1Dan kownu Darius komanderi fu ondrosuku du na den presi ini Babel pe den e kibri prenspari papira nanga gudu. 2Dan ini Ekbatana, wan foto di ben tranga fu teki abra, ini a kontren Media, wan buku feni pe ben skrifi taki:
3“Ini a fosi yari di kownu Cyrus ben de na makti, a teki a besroiti san mus psa nanga a oso fu Gado ini Yerusalem: a oso mus meki baka, leki wan presi pe meti e srakti leki ofrandi. A mus meki tapu den srefi fundamenti, èn a mus hei dritenti meter èn bradi dritenti meter. 4A mus meki nanga dri rij fu den bigi ston nanga fu wan rij udu postu. Kownu sa sorgu gi a moni fu a wroko dati du. 5Den gowtu nanga den solfru wrokosani fu a oso fu Gado, di Nebukadnesar ben teki puru fu a tempel ini Yerusalem tyari kon na Babel, mus gwe baka. Den mus go baka na den tanpresi, a tempel ini Yerusalem. Un mus poti den drape, ini a oso fu Gado.”
6Dan kownu Darius seni a boskopu disi gi Tatenai, a man di a ben poti fu tiri a kontren na a tra sei fu a Eufratliba, gi Setar-Bosnai nanga gi den tra lantiman nanga tiriman fu a kontren na abrasei fu a Eufratliba: “Un no mus go drape srefsrefi! 7Meki den man du den wroko na a oso fu Gado. A man di mi poti fu tiri den Dyusma, nanga den fesiman fu den abi primisi fu bow a oso fu Gado pe a ben tnapu kba. 8Mi e komanderi tu taki un mus yepi den fesiman fu den Dyusma nanga a bow fu a oso fu Gado. Solanga leki a de fanowdu un mus pai ala den paiman di den e meki. Un mus teki a moni di den sma fu a kontren na a tra sei fu a Eufratliba e pai lanti, fu du dati. 9Ala san den priester ini Yerusalem abi fanowdu ala dei, un mus gi sondro draidrai. Sani soleki: yongu bulu, man skapu nanga yongu skapu, fu srakti èn bron leki ofrandi gi a Gado fu heimel. Un mus gi den tarwe tu, sowtu, win nanga oleif-oli. 10Dan so den o man tyari ofrandi nanga wan switi smeri gi a Gado fu heimel, èn dan den kan begi gi a libi fu kownu nanga den manpikin fu en. 11Mi komanderi moro fara taki wan postu mus teki fu a oso fu iniwan sma di no e du san a besroiti disi e taki. Dan un mus dyuku a sma fasi na a edesei fu a postu di un srapu. A oso fu a sma mus naki broko tu èn drape mus tron wan dot'ipi. 12A Gado di teki a tempel dati fu meki a nen fu En kisi grani, sa naki ala kownu nanga folku trowe di poti a besroiti fu mi na wan sei èn wani fu broko a oso fu Gado na Yerusalem. Na mi, Darius, komanderi den sani disi, èn na so sani mus waka!”
13Dan Tatenai, a man di kownu ben poti fu tiri a kontren na a tra sei fu a Eufratliba, Setar-Bosnai nanga den tra lantiman, du fin'fini san kownu Darius komanderi den. 14Den fesiman fu den Dyusma ben e bow èn sani ben e waka bun. Den sani di Gado ben e meki den profeiti Hagai nanga Sakaria, a granpikin fu Ido, taigi den ben e gi den krakti. Den kba a wroko na a tempel soleki fa a Gado fu Israel, nanga den kownu Kores, Darius nanga Artaksasta fu Persia ben komanderi. 15A oso kba ini a di fu siksi yari di kownu Darius ben de na makti, tapu a di fu dri dei fu a mun Adar. 16Dan nanga bigi prisiri den Israelitisma, den priester, den Lefitiman nanga den tra Israelitisma di ben drai kon baka fu pe den feyanti ben tyari den go nanga tranga, opo a oso fu Gado. 17Na a opo-oso dati den tyari leki ofrandi: wan hondro bulu, tu hondro man skapu nanga fo hondro yongu skapu. Den tyari twarfu bokoboko leki ofrandi tu gi heri Israel, fu den kisi pardon fu den sondu. Wan gi iniwan fu den lo fu Israel. 18Baka dati den seti den priester nanga den Lefitiman na ini grupu soleki fa Moses ben skrifi poti ini a buku fu en, fu a wroko ben kan du baka gi Gado ini a oso fu En na Yerusalem.
19Den sma di ben drai kon baka fu pe den feyanti ben tyari den go nanga tranga, hori a Paskafesa tapu a di fu tin-na-fo dei fu a fosi mun. 20Ala den priester nanga den Lefitiman ben krin densrefi. Den alamala ben krin. Dan den srakti a paskaskapu gi ala den sma di ben drai kon baka fu pe den feyanti ben tyari den go nanga tranga, sosrefi gi den tra priester nanga gi densrefi. 21Den Israelitisma di ben drai kon baka fu pe den feyanti ben tyari den go nanga tranga, nyan a paskaskapu. Ala den sma di ben broko nanga a doti libi fu den tra folku di ben e libi drape, fu suku MASRA, a Gado fu Israel, ben nyan a paskaskapu tu.
22Nanga prisiri den hori a fesa pe den e nyan brede di meki sondro d, seibi dei langa, bika Gado ben gi den prisiri. A ben meki a kownu fu Asur kisi tra prakseri fu den, fu yepi den nanga a wroko na a oso fu Gado, a Gado fu Israel.
