A blesi fu Moses
1Nanga a blesi disi Moses, a man fu Gado, blesi den sma fu Israel fosi a dede. 2A taki:
“Fu a Sinaibergi MASRA kon,
fu a Seirbergi a opo leki a son na den tapu.
Ini faya A kon fu a Paranbergi,
na mindri fu tin dusun santawan.
Faya ben e koti kmoto fu En let'anu.
3Iya, A ben lobi En folku,
ala den santawan de ini En anu.
Den sidon na En futu,
e teki leri fu En.
4Moses ben gi un a wèt,
wan gudu gi a folku fu Yakob.
5Na so a tron kownu ini Yesurun,
di den fesiman fu a folku kon na wan,
di ala den lo fu Israel kon na makandra.
6Meki Ruben libi! A no mus dede,
awinsi o pikinso den de.”
7Fu Yuda a taki: “MASRA, arki a begi fu Yuda,
meki a drai kon na en folku baka.
Bika a e feti en wawan.
Yepi den feti den feyanti fu den.”
8Fu Lefi a taki: “Yu Tumim Yu gi na Lefi,
Yu Urim Yu gi na a wan
di Yu lobi.
Yu ben tesi en na Masa,
feti nanga en na Meriba.
9A wan di taki tak' a no e firi noti gi en m'ma nanga en p'pa,
di no ben wani sabi noti fu den brada fu en,
di no ben e luku fu den pikin fu en,
soso fu ben kan hori en na Yu wortu,
soso fu no broko a ferbontu.
10Den e leri Yakob den sani fu Yu,
den sani na san den mus tan hori densrefi,
den e leri Israel Yu wèt.
Den e bron ofrandi gi Yu
di de leki switismeri na ini Yu noso,
den e bron ofrandi na tapu Yu altari.
11Blesi den MASRA, fu sani waka bun gi den.
Abi prisiri nanga a wroko fu den anu.
Broko a bakabonyo fu den feyanti fu den.
Malengri den fu têgo.”
12Fu Benyamin a taki: “Yu na a wan di MASRA lobi,
yu e kibri na En.
Dei nanga neti A e luku fu noti no miti yu,
A e hori yu na En borsu, mindri den skowru fu En.”
13Fu Yosef a taki: “Meki MASRA blesi a kondre fu yu.
Meki A blesi en nanga a moro bun sani fu heimel, a dow,
èn nanga a watra di de ondro gron.
14Meki A blesi en nanga den moro bun sani
di a son e meki gro,
nanga den moro bun sani
di e sproiti ini a munkenki.
15Meki A blesi yu nanga den moro bun sani
fu den bun owru bergi,
16nanga ala sani san a gron e gi.
Meki a bunfasi fu a Wan
di ben sori ensrefi ini a pikin bon,
kon tapu a ede fu Yosef,
tapu a ede fu a wan
di Gado teki mindri den brada fu en.
17A tranga leki wan pikin bulu,
a fosiwan di gebore
Den tutu fu en gersi di fu wan bigi bulu.
Nanga den tutu disi a o pusu den folku,
a o pusu den alamala go te na a kba fu grontapu.
Den tutu na den dusun fu Efraim,
nanga den tin dusun fu Manase.”
18Fu Sebulon a taki: “Prisiri!
Meki Sebulon prisiri te yu e go na waka.
Meki Gad prisiri fu tan ini en tenti.
19Den sa kari tra folku fu kon na a bergi,
drape den sa tyari ofrandi leki fa a fiti.
Den e nyan fu den bun fu a se,
den e feni den gudu di de ini a santi na syoro.”
20Fu Gad a taki: “Blesi fu a Wan di gi Gad moro gron.
A e libi drape leki wan lew,
A e rutu anu puru, a e masi ede.
21A sorgu taki a kisi a moro bun pisi gron,
wan pisi gron di fiti wan fesiman.
Drape den edeman fu a folku ben kon na makandra.
A ben du san MASRA ben wani,
a hori en na den besroiti gi Israel.”
22Fu Dan a taki: “Dan gersi wan pikin lew,
di e dyompo kon fu Basan.”
23Fu Naftali a taki: “Gi Naftali MASRA ben bun srefsrefi.
A kisi blesi tapu blesi.
Meki a teki a meer abra nanga a heri zuidsei.”
24Fu Aser a taki: “Fu ala den manpikin, Aser kisi a moro bigi blesi.
Mi winsi taki ala sma sa lobi en.
Yu sa dopu yu futu na ini oli.
25Den greni fu yu sa de fu kopro nanga isri.
Noti sa man du yu solanga yu e libi.”
26“Yesurun arki, no wan no de leki Gado.
Leki yu Yepiman A rei psa na heimel,
psa nanga En glori abra den wolku.
27A Gado di e libi fu têgo sa de yu kibripresi.
A e tyari yu ini En anu.
A yagi den feyanti fu yu gwe.
A taigi yu taki: ‘Kiri den!’
28Dat' meki Israel ben man libi sondro frede.
Noti ben e trobi Yakob,
ini wan kondre fu oli nanga win,
pe dow e fadon fu heimel.
29No wan no koloku leki yu Israel.
No, no wan no de.
Yu na wan folku di MASRA ferlusu,
En na a schild di e kibri yu,
a deigri di e tyari wini gi yu.
Dat' meki den feyanti fu yu sa kon saka densrefi gi yu,
yu sa waka tapu den mindribaka.”
