Efese 1

₁Gi den sma fu Gado na Efese, di e bribi ini Kristus Yesus,

Disi na wan brifi fu Paulus. Mi na wan boskopuman fu Kristus Yesus fu di Gado wani dati. ₂Mi e winsi taki Gado wi P'pa, nanga wi Masra Yesus Kristus, sa sori un bun-ati èn gi un freide.

₃Meki wi opo a nen fu Gado, a P'pa fu wi Masra Yesus Kristus. Bika fu di wi de wan nanga Kristus, meki A blesi wi nanga ala yeye blesi di de na ini heimel.

₄Bifo A ben meki grontapu, A ben teki wi fu Ensrefi fu di wi de wan nanga Kristus. A du dati fu wi kan de santa èn sondro fowtu na En fesi. Fu di A lobi wi, ₅A ben teki a besroiti na fesi kba fu teki wi leki En pikin. Na Yesus Kristus meki taki dati psa. Gado ben abi prisiri nanga a besroiti èn na dati A ben wani. ₆Meki wi prijse Gado fu En bun-ati di bigi psa marki! A sori wi a bun-ati disi fu di wi de wan nanga En Manpikin di A lobi.

₇Wi de wan nanga a Manpikin. Dat' meki En brudu meki wi kon fri, èn wi kisi pardon fu wi sondu fu di a bun-ati fu Gado no de fu marki. ₈A sori wi a bun-ati disi na ini ala sortu koni nanga sabi di A gi wi bogobogo. ₉Gado ben feni en bun fu meki wi kon sabi a kibritori fu san na En wani. Disi e akruderi nanga san A ben prakseri fu du ini Kristus ₁₀te a ten lepi. Gado o tyari ala sani di de na heimel nanga grontapu kon makandra ondro wan enkri edeman. Dati na Kristus.

₁₁Gado ben abi en ini En prakseri taki wi di A ben teki na fesi kba èn di de wan nanga En Manpikin, sa kisi wan pisi fu a gudu. A e du ala sani soleki fa Ensrefi ben wani fu du en. ₁₂Tapu sowan fasi wi di ben poti wi howpu langaten kba na ini Kristus, sa prijse Gado di abi sowan glori.

₁₃Un tron wan nanga a Manpikin baka di un yere a tru boskopu, dati na a bun nyunsu di ferlusu unu. Di un bribi, dan Gado gi unu a Santa Yeye di A ben pramisi leki wan marki taki unu na fu En. ₁₄A Santa Yeye na a panti fu a gudu di Gado abi gi wi, a dyaranti taki Gado o ferlusu den sma di A teki gi Ensrefi. Meki wi prijse Gado di abi sowan glori!

₁₅Mi yere fa unu e bribi na ini Masra Yesus èn fa un lobi ala den sma di de fu Gado. ₁₆Dat' meki mi e tan taki Gado tangi gi unu, èn mi e tan memre unu te mi e begi. ₁₇Mi e begi taki a Gado fu wi Masra Yesus Kristus, a P'pa di mus kisi glori, sa gi unu a Yeye di e gi koni èn di e tyari sani kon na krin. Dan so un sa kon sabi Gado trutru. ₁₈Mi e begi tu fu A opo un ai fu un kon ferstan sortu howpu de gi den wan di A kari. Dan un sa kon sabi o bigi den blesi de fu a gudu san Gado abi gi den sma fu En, ₁₉èn fa a krakti fu En di e wroko na ini wi di e bribi, bigi psa marki. A krakti disi na a srefi bigi krakti ₂₀nanga san Gado ben meki Kristus opo baka na dede èn nanga san A poti Kristus na En let'anu sei na ini heimel. ₂₁Drape A hei moro ala yeye di de edeman, den di abi makti, den di abi krakti, nanga den di e rigeri. Awinsi sortu tra nen yu ben sa wani kari kon, Kristus hei moro en ini a ten disi nanga a ten san e kon. ₂₂Gado gi En makti tapu ala sani, èn A poti En leki Basi fu ala sani san de. A poti En tu leki ede fu a gemeente. ₂₃A gemeente na a skin fu Kristus. A e meki taki Kristus de ala sani san A mus de, èn Kristus e meki tak' na ala presi, ala sani de san den mus de.