Deuteronomium 34

₁Baka dati Moses kmoto ini a sabana fu Moab pe a ben de, dan a kren a Nebobergi, di ben de a moro hei pisi fu a Pisgabergi. A ben didon abra nanga abra nanga Yeriko. Dan MASRA meki a si a heri kondre, fu Gilead kon miti Dan. ₂A si a heri kontren fu Naftali, di fu Efraim nanga Manase, nanga a heri kontren fu Yuda te kon miti a Se na westsei. ₃A si a kontren na zuidsei nanga a Yordandal, a dal fu Yeriko, di den e kari a foto fu den Palm tu, te go miti Soar. ₄Dan MASRA taigi en taki: “Disi na a kondre di Mi sweri gi Abraham, Isak nanga Yakob taki: ‘Mi sa gi en na den bakapikin fu yu.’ Mi meki yu si en nanga yu ai, ma yu no sa abra go na ini.”

₅Dan Moses, a knekti fu MASRA, kon dede. A dede drape ini a kondre fu Moab, leki fa MASRA ben taki. ₆Dan A beri en ini wan dal ini a kondre fu Moab, abrasei fu Bet-Peor. Te leki tide noiti wan sma sabi pe a grebi de. ₇Moses ben abi wan hondro nanga tutenti yari di a dede. En ai no ben kon dungru èn a ben steifisteifi ete. ₈Dritenti dei den Israelitisma row gi Moses ini a sabana fu Moab, te leki a ten fu row ben kba. ₉Yosua, a manpikin fu Nun, ben furu nanga koni di ben kmoto fu Gado srefi, bika Moses ben poti en anu na en tapu. Fu dat'ede den Israelitisma ben e arki san a ben e taki èn den ben e du leki fa MASRA ben taigi Moses taki den mus du.

₁₀Noiti moro wan profeiti ben de ini Israel di ben taki fesi nanga fesi nanga MASRA, leki Moses. ₁₁Noiti moro MASRA meki wan sma du ala den wondru nanga marki di A ben meki Moses du ini Egipte, meki Farao, den knekti fu en nanga a heri kondre si. ₁₂Noiti moro wan sma ben de tu nanga sowan krakti, di du ala den bigi sani disi di ben de fu frede, leki fa Moses meki heri Israel si.