron leki ofrandi, den meti di mus srakti leki ofrandi, a tin prosenti di un wani gi Gado, den sani di un wani gi Gado leki kado nanga ala den spesrutu sani di un pramisi fu gi MASRA leki ofrandi. ₁₂Un sa prisiri drape na MASRA fesi. Unu nanga den manpikin fu unu, den umapikin, den mansrafu, den umasrafu nanga den sma fu a lo fu Lefi, di e libi ini a foto fu unu. Bika Gado no gi den sma fu a lo fu Lefi wan pisi fu a kondre leki unu, taki na fu den.

₁₃Dat' meki un mus luku bun taki un no bron meti leki ofrandi na ibri presi pe un wani. ₁₄Un sa bron den ofrandi na a spesrutu presi di MASRA sori unu na mindri fu den lo fu unu. Drape un sa bron den ofrandi èn drape un sa du ala den sani di mi komanderi unu. ₁₅Efu na fu nyan, dan kan un srakti someni leki un man, na a fasi fa MASRA, un Gado blesi unu. Un kan srakti awinsi pe un e libi. Ala sma, den wan di krin nanga den wan di no krin, kan nyan fu den meti dati, leki fa den bo nyan a meti fu wan dia. ₁₆Ma un no sa nyan a brudu. A brudu un mus kanti trowe na gron leki fa un bo kanti watra trowe. ₁₇Pe un e libi, drape un no sa nyan a tin prosenti fu a karu, a win nanga a oli fu unu. Drape un no sa nyan den fosi pikin fu den kaw, skapu nanga krabita fu unu. Sosrefi un no sa nyan fu den sani di un pramisi fu gi Gado leki ofrandi, den sani di un wani gi fri leki ofrandi noso den sani di un wani gi Gado leki kado. ₁₈Na a presi di MASRA, un Gado, sori un spesrutu fu du dati, na drape un sa nyan den na fesi fu MASRA, un Gado. Unu nanga den manpikin fu unu, den umapikin, den mansrafu, den umasrafu nanga den sma fu a lo fu Lefi, di e libi ini a foto fu unu. Un sa prisiri na fesi fu MASRA, un Gado, fu ala sani di un ben du. ₁₉Ma solanga un e libi un mus sorgu taki un no fergiti den sma fu a lo fu Lefi.

₂₀MASRA, un Gado, o meki a kondre fu unu kon moro bigi, leki fa A pramisi. Te A du dati èn un wani nyan meti fu di un lostu en, un kan nyan someni leki un wani. ₂₁Efu a presi di MASRA, un Gado, sori un fu un memre En nen fara tumsi gi unu, dan un kan srakti fu den kaw, den skapu nanga den krabita, di MASRA, gi unu. Un kan srakti èn nyan someni leki un wani, ma un mus du en leki fa mi taigi unu taki un mus du en. ₂₂Un kan nyan leki fa un bo nyan a meti fu wan dia. Den wan di krin nanga den wan di no krin kan nyan fu en. ₂₃Ma un sorgu taki un no nyan brudu, bika a brudu na libi èn un no sa nyan meti di abi libi ete ini en. ₂₄Un no sa nyan en. Un sa kanti en trowe na gron leki fa un bo kanti watra trowe. ₂₅Un no sa nyan en. Dan a sa go bun nanga unu nanga den bakapikin fu unu, efu un du san bun ini MASRA ai. ₂₆Den sani di un ben poti aparti fu gi Gado, nanga den sani di un pramisi fu gi Gado leki ofrandi, un mus tyari go na a presi di MASRA ben sori unu. ₂₇Den meti di mus bron leki ofrandi, a meti fu den nanga a brudu, mus bron tapu a altari fu MASRA, un Gado. A brudu fu den meti di un srakti leki ofrandi un mus kanti tapu a altari fu MASRA, un Gado, ma un kan nyan a meti fu en. ₂₈Un mus arki ala sani bun san mi e taigi un fu du. Dan fu têgo a sa go bun nanga unu, nanga den bakapikin fu unu, efu un du san bun ini a ai fu MASRA, un Gado.

₂₉MASRA, un Gado, o puru den folku na pasi fu a kondre pe un e hari go. Te un teki a kondre abra èn te un e libi ini a kondre fu den, ₃₀un mus luku bun taki den no kori unu fu du san den ben e du. No go suku den gado fu den. No aksi yusrefi taki: “Fa den folku disi ben e dini den gado fu den?” Na so un wani du en tu. ₃₁Un no mus dini MASRA, un Gado, a srefi fasi. Bika ala den sani di den ben e du gi den gado fu den, na sani di MASRA no lobi srefsrefi. Na wan groskin sani gi En. Den ben e bron den manpikin nanga den umapikin fu den srefi gi den gado fu den.

₃₂Un mus hori unsrefi bun na ala sani di mi komanderi unu. Un no sa poti noti moro, èn un no sa puru noti fu den tu.