Galasia 2

₁Baka tin-na-fo yari mi go baka na Yerusalem, makandra nanga Barnabas. Mi ben tyari Titus tu. ₂Mi go bika Gado srefi ben sori mi taki mi mus go. Dan na so mi ferteri den abra a bun nyunsu san mi e panya gi den sma di no de Dyu. Ma mi taki aparti nanga den fesiman wawan. Bika mi no ben wani taki san mi ben du noso san mi e du, ben o de fu soso. ₃Titus, di ben de nanga mi, ben de wan Grikisma. Ma no wan sma ben dwengi en fu besnei. ₄Ma wantu sma di e du leki den na bribisma, ben wani dati. Tapu wan kibri fasi den boro kon na un mindri. Den ben e suku fu sabi san a wani taki tak' wi kon fri ini Kristus Yesus. Bika den ben wani tyari un go poti baka ini katibo. ₅Ma wi no dribi no wan futu gi den. Bika wi ben wani taki a tru boskopu fu a bun nyunsu sa tan gi unu leki fa a de. ₆Srefi den man di ala sma ben si leki den moro prenspari wan, no taigi unu fu preiki ete wan tra sani. Mi no abi trobi suma den ben de, bika ala sma na a srefi gi Gado. ₇Ma den srefi ben kon si taki neleki fa Petrus ben kisi a wroko fu preiki a bun nyunsu gi den Dyusma, na so Gado ben gi mi a wroko fu preiki a bun nyunsu gi den sma di no de Dyu. ₈Bika Gado, di gi Petrus a krakti fu de wan boskopuman fu Yesus gi den Dyusma, gi mi a krakti tu fu de wan boskopuman fu Yesus gi den sma di no de Dyu. ₉So di den kon si a bun-ati san Gado ben sori mi, dan Yakobus, Kefas nanga Yohanes, di den sma e si leki den stonfutu fu a gemeente, seki anu nanga mi nanga Barnabas. Wi agri taki mi nanga Barnabas ben o go na den sma di no de Dyu, èn den ben o go na den Dyusma. ₁₀A wan enkri sani san den taigi wi fu du, na taki un no ben mus fergiti den pôtisma na den mindri. Èn mi fu mi sei du ala san mi ben man, fu prakseri den.

₁₁Ma di Kefas kon na Antiokia, a du wan sani san no bun. Dan let' na fesi ala sma mi sori en taki mi no e agri nanga en. ₁₂Bika Kefas ben gwenti fu sidon nyan makandra nanga den sma di no de Dyu. Ma di wantu fu den man fu Yakobus doro drape, a hari ensrefi puru go sidon aparti, bika a ben frede taki den Dyusma disi, di ben e feni taki yu mus besnei, ben o taki wan sani. ₁₃Den tra Dyusma di ben drape hoigri makandra nanga en, te leki Barnabas srefi hari go ini a sani dati. ₁₄Ma di mi si taki a sani san den du no e kruderi nanga a tru boskopu fu a bun nyunsu, mi taigi Kefas let' fesi ala den trawan taki: “Yu na wan Dyu, ma yu no e libi leki fa wan Dyusma gwenti. Yu e libi leki wan sma di no de Dyu. Dan fa yu kan dwengi den sma di no de Dyu fu libi leki wan Dyusma?

₁₅Wi gebore leki Dyusma. Wi a no sondusma di gebore leki pikin fu sma di no de Dyu. ₁₆Wi sabi taki wan sma no e kon bun ini Gado ai, nomo fu di a e du san a wèt e taki. Ma a e kon bun ini Gado ai fu di a e bribi na ini Yesus Kristus. Dat' meki wi srefi teki bribi na ini Kristus Yesus. Wi du dati fu kon bun ini Gado ai, no fu di wi e hori wisrefi na a wèt, ma fu di wi e bribi na ini Kristus. Bika Gado no e meki no wan sma kon bun ini En ai, nomo fu di a e hori ensrefi na a wèt. ₁₇Wi e suku fu kon bun ini Gado ai fu di wi de wan nanga Kristus. Ma a kon fu si taki wi na sondusma ete. Un sa man taki dan tak' na Kristus e meki wi sondu? Kwet'kweti! ₁₈Bika efu mi e bow a sani baka san mi ben broko puru kba, dan mi srefi e sori nanga dati taki mi ben fowtu. ₁₉Bika a wèt srefi meki taki mi dede gi a wèt, fu mi kan libi gi Gado. ₂₀Makandra nanga Kristus mi dede na a kroisi, èn toku mi e libi. Ma a no mi srefi, ma na Kristus e libi ini mi. Èn fu a ten di mi abi fu libi ete ini mi skin, mi e libi fu di mi e bribi na ini a Manpikin fu Gado, di lobi mi èn di gi En libi fu mi ede. ₂₁Mi no e si a bun-ati san Gado sori mi leki wan soso sani. Bika efu a wèt ben kan meki wi kon bun ini Gado ai, dan na fu soso Kristus dede.”