Ibri sma de frantwortu fu ensrefi
1MASRA taki nanga mi, A taigi mi taki: 2“Fu sanede unu ini Israel e taki a sani disi?: Papa nanga mama e nyan swa droifi, ma na den tifi fu den pikin e swa. 3Mi e sweri disi na a eigi libi fu Mi, Masra MASRA e taki, dati noiti moro a sani disi sa taki ini Israel. 4Yere, a libi fu ala sma na fu Mi: a libi fu papa nanga mama, nanga a libi fu pikin èn na a sma di sondu sa dede.
5Efu wan sma di bun ini Mi ai e du san bun, a e libi na tapu wan leti fasi, 6a no e nyan meti di tyari leki ofrandi gi kruktu gado makandra nanga trawan tapu den bergi, a no e opo en ede luku den kruktu gado di den e dini, a no e go na bedi nanga a uma fu wan tra man noso nanga wan uma di abi en munsiki, 7a no e pina no wan sma, a e gi a sma di mus pai en a panti fu en baka, a no e fufuru, a e prati a brede fu en nanga sma di angri e kiri, a e weri krosi gi den di de nanga sososkin, 8a no e aksi sma moro leki san a leni den, a no e seri sani diri furu moro leki san a mus seri, a no e du kruktu sani, a e taki sani leki fa den de fesi krutu, 9a e du den sani fu Mi di a mus tan du èn a e hori ensrefi fin'fini na den sani fu Mi na san a mus tan hori, - so wan sma na wan sma di bun ini Mi ai. A no abi misi dati a o tan libi. Na so Masra MASRA e taki.
10Ma efu a meki wan boi di e fufuru, di e kiri, di e du ala den sani 11di ensrefi no du noiti, wan boi di e nyan meti di tyari leki ofrandi gi kruktu gado makandra nanga trawan tapu den bergi, di e go na bedi nanga a uma fu wan tra man, 12di e pina pôtisma nanga sma di no de noti, di no e gi a sma di mus pai en a panti fu en baka, di e opo en ede luku kruktu gado, di e du groskin sani, 13di e aksi sma moro leki san a leni den èn di e seri sani diri furu moro leki san den mus de, - so wan sma no sa tan na libi. Baka ala den groskin sani dati di a du a sa dede nomonomo. Èn na ensrefi suku en dede.
14Ma efu so wan sma meki wan boi, wan boi di e si ala den sondu di en papa e du, di e si den, ma di no e du den, 15di no e nyan meti di tyari leki ofrandi gi kruktu gado makandra nanga trawan tapu den bergi, di no e opo en ede luku den kruktu gado fu a pipel fu Israel, di no e go na bedi nanga a uma fu wan tra man, 16di no e pina no wan sma, di no e teki panti srefsrefi, di no e fufuru, di e prati en brede nanga den di angri e kiri, di e weri krosi gi den di de nanga sososkin, 17di no e du kruktu, di no e teki na sma moro leki san a leni den, di no e seri sani diri furu moro leki san den mus de, ma di e hori ensrefi na den sani fu Mi na san a mus tan hori ensrefi èn di e du den sani fu Mi di a mus tan du, - so wan sma no sa dede fu den kruktudu di en papa du, ma a o tan na libi. 18Na en papa, di pina trawan puru sani na den anu, di fufuru sani fu trawan èn di du sani di no bun nanga en eigi famiri, iya, na en sa dede fu den kruktudu fu en. 19Ma unu e aksi taki: ‘Fu sanede a manpikin no e yepi tyari den kruktudu fu en papa?’ A manpikin no e yepi en tyari den bika en e du san bun, èn a e libi na tapu wan leti fasi. A e hori ala den wèt fu Mi fin'fini. A boi o tan na libi. 20Na a sma di sondu sa dede. Wan boi no o yepi tyari den kruktudu fu en papa, èn wan papa no o yepi tyari den kruktudu fu en boi. A bun fasi fu wan sma di bun ini Mi ai sa de na ensrefi tapu, èn a ogri-ati fasi fu wan ogri-ati sma sa de na ensrefi tapu.
21Ma te wan ogri-ati sma drai en baka gi ala den sondu di a e du, te a e hori ala den wèt fu Mi, te a e du san bun èn libi na tapu wan leti fasi, dan a o tan na libi. A no sa dede. 22A no o abi fu pai fu no wan fu den ogri di a du. A libi di a e libi na tapu wan leti fasi now o meki a tan na libi. 23Mi no abi prisiri nanga a dede fu wan ogri-ati sma, Masra MASRA e taki. Ma Mi abi prisiri te a sma sa drai en baka gi a fasi fa a e libi, fu a kan tan libi.
24Ma te wan sma di bun ini Mi ai tapu nanga a bun fasi fa a e libi, dan a bigin du ogri, a o pai fu ala den groskin sani di a e du èn a no o tan na libi. Mi no o prakseri no wan fu den bun sani moro di a ben du. Ma a o dede fu di a drai di a drai en baka gi Mi, nanga fu den sondu di a du.
25Ma un e taki: ‘Ma MASRA no e du sani nanga leti.’ Ma pipel fu Israel, un yere. Na Mi no e du sani nanga leti, noso na unu no e du sani nanga leti. 26Te wan sma di bun ini Mi ai drai kmopo fu a bun fasi fa a ben e libi go du ogri, dan a dede, dan a e dede fu den ogri di a go du. 27Ma te wan ogri-ati sma drai en baka gi den ogri di a ben e du fu go du san bun, fu go libi na tapu wan leti fasi, dan a kibri a libi fu en. 28Na kisi a kisi ensrefi, èn a drai baka gi ala ogri di a du. A o tan na libi, a no sa dede. 29Ma a pipel fu Israel e taki: ‘Ma MASRA no e du sani nanga leti.’ Pipel fu Israel, na Mi no e du sani nanga leti noso na unu no e du sani nanga leti.
30Na dat' meki, pipel fu Israel, Mi o strafu iniwan fu unu na a fasi fa un e tyari unsrefi, Masra MASRA e taki. Un drai un baka gi den ogri fu unu èn un tapu nanga den. Dan den no sa meki un fadon ini kruktudu. 31Un broko nanga a sondu libi di un libi èn un poti krin denki ini un prakseri nanga ini un ati. Fu sanede un wani dede, pipel fu Israel? 32Bika a dede fu wan libisma no e gi Mi prisiri, Masra MASRA e taki. Fu dat'ede, un drai baka gi sondu, fu un kan libi.
