Preikiman 4

₁Wan tra sani di mi kon si, na ala den fasi fa sma e pina trawan na grontapu. Mi si den watra-ai tu fu den sma di de ini a pina, ma den no abi no wan sma di e trowstu den. Den sma di e pina den ben abi makti, ma den di de ini a pina no abi no wan sma di e trowstu den. ₂Dat' meki mi feni taki den sma di dede kmoto kba ini a pina, abi en moro bun now leki den di e libi ini a pina ete. ₃Ma den wan di abi en bun moro den disi, na den wan di no gebore ete, den wan di no si den takru wroko ete di e psa na grontapu. ₄Mi kon si tu dati a tranga wroko fu sma, nanga a sabi di den sabi du den wroko bun, e kon fu di a wan sma wani abi san a trawan abi. Dati srefi tranga fu ferstan, leki fa a tranga fu ferstan fa a winti e wai. ₅Wan don sma e sidon langa en futu nomo, èn a e dede fu angri. ₆A moro betre yu abi pikinso nanga san yu e prisiri, dan furu gi san yu ben abi fu wroko tranga. Dati srefi tranga fu ferstan, leki fa a tranga fu ferstan fa a winti e wai.

₇Wan tra sani mi kon si na grontapu di tranga fu ferstan: ₈wan sma di de en wawan, sondro manpikin, sondro famiri, ma di e wroko tranga ala dei, sondro fu abi prisiri nanga a gudu di a abi. Ne a aksi ensrefi taki: Gi suma mi e naki mi skin so, èn fu sanede mi no e prisiri nanga a libi? Dat' srefi tranga fu ferstan èn na wan sari sani. ₉Dat' meki a moro bun gi wan sma fu de nanga wan trawan, dan fu de en wawan. Bika den kan prisiri makandra nanga a pai fu a tranga wroko fu den. ₁₀Èn efu wan fu den fadon, a trawan kan yepi en fu a tnapu baka. Ma a sma di de en wawan te a fadon de fu sari, bika sma no drape fu yepi en tnapu baka. ₁₁Efu tu sma e didon makandra tu, den kan gi densrefi waran. Ma fa wan sma kan gi ensrefi waran? ₁₂Te wan sma de en wawan, wan trawan kan du en wan sani moro makriki. Ma te den de tu sma den kan kaka futu gi a trawan. Dri titei di brei kon na wan, no e koti esi.

₁₃Wan pôti ma koni yongu boi betre moro wan owru èn don kownu di no e teki rai moro. ₁₄Bika a yongu boi o kmoto na straf'oso fu tron kownu, aladi a ben gebore leki wan pôti boi di a tra kownu ben de na makti. ₁₅Mi si tak' ala sma na grontapu ben e waka baka a yongu boi disi di bo teki a presi fu a owru kownu. ₁₆Den wan di ben waka na en baka no ben de fu teri. Ma bakaten no wan sma ben abi prisiri nanga en moro. Dati srefi tranga fu ferstan, leki fa a tranga fu ferstan fa a winti e wai.

₁₇Te yu e go na a oso fu Gado yu mus sabi fu sanede yu e go. A moro betre yu e go fu go arki, dan dati yu e go fu tyari ofrandi leki den don sma. Den no sabi srefi dati na wan ogri den e du.