1MASRA taki nanga mi, A taigi mi taki: 2“Manpikin fu libisma, taki a boskopu disi di Mi e gi yu fu taki. Taki: ‘Na disi Masra MASRA e taki:
Un krei taki: Tye, a dei!
3A dei de krosbei,
a dei fu MASRA de krosbei!
A sa de wan dei fu wolku,
a dei te strafu o leisi gi den folku.
4Nubia o beifi sote te srudati nanga deigri o hari go ini Egipte,
te dede o fadon drape.
Den srudati o teki ala den gudu fu Egipte tyari gwe,
èn den o broko a kondre go te na gron.
5Srudati di Egipte ben yuru fu Nubia, fu Put, fu Lud,
fu den Arabiri nanga fu a pipel di de ini wan ferbontu,
den alamala o dede ini a bigi feti.
6Na disi Masra MASRA e taki: Den di e hori baka gi Egipte o fadon, èn a krakti fu den gi san den e meki bigi so o broko. A bigi feti o kiri sma fu Migdol go te na Syene, Masra MASRA e taki. 7Egipte o didon leki wan broko pranasi na mindri fu kondre di broko tron broko pranasi tu. Den foto fu en o tron bigi ipi broko ston na mindri foto di broko tu. 8Te Mi poti faya ini Egipte èn bron ala den wan di ben e yepi en, den sma fu en o sabi taki Mi de MASRA. 9A dei dati Mi o seni boskopu nanga sipi go na den sma fu Nubia di e libi sondro wan broko-ede, èn Mi o meki den beifi. Den o beifi abra den heri skin tapu a dei dati te Mi o strafu Egipte. Èn a dei dati, a e kon!
10Na disi Masra MASRA e taki: Iya, Mi sa meki kownu Nebukadnesar fu Babilon tyari wan kba kon na den bun furu sma fu Egipte. 11Mi o meki en nanga den srudati fu en, den moro ogri-ati wan fu grontapu, hari go drape fu broko a kondre. Nanga den deigri ini den anu den o go feti nanga Egipte èn den o furu a kondre nanga dede. 12Mi o drei a Nijl-liba èn Mi o gi a kondre na man di takru srefsrefi. Mi o meki doroseisma broko a kondre nanga ala san de na en ini. Mi, MASRA, taki dati.
13Na disi Masra MASRA e taki: Mi o puru den kruktu gado na pasi, den soso gado fu Nof no o de fu si moro. Egipte o de sondro tiriman, èn frede o grabu ala den sma fu a kondre dati hori. 14Mi o broko Patros, sutu Soan na faya, èn strafu den sma fu a mamafoto No. 15Mi o lusu a hebi atibron fu Mi abra Sin, a tranga foto fu Egipte. Ala den srudati ini a foto No Mi o kiri puru na pasi. 16Mi o poti faya ini Egipte, Sin o beifi sote, olo o naki ini a skotu fu No, èn feyanti o teki Nof abra, bigibigi dei. 17Den yongu srudati fu On nanga Pi-Beset o dede ini a bigi feti, èn a feyanti o tyari den sma go na den kondre leki strafuman. 18Gi a foto Takpenas a o tron wan dungru dei, bika na drape Mi o broko a makti fu Egipte. Drape Mi o puru a tranga legre fu den na pasi gi san den e meki bigi so. Wan wolku o tapu Takpenas èn a feyanti o tyari den sma gwe leki strafuman. 19Na so Mi o strafu Egipte, èn den o sabi taki Mi de MASRA.’ ”
20MASRA taki nanga mi ini a di fu erfu yari di un ben de leki strafuman ini Babilon, tapu a fosi dei fu a di fu seibi mun. A taigi mi taki: 21“Manpikin fu libisma, Mi broko a anu fu Farao, a kownu fu Egipte. Yere, no wan sma o poti dresi na en èn tai en fu a kon betre. A anu no o kon tranga baka fu kan hori wan deigri. 22Na disi Masra MASRA e taki: Yere, Mi e tron a feyanti fu Farao, a kownu fu Egipte. Mi o broko den anu fu en, a wan di gesontu nanga a wan di broko, èn Mi o naki a deigri fu en puru na ini en anu. 23Mi o panya den go mindri tra folku nanga ini difrenti kondre. 24Mi o meki den anu fu a kownu fu Babilon kon tranga èn Mi o gi en a deigri fu Mi. Ma Mi o broko den anu fu Farao, èn a o dyeme fesi a kownu fu Babilon leki wan man di kisi wan bun hebi mankeri. 25Iya, Mi e meki den anu fu a kownu fu Babilon kon tranga, ma den anu fu Farao o anga na en sei. Te Mi gi a kownu fu Babilon a deigri fu Mi, èn te a o wai abra Egipte, den sma fu Egipte o sabi taki Mi de MASRA. 26Mi o panya den sma fu Egipte go na mindri tra folku nanga ini difrenti kondre. Dan den o sabi taki Mi de MASRA.”
