Deuteronomium 16

₁No fergiti taki ini a mun Abib un mus hori a Paskafesa fu gi MASRA, un Gado, grani. Bika na ini mun Abib MASRA, un Gado, puru neti na ini Egipte. ₂Leki paska-ofrandi un sa srakti skapu, krabita nanga kaw gi MASRA, un Gado. Un sa srakti den na a presi pe MASRA sa sori unu taki na drape A wani taki un mus memre En nen. ₃Un no sa nyan brede di meki nanga dyesi makandra nanga a meti fu a ofrandi. Seibi dei langa un no sa nyan brede di meki nanga dyesi. A brede disi mus memre unu na a pina di un pina. Bika es'esi un ben kmoto ini Egipte. Solanga un e libi un no mus fergiti a dei di un kmoto na ini Egipte. ₄Seibi dei langa dyesi no sa de fu feni ini a heri birti pe un e tan. Fu a meti di un srakti a neti fu a fosi dei, noti no mus tan te leki a tamara fu en. ₅Un no sa srakti a Paska-ofrandi na ini wan fu den foto di MASRA, un Gado, o gi unu. ₆Ma un sa srakti en na a presi di MASRA, un Gado, sa sori unu taki na drape A wani taki un mus memre En nen. Drape un sa srakti en. Un sa srakti en te neti e fadon, te a son e go na ondro. Dati na a yuru di un ben kmoto na ini Egipte. ₇Un sa bori en, èn un sa nyan en na a presi di MASRA, un Gado, sa sori unu. A tamara fu en un sa drai go baka na un tenti. ₈Siksi dei langa un sa nyan brede di meki sondro dyesi. Tapu a di fu seibi dei un sa kon makandra èn hori wan fesa fu gi MASRA, un Gado, grani. Dan un no sa wroko.

₉Un sa teri seibi wiki. Un mus bigin teri fu a fosi di un bigin koti graan. ₁₀Dan un sa hori a fesa fu den wiki fu gi MASRA, un Gado, grani. Un sa tyari wan ofrandi nanga wan fri wani gi MASRA, un Gado. A ofrandi disi sa bigi na a fasi fa A ben blesi unu. ₁₁Un sa meki prisiri na fesi fu MASRA, un Gado. Unu, den manpikin nanga den umapikin fu unu, den mansrafu nanga den umasrafu fu unu, den sma fu a lo fu Lefi di e libi ini a foto fu unu, den doroseisma, den pikin di no abi p'pa nanga m'ma moro nanga den uma di masra dede kba. Un sa prisiri na a presi di MASRA, un Gado, sa sori unu taki na drape A wani taki un mus memre En nen. ₁₂Un mus memre taki un ben de srafu na ini Egipte. Dat' meki un mus tan du a sani disi.

₁₃Seibi dei langa un sa hori a fesa fu memre taki un ben e libi wan pisten ini kampu. Disi un sa du te un tyari a nyanyan kon na wan di un koti ini un gron èn un masi den droifi. ₁₄Un sa prisiri tapu a fesadei. Unu, un manpikin, un umapikin, den mansrafu nanga den umasrafu fu unu, den sma fu a lo fu Lefi, den doroseisma, den pikin di no abi p'pa nanga m'ma moro nanga den uma di masra dede kba di e libi ini a foto fu unu. ₁₅Seibi dei langa un sa hori a fesa disi fu gi MASRA, un Gado, grani na a presi di MASRA sa sori unu. Bika MASRA, un Gado sa blesi a nyanyan fu un gron fu un kan koti furu. A sa blesi ala sani tu di un e du. Dat' meki un kan prisiri trutru.

₁₆Dri leisi wan yari ala mansma na un mindri sa kon na fesi MASRA, un Gado, na a presi di A sa sori unu. Dati na tapu a fesa pe un mus nyan brede di meki sondro dyesi, tapu a fesa fu den wiki nanga tapu a fesa fu memre taki un ben e libi wan pisten ini kampu. Ma den no sa kon nanga leigi anu na MASRA fesi. ₁₇Ala sma sa gi san a abi, na a fasi fa MASRA, un Gado, blesi en.

₁₈Ini ala den foto fu den lo fu unu di MASRA, un Gado, gi unu un sa poti krutubakra nanga ofisiri. Den sa koti krutu gi a folku tapu wan reti fasi. ₁₉Un no sa krutu tapu wan kruktu fasi. Un no sa de na a sei fu wan sma èn un no sa teki kado fu den sma. Bika wan kado kan meki wan koniman tapu en ai èn a e meki den drai a tori fu a sma di abi leti. ₂₀Un sa du ala muiti fu sani psa tapu wan leti fasi. Dan un sa tan na libi fu teki a kondre abra di MASRA, un Gado, sa gi unu.

₂₁Te un meki wan altari gi MASRA, un Gado, un no sa poti no wan postu fu wan gado noso tra postu na en sei. ₂₂Un no sa poti no wan ston tnapu tu. Bika MASRA, un Gado, no lobi dati srefsrefi.