1Baka dati Masra komanderi mi fu singi a dede-oso singi disi gi den tiriman fu Israel:
2‘Un mama ben de wan dyadya lew,
a no ben du ondro srefsrefi gi den trawan!
Leti na den mindri a kweki den pikin fu en.
3A teki wan fu den pikin kweki wan spesrutu fasi.
A dati tron wan tranga lew.
A leri fu fanga sani fu nyan,
libisma srefi a ben e priti.
4Den folku yere fu en,
den fanga en ini a olo di den ben diki gi en,
den naki aka poti na en noso,
den tyari en go na Egiptekondre.
5A mama wakti fu a drai kon baka,
ma te fu kba a lasi howpu.
Dan a teki wan fu den pikinwan fu en kweki wan spesrutu fasi.
Owktu a dati tron wan tranga lew.
6A ben de wan yongu lew,
èn a ben kaka en borsu e waka lontu mindri den tra lew.
A leri fu priti tra meti fu a nyan,
libisma a srefi ben e kiri e nyan.
7A ben e broko den kownu-oso fu den,
a ben e meki den foto fu den tron bigi ipi broko ston.
Te a ben e bari a heri kondre ben e beifi.
8Dan den folku fu a birti meki mofo fu kiri en.
Sma kmopo na alasei èn fringi net na en tapu.
Den fanga en ini a olo di den ben diki gi en.
9Nanga aka den ben abi fu tiri en,
dan den tapu en poti ini wan koi.
Den tyari en go na a kownu fu Babel,
drape den poti en ini wan tranga strafu-oso.
A babari fu en no o de fu yere moro tapu den bergi fu Israel.
10Yu mama ben de wan droifitiki,
a ben e gro sei watra, leki yu.
A droifitiki ben e gi froktu, a ben abi furu taki tu,
bika watra ben de bogobogo.
11Den taki fu en ben tranga sote,
den tiki fu tiriman ben e meki nanga den.
Wan fu den taki gro psa den trawan,
a gro hei, go te ini den wolku.
A ben de fu si fu fara, nanga den furu wiwiri fu en.
12Ma dan wan sma rutu a droifitiki puru ini en faya atibron,
a fringi en na gron.
Dan a faya winti di e wai kmopo na oostsei drei en.
Den froktu fu en dati,
den fadon èn den drei gwe.
A tranga taki fu en,
nanga faya a sma bron en.
13Now na ini a dreisabana a prani,
wan presi di e angri sote fu watra.
14Faya panya kmopo na a taki,
a bron yongu taki èn a bron froktu.
A droifitiki no abi no wan tranga taki moro,
no wan taki a no ben abi moro fu meki tiki gi tiriman.’ ”
Disi ben de a dede-oso singi èn na so sma e singi en te tide.
