Wan marki gi a trangayesi pipel
1MASRA taki nanga mi, A taigi mi taki: 2“Manpikin fu libisma, yu e libi mindri wan folku di no e arki. Den abi ai fu luku, ma den no e si noti. Den abi yesi fu yere ma den no e arki, bika den na wan folku di no e arki. 3Manpikin fu libisma, lai wantu sani di yu abi fanowdu ini wan saka, leki wan sma di feyanti e tyari gwe nanga tranga go na wan tra kondre. Dan yu e hari gwe deiten, fu den kan si yu. Kande den sa kisi densrefi, bika den na wan folku di no e arki. 4Tyari den sani kon na dorosei di wan sma e teki fu tyari gwe nanga en te feyanti o tyari en gwe nanga tranga. Yu mus du dati deiten, meki den si san yu e du. Dan te neti fadon yu mus meki den si fa yu e kon na dorosei leki wan sma di feyanti o tyari gwe nanga tranga. 5Meki den si fa yu meki wan olo na a ososkin, dan yu e kren kon na dorosei. 6Sorgu dati den e si tu fa yu e poti a saka tapu yu skowru èn fa yu e syow en gwe te a dungru srefsrefi. Yu mus tapu yu fesi fu yu no e si a kondre di yu e gwe libi. A sani dati di yu sa du sa de wan marki gi den sma fu Israel.” 7Dan mi go du san A komanderi mi. Deiten mi tyari den sani go na dorosei di wan sma e tyari gwe te feyanti o tyari en gwe nanga tranga. Dan di neti e tapu mi meki wan olo nanga mi anu na a ososkin. Di a ben dungru srefsrefi mi poti a saka na tapu mi skowru dan mi hari gwe. Mi sorgu dati ala sma ben kan si mi.
8A tra mamanten MASRA taki nanga mi. A taigi mi taki: 9“Manpikin fu libisma, den sma fu Israel, a folku di no e arki, den mus fu aksi yu san yu ben du. 10Taigi den taki: ‘Na disi Masra MASRA e taki: A ben de wan boskopu gi a fesiman di de ini Yerusalem, nanga gi den sma fu Israel di e libi drape. 11Taki disi: San Mi du ben de wan marki gi unu. Den sani di Mi du, na dati o psa nanga den. Feyanti o tyari den gwe nanga tranga, leki strafuman, go na wan tra kondre. 12A fesiman di de na den mindri sa teki en saka poti na tapu en skowru èn go na dorosei te a dungru srefsrefi. Sma o meki wan olo gi en na a skotu fu a foto fu meki a psa drape gwe. A fesiman sa tapu en fesi bika a no o si a kondre disi noiti moro. 13Dan Mi o fringi Mi net abra en èn Mi o fanga en. Dan Mi o tyari en go na Babel, a kondre fu den Kaldeasma, èn a o dede drape sondro fu si a kondre srefi. 14Dan ala den sma di e lontu en, den spesrutu waktiman nanga ala den fetiman fu en Mi o panya go na ala den sei pe a winti e wai go èn Mi o hari go na den baka nanga deigri. 15Dan te Mi panya den go na mindri den folku nanga ini den difrenti kondre den o ferstan dati Mi de MASRA. 16Ma mi o meki wantu fu den tan na libi. Den no o dede ini a bigi feti èn a angriten nanga takrusiki no o kiri den tu. Mi o du dati fu meki den ferteri den folku pe Mi o panya den go ala den groskin sani di den du. Dan owktu den folku dati sa ferstan dati Mi de MASRA.’ ”
17MASRA taki nanga mi, A taigi mi taki: 18“Manpikin fu libisma, te yu o nyan brede yu mus beifi èn te yu o dringi watra yu heri skin mus seki fu frede. 19Dan yu e taigi den sma fu a kondre taki: ‘So Masra MASRA e taki fu den sma fu Yerusalem di tan na baka ini Israel: Den o nyan den brede nanga frede èn den o dringi den watra nanga bun broko-ede. Bika a feyanti o fufuru ala sani fu a kondre tyari gwe, èn a kondre o tan na baka leki wan broko pranasi, fu den bigi ogri di den sma ben du ini a kondre. 20Den foto pe sma e libi ete o tron bigi ipi broko ston, èn a kondre o tron wan bigi broko pranasi. Dan un o ferstan taki Mi na MASRA.’ ”
Esekiyel nanga den tra profeiti
21MASRA taki nanga mi, A taigi mi taki: 22“Manpikin fu libisma, san na a sani di den sma e taki na ini Israel? Den e taki: ‘A ten e psa gwe, ma no wan fu den sani e psa di den profeiti si.’ 23Dat' meki, taigi den taki: ‘Na disi Masra MASRA e taki: Mi o tyari wan kba kon na a taki dati. Sma no o taki en moro langa ini Israel.’ Taigi den taki: ‘A ten doro di ala den sani di den profeiti si o psa! 24Sma no o bedrigi den sma fu Israel moro nanga sani di den e si ma di no tru, èn nanga sani di den e taki dati de fu kon, soso fu kori a pipel. 25Mi, MASRA srefi e taki san o psa, èn na dati o psa tu! Èn na gawgaw den o psa. Unu sma di no e arki, na ini un libiten Mi o taki sani di Mi o meki psa tu. Na dati Masra MASRA taki.’ ”
26MASRA taki nanga mi, A taigi mi taki: 27“Manpikin fu libisma, yere, den sma fu Israel e taki: ‘Den sani di Gado e sori en, nanga den sani di Gado e gi en fu a taki, na fu a ten di de bun fara na wi fesi.’ 28Dat' meki, taigi den taki: ‘Na disi Masra MASRA e taki: No wan fu den sani di Mi taki o tan dan den no psa. A wortu di Mi taki o psa nomonomo. Na dati Masra MASRA taki.’ ”
