A fasi fa den sma fu Israel no ben mus low
1Un na pikin fu MASRA, un Gado. Un no sa koti marki ini un buba noso piri un fes'ede te wan sma fu unu dede. 2Bika un na wan folku di poti aparti gi MASRA. Na unu MASRA teki na mindri fu ala tra folku di e libi na grontapu, fu de En eigi folku.
Den sani di bun fu nyan nanga den sani di no bun fu nyan
3Un no sa nyan noti san de wan groskin sani ini Gado ai.
4Disi na den meti di un kan nyan: a kaw, a skapu nanga a krabita, 5den difrenti sortu dia, den difrenti sortu stonbokoboko, nanga a werder skapu. 6Moro fara ala meti fu san a fesi futu priti na tu. A fesifutu no mus priti afu nomo èn den mus de meti di e nyan, dan baka dati den en kaw a nyanyan fu a di fu tu leisi. 7Disi na den meti di un no mus nyan awinsi den fes'futu priti na tu noso awinsi den na meti di e nyan, dan baka dati den e kaw a nyanyan fu a di fu tu leisi. A kameel, a hei nanga a klipdas. Den meti disi e nyan dan den e kaw a nyanyan fu a di fu tu leisi, ma den fes'futu fu den no priti tu. Un mus si den leki meti di no krin. 8Un sa si a agu tu leki wan meti di no krin, bika en fes'futu priti na tu, ma a no e nyan dan a e kaw a nyanyan fu a di fu tu leisi. Un no sa nyan a meti fu en. Un no sa fasi a dedeskin fu en tu.
9Fu ala sani di e libi na ini watra, disi na den wan di un kan nyan: un kan nyan ala sani di abi vin nanga buba. 10Ma un no sa nyan noti di no abi vin noso buba. Un sa si den sani dati leki sani di no krin.
11Un kan nyan ala fowru di krin. 12Ma disi na den wan di un no sa nyan: den difrenti sortu aka, 13den difrenti sortu tingifowru nanga den difrenti kawfutuboi. 14Den difrenti sortu blaka fowru di den e kari raaf. 15A struisfowru, a meeuw nanga den difrenti sortu sperwer. 16Den difrenti sortu owrukuku. 17A pelikaan nanga a aalscholver. 18A ooievaar, den difrenti sortu sabaku, a hop nanga a fremusu. 19Ala den pikinpikin sani tu di abi frei, un sa si leki sani di no krin. Un no sa nyan den. 20Un kan nyan ala fowru di krin.
21Un no sa nyan wan dede meti. Bika un na wan folku di poti aparti gi MASRA, un Gado. Un kan gi en na den doroseisma di e libi na un mindri noso un kan seri en gi wan doroseisma. Un no sa bori wan pikin skapu tu ini a merki fu en eigi m'ma.
Tin prosenti
22Ala yari un sa poti tin prosenti fu ala sani di un koti na ini un gron aparti. 23Un sa nyan a tin prosenti fu a karu, a win, a oli nanga den fosi pikin fu den kaw, den skapu nanga den krabita fu unu, na fesi fu MASRA, un Gado, na a presi di A sori unu taki na drape A wani fu un memre En nen. A fasi disi un e leri fu lespeki MASRA, un Gado, un heri libi langa. 24Efu a pasi langa tumsi gi unu èn efu MASRA, un Gado, blesi un bogobogo taki un no man tyari ala den sani go na a presi di MASRA, un Gado, sori unu fu un mus memre En nen, fu di a fara tumsi, 25dan un mus seri den sani disi dan un tyari a moni go na a presi di MASRA, un Gado, sa sori unu. 26Drape un sa teki a moni bai ala sani san un lostu nanga san un wani soleki kaw, skapu, krabita, win noso tra tranga dringi. Dan un nanga den ososma fu unu sa nyan èn meki prisiri drape na fesi fu MASRA, un Gado. 27Un no sa fergiti den sma fu a lo fu Lefi di e libi na un mindri. Bika den no abi wan eigi pisi gron leki unu.
28Abra ibri tu yari un mus tyari den tin prosenti fu unu kon na makandra ini un eigi foto. 29Dan den sma fu a lo fu Lefi sa kon nyan te den bere furu. Bika den no abi wan pisi gron gi densrefi. A srefi fasi den doroseisma, den pikin di no abi p'pa nanga m'ma moro nanga den uma di masra dede kba, sa kon. Ala den sma disi di e libi na un mindri sa kon en nyan tu te den bere furu. Dan MASRA, un Gado, sa blesi ala sani san un e du.
