1MASRA taki nanga mi ini a di fu erfu yari di un ben de leki strafuman ini Babilon, tapu a fosi dei fu a di fu dri mun. A taigi mi taki: 2“Manpikin fu libisma, taigi Farao, a kownu fu Egipte, nanga a heri pipel fu en taki: ‘Suma de di bigi leki yu?
3Yere, wan sipresbon ben de wan pisten,
wan sedre bon fu a Libanonbergi,
den taki fu en ben moi sote,
den wiwiri fu en ben gi furu kowrupe.
A bon ben hei srefsrefi,
loktusei fu en ben doro te na den wolku.
4Na watra ben e meki a gro so,
a watra fu dipi ondro a gron ben meki a hei so.
Bogobogo fu a watra dati ben e go pe a bon prani,
a watra dati furu sote dati a e go na ala den bon na grontapu.
5Na so a bon dati ben bigi moro ala trawan,
na so a kon kisi den bradi nanga den langa taki,
fu a dipi watra fu ondro a gron.
6Ini den pikin taki fu en ala pikin fowru ben meki den nesi,
ondro den bigi taki fu en ala krasimeti ben meki den pikin,
ini a kowrupe fu en ala folku e libi.
7A bon ben moi, a ben bigi, den taki fu en ben langa,
ma na fu di den rutu fu en ben doro na furu watra.
8Srefi a moi dyari fu Gado no ben abi wan sedre leki en,
no wan sipresbon nanga den bigi taki dati,
no wan plataanbon nanga den pikin taki dati,
no wan bon ini a moi dyari fu Gado ben moi leki en.
9Mi ben meki en moi srefsrefi,
nanga bun furu taki.
Ala den bon fu Eden ben dyarusu na en tapu,
ala den bon fu a moi dyari fu Gado.
10Ma, na disi Masra MASRA e taki: Di a bon kon so hei, di loktusei fu en ben doro te na den wolku, a kisi heimemre. 11Fu dat'ede Mi gi en abra na a moro makti tiriman fu grontapu di meki a pai fu ala a ogri-ati fasi fu en. Misrefi poti en na wan sei. 12Dorosei folku, den moro ogri-ati wan, kapu en trowe na gron. Den bigi taki fu en fadon na tapu den bergi nanga ini den dal mindri den bergi. Den pikin taki broko fadon ondrosei fu ala den kriki fu grontapu. Ala den folku di ben libi ini a kowrupe fu en hari gwe, den libi en didon drape. 13Ala den pikin fowru frei go sidon na tapu a bon di fadon, èn ala krasi meti go libi ondro den taki. 14No wan bon, awinsi den rutu fu en de ini bogobogo watra, sa meki bigi moro fu a hei di a hei noso taki a e doro te na den wolku. No wan bon abi heimemre tu taki a tnapu ini en eigi krakti. Bika ibri bon o dede tu leki fa libisma e dede èn den o go na dedekondre tu pe libisma e dede go.
15Na disi Masra MASRA e taki: A dei di a bon dati dede èn go ini a grontapu na ondrosei, Mi meki a watra fu dipi ondro a gron low fu a bon ede. Mi tapu a lon di a ben e lon. Mi meki a Libanonbergi low tu fu en ede. Fu en ede tu ala den bon ini a kondre ben angri sote fu watra. 16Den folku o beifi te den yere a babari nanga san a bon fadon. Dan Mi o meki a saka go ini dedekondre, na den di saka go ini a grebi. Ma ala den bon fu Eden di de ini a grontapu na ondrosei, den moro moi wan fu a Libanonbergi, di rutu de na bogobogo watra, den o trowstu densrefi. 17Ala den folku di ben libi ini a kowrupe fu en, den folku di ben hori baka gi en, den tu o saka go ini dedekondre, na den di deigri kiri.
18Egipte, tye, no wan bon fu Eden kan tnapu na yu sei fu a moi di yu moi, nanga fu a bigi di yu bigi. Ma yusrefi o fadon na gron, neleki den tra bon fu Eden, èn saka go ini a grontapu na ondrosei, fu didon na mindri den folku di no e dini Mi, na den di a deigri kiri. Na dati o miti Farao nanga a heri folku fu en, Masra MASRA e taki.’ ”
