Esekiyel 1

₁Ini a di fu dritenti yari, tapu a di fu feifi dei fu a di fu fo mun, mi si fa heimel e opo, dan Gado meki mi si wan sani. A pisten dati mi ben de makandra nanga den kondreman fu mi na a Kebarliba ini a kondre fu den Kaldeasma, pe den ben tyari un go nanga tranga. _2-3Tapu a di fu feifi dei fu a mun dati, MASRA taki nanga priester Esekiyel, a manpikin fu Busi. Disi psa na a Kebarliba ini a kondre fu den Kaldeasma Drape a krakti fu MASRA ben de tranga na en tapu. A ben de a di fu feifi yari tu di den Kaldeasma ben tyari kownu Yoyakin go na den kondre nanga tranga.

₄Di mi luku, mi si: Mi si fa wan tranga winti bigin wai kmoto fu noordsei. A ben e kon leki wan bigi wolku nanga faya di ben e koti na ini. Wan krin leti ben lontu a wolku tu. Sani ben de tu ini a faya di ben e brenki leki weti gowtu. ₅Dan mi si sani mindrisei fu a faya di ben gersi fo libisani. Na so den ben tan: Den ben gersi libisma, ₆ma iniwan fu den ben abi fo fesi nanga fo frei. ₇Den futu fu den no ben beni. A ondrosei pisi fu den futu ben de leki di fu yongu kaw èn a ben e brenki leki brenki kopro. ₈Na ala fo sei den libisani ben abi libisma anu na ondro den frei. Den fesi nanga den frei fu den ben de so: ₉Den frei fu den ben tuka nanga den srefi èn fu di den ben abi wan fesi na ala fo sei tu den no ben abi fu drai te den ben wani go na wan tra sei. ₁₀A fesi fu den ala fo libisani di ben e luku go na fes'sei ben gersi di fu wan libisma. A fesi fu den di ben e luku go na let'sei ben gersi di fu wan lew. A fesi fu den di ben e luku go na kruktusei ben gersi di fu wan bulu, èn a fesi di ben e luku go na bakasei ben gersi di fu wan aka. ₁₁Tu fu den frei fu den ben opo go na loktu èn den ben e tuka nanga densrefi. Nanga den tu tra frei den ben e tapu den skin. ₁₂Iniwan fu den libisani ben e dribi go nanga fesi, den no ben abi fu drai te den ben wani go na no wan tra sei. Den ben e go pe a yeye fu Gado ben e tyari den go. ₁₃Sani ben de na mindrisei fu den libisani di ben gersi pis'pisi krofaya di ben e puru faya. Den ben gersi frambo tu èn den ben e beweigi na den mindri. A faya fu den frambo ben tron wán bigi faya èn faya ben e koti kmoto inisei fu en. ₁₄Den libisani srefi ben e beweigi es'esi, leki a faya di e koti na loktu.

₁₅Di mi luku den libisani baka, mi si dati wan wiel ben de fesi den ala fo tapu a gron. ₁₆Den fo wiel ben e brenki leki a diri ston turkoois. Den wiel ben meki a srefi fasi. A ben gersi leki wan ben de ini wan trawan. ₁₇Den wiel ben kan go na ala fo sei sondro taki den ben abi fu drai. ₁₈Den upru fu den ben hei èn den ben de fu frede. Ala den fo upru ben furu nanga ai. ₁₉Te den libisani ben e dribi, den wiel ben de skinskin nanga den. Efu den libisani ben e opo go na loktu, den wiel ben e opo go na loktu tu. ₂₀Den libisani ben e go pe a Yeye fu Gado ben wani den go: na pe a Yeye ben wani, na drape den ben e go, èn den wiel ben e opo gwe makandra nanga den, bika na a srefi Yeye di ben e tiri den libisani ben e tiri den wiel tu. ₂₁Efu den libisani ben e dribi, den wiel ben e dribi tu. Efu den libisani ben e tan tnapu, den wiel ben e tan tnapu tu. Efu den libisani ben e opo kmopo na gron, den wiel ben e opo tu, bika na a srefi Yeye di ben e tiri den libisani ben e tiri den wiel tu.

₂₂Den libisani ben abi wan sani leki wan lontu daki tapusei fu a ede fu den. A sani ben de fu frede, a ben e brenki, èn a ben e koti faya leki pis'pisi ijs. Na sowan sani ben bradi tapusei fu a ede fu den. ₂₃Na ondro a sani dati den ben e tnapu. Tu fu den frei fu den ben bradi opo èn ben e tuka nanga densrefi, èn nanga den tu trawan den ben e tapu den skin. ₂₄Dan mi bigin yere den frei fu den te den ben e go na wan tra presi. Den ben e piki leki te a se e rigeri, leki a sten fu a Wan di abi ala makti, leki a babari fu wan bigi legre. Te den ben e tan tnapu den ben e saka den frei fu den. ₂₅Dan mi yere wan sten tapusei fu a daki di ben de tapu a ede fu den. Ma den libisani srefi ben tnapu, èn den frei fu den ben saka. ₂₆Tapusei fu a daki di ben de tapu a ede fu den mi si wan sani leki wan kownusturu di ben meki fu a diri ston safier. Èn mi si wan sani di ben gersi wan libisma tapu a kownusturu. ₂₇Mi si dati fu en ondrobere go na loktu ben e brenki leki weti gowtu. A ben gersi leki te yu e luku faya di tapu ondro wan grasi. Fu en ondrobere go na gron ben de leki faya nanga wan krin leti na en lontu. ₂₈A krin leti ben gersi a krin leti fu wan alenbo di de fu si na den wolku te alen kon. Na so MASRA sori Ensrefi ini ala En glori.

Di mi si ala den sani dati, mi fadon nanga fesi na gron. Ne mi yere a sten fu Wan di taki.