A doro na oostsei mus tan tapu
1Baka dati a man tyari mi go baka tapu a pren dorosei fu a tempel dyari, na a doro di ben de na oostsei. A doro ben sroto. 2Dan MASRA taigi mi taki: “A doro disi mus tan sroto. No wan sma sa opo en èn no wan sma mus waka na a doro disi go na inisei, bika MASRA, a Gado fu Israel, ben waka drape go na inisei. Dat' meki a mus tan sroto. 3Na soso a tiriman fu unu kan kon sidon nyan fu a ofrandi. A kan waka na a gadri fu a doro kon sidon, dan a waka na a gadri gwe baka.”
Den sma di no abi primisi fu go ini a tempel
4Baka dati a man tyari mi go na a doro fu noordsei, a doro di ben de fes'sei fu a oso fu Masra. Drape mi si dati a glori fu MASRA furu a oso fu En. Ne mi fringi misrefi na gron. 5Ne MASRA taigi mi taki: “Manpikin fu libisma, luku bun, luku fin'fini èn arki ala san Mi o taigi yu fu den difrenti wèt fu a oso fu Mi. Luku a presi bun pe sma e waka kon na ini a oso fu Mi, owktu den presi pe sma kan waka go ini a santa presi. 6Dan yu mus taigi den trangayesi sma, a pipel fu Israel, taki: ‘Pipel fu Israel, den groskin sani di un du sari: 7un meki doroseisma nanga sma di ati no opo gi Mi, sma di no besnei, kon ini a santa presi fu Mi kon pori a oso fu Mi te un ben e tyari a fatu nanga brudu leki ofrandi gi Mi. Tapu ala den groskin sani di un du un broko a ferbontu fu Mi di un du dati. 8Unsrefi no luku den santa wrokosani fu Mi, ma na den doroseisma un poti fu sorgu gi den santa wrokosani fu a santa presi fu Mi. 9Dat' meki, na disi Masra MASRA e taki: No wan doroseisma, sma di ati no opo gi Mi, sma di no besnei, sa go ini a santa presi fu Mi. No wan doroseisma di e libi mindri den Israelitisma.
Den Lefitisma
10Den Lefitisma dati, den wan di drai den baka gi Mi di Israel ben gwe libi Mi fu go dini kruktu gado, den o kisi den strafu nomonomo. 11Den o kisi primisi ete fu dini Mi leki waktiman fu den doro fu a oso fu Mi, fu bron meti leki ofrandi nanga fu srakti meti leki ofrandi èn fu tnapu klar'klari fu yepi a pipel te den kon ini a oso fu Mi. 12Ma Mi o strafu den fu di den ben dini a pipel fu Mi di den ben e dini den kruktu gado, èn meki den fadon ini kruktudu nanga a sani dati, Masra MASRA e taki. Den Lefitisma o tyari den kruktudu fu den. 13Den no abi primisi fu kon krosbei na Mi fu dini Mi leki priester, nanga fu go na den santa nanga den moro santa sani fu Mi. Ma den sa tyari a syen fu den, fu den groskin sani di den du. 14Na dat' meki Mi o poti den fu sorgu gi a oso fu Mi, fu du a aladei wroko di mus du drape.
15Ma den lefiti priester, den wan fu a famiri fu Sadok, di tan du a wroko ini a santa presi a ten di den Israelitisma ben gwe libi Mi, na den kan kon na Mi fesi fu dini Mi. Na den kan kon na Mi fesi nanga fatu èn nanga brudu, Masra MASRA e taki. 16Na den o go ini a santa presi fu Mi, na den o dini Mi na a altari fu Mi. Na den mus tan dini Mi.
17Te den e psa na den doro go tapu a pren inisei fu a tempel dyari, den sa weri linnen krosi. Den no sa weri krosi di meki fu katun te den e wroko inisei fu den doro fu a pren inisei fu a tempel dyari, noso ini a oso fu Mi. 18Srefi a duku di den e tai na den ede nanga a bruku di den e weri mus de fu linnen. Den no mus weri noti di e meki den sweti. 19Èn te den e go na a pipel di e de tapu a pren dorosei fu a tempel dyari, den sa puru den krosi nanga san den ben wroko ini a tempel. Den sa puru den èn poti den ini den kamra fu a santa presi. Nanga tra krosi den sa go na a pipel, bika a pipel no mus fasi den santa krosi fu den.
20Den no sa piri den ede tu noso meki a wiwiri fu den gro nomo, ma den mus e koti en. 21No wan priester sa dringi win te a e go tapu a pren inisei fu a tempel dyari. 22Den no sa trow tu nanga uma di masra dede kba noso uma di masra seni gwe, ma den musu trow nanga yongu pikin fu Israel srefi di no sribi nanga man ete, noso nanga uma di masra ben de priester ma di dede kba. 23Na den sa leri a pipel fu Mi a difrenti mindri san santa nanga san no santa, mindri san krin ini Mi ai nanga san no krin ini Mi ai. 24Na den sa koti krutu tu leki krutubakra, èn den sa du dati soleki fa den wèt fu Mi e taki tapu a pisi disi. Den mus hori den fesadei fu Mi soleki fa a fiti, soleki fa den wèt fu Mi e taki tapu den pisi dati, èn den mus hori a sabatdei fu Mi hei. Na den sa koti krutu tu leki krutubakra, èn den sa du dati soleki fa Mi taki tak' a mus du. Den mus hori den fesadei fu Mi soleki fa a fiti, soleki fa den wèt fu Mi e taki tapu den pisi dati, èn den mus hori a sabatdei fu Mi hei.
25Den no sa go krosbei fu wan dedeskin noso den o doti densrefi. Den kan du dati soso te a sma di dede na den papa, den mama, den manpikin, den umapikin, den brada noso den sisa, efu a sisa dati no ben abi masra ete. 26Baka te so wan priester kon krin baka a mus wakti seibi dei 27èn tapu a dei di a o go baka tapu a pren inisei fu a tempel dyari fu wroko, a mus tyari wan ofrandi fu kan kisi pardon fu sondu, Masra MASRA e taki.
28Gron den no sa abi: na Mi na san den abi. Den no sa abi wan sani gi densrefi ini Israel. Na Mi na san den abi gi densrefi. 29Den kan nyan fu a graan-ofrandi, a ofrandi fu kan kisi pardon fu sondu, nanga fu a paiman di den tyari leki ofrandi fu kan kisi pardon fu sondu. Iniwan sani di wan sma poti aparti gi Mi sa de fu den tu. 30Den moro bun nyanyan di un o koti fu den sani fu un di opo baka, nanga den moro bun sani fu ala den difrenti sani di un e gi na Mi, sa de fu den tu. Owktu un mus gi den fu a moro bun blon nanga san un e meki sani. So un e meki blesi tan tapu a oso fu unu. 31Den priester no sa nyan fowru noso meti di dede fu densrefi noso di tra meti beti kiri.
