Esra 1

₁Ini a fosi yari di kownu Cyrus fu Persia ben de na makti, MASRA meki a sani psa di A ben meki a profeiti Yeremia taki. MASRA gi kownu Cyrus a prakseri fu teki wan besroiti èn A meki a panya a besroiti dati, nanga mofo nanga tapu papira, ini ala den kondre di a ben e tiri.

₂Disi ben de a besroiti: “Na disi kownu Cyrus fu Persia e taki: MASRA, a Gado fu heimel, gi mi ala kondre fu grontapu. Na En komanderi mi fu meki wan oso gi En ini Yerusalem, ini Yuda. ₃Ala den sma fu a pipel fu En di de na wi mindri, kan hari go na Yerusalem ini Yuda nanga a yepi fu a Gado fu den, fu go meki a oso fu MASRA, a Gado fu Israel baka, dati na a Gado di e libi na Yerusalem. ₄Ala tra doroseisma, awinsi pe den e libi, mus yepi den birtisma fu den di o gwe, nanga solfru, gowtu, ososani nanga kaw, skapu nanga krabita. Nanga wan fri wani den mus gi sani tu gi a oso fu a Gado di e libi ini Yerusalem.”

₅Dan den famiri-edeman fu den lo fu Yuda nanga Benyamin, sosrefi den priester nanga den Lefitiman, nanga ala tra sma di Gado ben gi a prakseri fu go bow a oso fu MASRA, meki densrefi klari fu hari go na Yerusalem. ₆Ala den birtisma yepi den nanga solfru sani, gowtu, ososani, kaw, skapu nanga krabita nanga tra diri sani, boiti den sani di den gi den nanga wan fri wani. ₇Kownu Cyrus fu Persia gi ala den wrokosani fu a oso fu MASRA baka, di Nebukadnesar ben teki na Yerusalem tyari go poti ini a oso fu den gado fu en. ₈A meki Mitredat, a man di ben abi a frantwortu fu den gudu fu en, teri ala den sani, èn a gi den na Sesbasar, a edeman fu Yuda. ₉Den sani ben de: dritenti gowtu skarki, dusun solfru skarki, tutenti-na-neigi nefi, ₁₀dritenti gowtu kan, fo hondro-na-tin solfru kan nanga wan dusun tra wrokosani. ₁₁Ala den gowtu nanga solfru sani ben de feifi dusun fo hondro. Sesbasar tyari ala den sani dati gwe, di a e tyari den sma go baka na Yerusalem, di den sma fu Babel ben tyari go nanga tranga na den kondre.