Yerusalem, a uma di e yayo
1MASRA taki nanga mi, A taigi mi taki: 2Manpikin fu libisma, memre a pipel fu Yerusalem na den groskin sani di den du. 3Taigi a foto taki: Na disi Masra MASRA e taki: Ini Kanaan yu kumbatitei beri. Yu papa ben de wan Amonitisma èn yu mama ben de wan Hetitisma. 4Di yu gebore sma no ben de fu koti yu kumbatitei, fu wasi yu puru a brudu na yu skin, fu wrifi sowtu gi yu nanga fu domru yu ini krosi. 5No wan sma luku yu èn sari yu fu du wan fu den sani dati gi yu. Na ini wan wei den poti yu di yu gebore, bika den no ben si noti na yu.
6Ne Mi waka psa. Dan Mi si fa yu ben e lolo ini yu brudu. Dan Mi taki: Libi! Iya, di Mi si yu didon drape ini a brudu fu yu, Mi taki: Tan na libi! 7Dan Mi teki yu èn Mi sorgu gi yu. Yu gro leki koro ini wan pranigron. Yu gro, yu kon bigi èn yu kon moi. Yu kisi moi steifi borsu èn a wiwiri na yu syenpresi ben e gro, ma yu ben de nanga sososkin ete. 8Di Mi psa baka wan pisten baka, Mi si dati yu ben lepi fu meki lobi. Dat' meki Mi teki yu ondro Mi tiri, dan Mi tapu a sososkin fu yu. Mi sweri gi yu dati yu o man tan bow na Mi tapu, Mi meki wan ferbontu nanga yu, MASRA e taki. Na so yu kon de fu Mi. 9Dan Mi wasi yu, Mi wasi a brudu puru na yu skin, dan Mi lobi oli gi yu. 10Baka dati Mi weri wan moi krosi gi yu nanga furu kloru, nanga susu na yu futu fu a moro diri leer. Mi weri wan linnen krosi gi yu lontu yu ede, nanga wan kanti duku fu tapu yu fesi. 11Mi weri moi gowtu sani gi yu, bui na yu anu nanga wan keti na yu neki. 12Mi gi yu wan linga gi yu noso, linga gi yu yesi, èn Mi poti wan moi kroon na tapu yu ede. 13Yu ben weri furu gowtu nanga solfru sani, den krosi fu yu ben de fu linnen nanga kanti, moi brei krosi. A nyanyan fu yu ben meki nanga fini blon, nanga oni èn nanga oleif-oli. Dati moi yu sote, iya, yu ben kon gersi wan uma kownu. 14Dan ala folku bigin taki fu yu, fa yu moi, bika fowtu no de fu feni na yu. Na ala den moi sani di Mi weri gi yu poti yu so. Na so Masra MASRA e taki.
15Ma yu kon kisi heimemre fu di yu ben moi so èn fu di sma ben e taki so fu yu. Dan yu bigin waka e motyo. Yu bigin motyo nanga ibri sma di ben e waka psa. Den ben kan kon teki, a ben de fu den. 16Yu puru yu krosi, yu moi den presi pe yu e tyari ofrandi nanga den dan yu motyo drape gi Mi. Noiti ete so wan sani ben psa èn noiti moro a o psa tu. 17Yu teki den gowtu nanga solfru sani tu di Mi ben gi yu, èn yu meki popki fu mansma nanga den, dan yu motyo nanga den. 18Yu teki den moi brei krosi fu yu tu weri gi den, èn yu tyari a oleif-oli nanga a wierook fu Mi leki ofrandi gi den. 19A nyanyan di Mi ben gi yu, sani di ben meki nanga fini blon, oleif-oli, nanga fu oni, yu gi den leki wan ofrandi nanga wan switi smeri. A kon so fara srefi, Masra MASRA e taki, 20taki yu teki den pikin di Mi meki nanga yu èn tyari den leki wan ofrandi gi den meki den nyan. Fu sanede a motyo di yu motyo gi Mi no ben sari? 21Fu sanede yu ben abi fu srakti den pikin fu Mi, bron den èn gi den tapu so wan fasi abra? 22Na ala den groskin sani dati di yu du, nanga a motyo di yu motyo, yu no prakseri di yu ben yongu, di yu ben de nanga sososkin èn di ben didon e lolo ini yu brudu. 23Èn baka ala den ogri di yu du, ma a kba gi yu tu, a kba gi yu, Masra MASRA e taki, 24yu meki spesrutu presi poti na ibri pren. 25Owktu tapu ala uku pe pasi e miti yu gi a moi fu yu abra. Yu bradi yu futu gi ibri sma di ben e psa èn yu yayo srefsrefi. 26Owktu nanga den sma fu Egiptekondre, den krasi sma fu a kondre na yu sei, yu yayo. Yu yayo sote èn yu du Mi wan hati sani nanga dati. 27Ma yere, Mi tron yu feyanti now. Mi puru wantu fu den reti di yu ben abi, èn Mi gi yu abra na den di no lobi yu srefsrefi fu den du san den wani nanga yu. Dati na den Filistijnuma di e syen fu a doti libi di yu e libi. 28Fu di sani no ben sari yu, meki yu go yayo srefi nanga sma fu Asiria. Iya, yu go motyo nanga den, ma toku a no ben sari gi yu. 29Yu yayo furu tu nanga den Kaldeasma, den sma di e bai nanga seri sani. Ma owktu dati no ben sari gi yu. 30Krasi nomo yu ben krasi so meki yu du ala den sani dati, Masra MASRA e taki. Leki wan motyo yu ben de di no e span nanga no wan sma. 31Tapu ibri uku pe pasi e miti, èn tapu ibri pren yu bow den spesrutu presi fu yu. Ma yu no tyari yusrefi leki wan sma di e seri en skin, bika yu no ben wani moni. 32Yu ben e motyo, yu go na bedi nanga doroseisma, ma yu ben trow. 33Ala motyo e kisi kado, ma yu ben e gi kado na ala den man nanga san yu ben e meki lobi. So yu ben e kori den fu ala sei kon na yu fu yu sribi nanga den. 34Sani ben e go tra fasi na yu leki fa a ben e go na den tra uma. Yu ben de wan motyo, ma man no ben abi fu waka na yu baka, den no ben abi fu pai yu, ma yu ben e pai den. Sani ben de tra fasi na yu.
35Dat' meki, motyo, arki a boskopu fu MASRA. 36Na disi Masra MASRA e taki: Fu di na yu ben broko yusrefi saka, fu di na yu ben puru yu krosi gi den man nanga san yu ben e meki lobi èn go na bedi nanga den, èn fu di yu ben meki a brudu fu den eigi pikin fu yu lon gi ala den groskin kruktu gado fu yu, 37fu dat'ede, yere, Mi o tyari ala den man nanga san yu ben e meki lobi, den man di yu gi prisiri, kon na wan, ala den wan di yu ben lobi, nanga ala den wan di yu no ben man si na ai. Mi o tyari den kon fu ala sei, dan Mi o puru yu krosi na yu skin fu den kan teki den ten luku a sososkin fu yu. 38Mi o leisi a strafu gi yu di fiti motyo nanga kiriman. Mi o fon yu nanga hebi atibron dan 39Mi o gi yu abra ini a makti fu den. Den o broko den spesrutu sani trowe di yu meki. Den o puru yu krosi nanga yu gowtu sani na yu skin èn meki yu tnapu sososkin. 40Den o meki bun furu sma hari kon na yu, sma di o fringi ston na yu tapu èn kapu yu nanga den deigri. 41Den o sutu faya gi den oso fu yu èn den o strafu yu leti fesi furu tra uma. So Mi o meki yu tapu nanga a motyo di yu e motyo, èn nanga a pai di yu e pai den man nanga san yu e sribi. 42Dan fosi a hebi atibron fu Mi o saka èn dan fosi Mi o tapu fu dyarusu. Dan fosi Mi o bro èn dan fosi a hebi atibron fu Mi o kowru. 43Yu fergiti san Mi du gi yu di yu ben yongu, ma yu wiki a faya atibron fu Mi nanga ala den sani di yu du. Na dat' meki Mi meki a fasi fa yu tyari yusrefi drai kon baka tapu yu ede. Na so Masra MASRA e taki. Dan so wan kba kon na a motyo di yu motyo, nanga na den groskin sani di yu du.
44Yerusalem, yere, te sma wani koti odo gi yu den o taki: “Leki fa a mama de, na so a umapikin o de tu.” 45Yu na trutru a umapikin fu yu mama di no ben man si en masra nanga den manpikin fu en na ai. Yu de leki den sisa fu yu, di no ben wani sabi not'noti fu den masra nanga den manpikin fu den. Yu mama ben de wan Hetiti-uma èn yu papa ben de wan Amoritiman. 46A bigi sisa fu yu ben de Samaria di ben libi noordsei fu yu nanga den umapikin fu en. A pikin sisa fu yu ben de Sodom, en ben libi zuidsei fu yu nanga den umapikin fu en. 47Yu no libi wawan leki fa den ben e libi, èn yu no du den groskin sani wawan di den ben e du, ma es'esi yu ben kon moro ogri leki den. 48Mi e sweri na Mi eigi libi, MASRA e taki, dati a no abi misi dati yu sisa Sodom nanga a umapikin fu en, no du afu fu san yu nanga den umapikin fu yu du. 49Yere, na disi ben de a kruktudu fu yu sisa Sodom: en nanga den umapikin fu en ben tyari heimemre èn den ben e libi bigi, sondro wan broko-ede. Den wan di no de noti, nanga den mofinawan, den no ben e luku srefsrefi. 50Den ben e waka nanga a prakseri dati den betre moro ibri tra sma, èn den ben e du groskin sani na Mi fesi. Dat' meki Mi kiri den wantron, leki fa Mi si den sani dati. 51Samaria dati no du afu fu den sondu di yu du. Yu du moro groskin sani leki den. Efu yu nanga den tu sisa fu yu tnapu sei nanga sei, a gersi dati den no du noti. 52Tyari a syen fu yu now, yu di meki dati a strafu di den o kisi sori moro lekti. Yu sondu na tapu so wan groskin fasi dati a gersi den taki den no du noti. Yu mus syen, èn yu mus tyari a syen dati tu, bika yu meki a gersi dati den sisa fu yu na bun sma.
53Ma Mi o tyari wan kenki kon gi den, gi Sodom nanga den umapikin fu en, nanga gi Samaria nanga den umapikin fu en, èn Mi o tyari wan kenki kon gi yu tu. 54Dati o de wan syen gi yu, èn a o meki yu syen fu ala den sani di yu du. Èn dati o de wan trowstu gi den. 55Den sisa fu yu, Sodom nanga Samaria, den nanga den umapikin fu den o de baka leki fa den ben de fosi. Yu nanga den umapikin fu yu owktu o de baka leki fa un ben de fosi. 56A ten di yu ben tyari heimemre yu noiti kari a nen fu yu sisa Sodom. 57A ten dati a no ben kon na krin ete, leki fa a kon na krin now, fa yu takru. Now den umasma fu Aram nanga den di fu ala den tra kondre na lontu e teki yu e meki spotu. Owktu den Filistijnuma di e libi na yu lontu e luku yu èn lafu. 58Yu o tyari a bakapisi fu den syen sani nanga den groskin sani di yu du. Na so MASRA e taki.
59Bika, na disi Masra MASRA e taki: Leki fa yu du nanga Mi fu no hori yu na san yu ben pramisi èn fu broko a ferbontu di un ben meki, na so Mi o du nanga yu tu. 60Ma Mi o tan memre a ferbontu di Mi meki nanga yu a ten di yu ben yongu. Dat' meki Mi o meki wan têgo ferbontu nanga yu now. 61Dan yu o prakseri fa yu ben tyari yusrefi èn firi syen te yu bigi sisa nanga yu pikin sisa o kon baka na yu. Mi o gi yu den leki yu umapikin awinsi den no de ini a ferbontu di Mi meki nanga yu. 62Te Mi meki a ferbontu nanga yu, yu o sabi taki Mi de MASRA, 63èn yu o prakseri baka san yu du. Dan yu o syen èn hori yu mofo fu a syen di miti yu. Ma Mi o gi yu pardon fu ala san yu ben du. Na so Masra MASRA e taki.
