Genesis 21

₁Dan MASRA sori Sara En bunfasi leki fa A ben pramisi en. A du san A taki tak' A ben o du. ₂Sara hori bere, dan a meki wan boi gi Abraham tapu en owrudei. Disi psa tapu a ten di Gado ben taigi den taki a o psa. ₃Dan Abraham kari a boi di Sara meki gi en, Isak. ₄Di Isak ben tapu aiti dei, Abraham besnei en leki fa Gado ben taigi en fu du. ₅Abraham ben abi wan hondro yari, di a tron p'pa fu Isak. ₆Dan Sara taki: “Gado meki mi e lafu baka èn ala sma di yere sa lafu nanga mi.” ₇A taki moro fara taki: “Suma ben o taigi Abraham taki: ‘Sara o gi pikin bobi?’ Ma mi gi en wan manpikin tapu en owrudei.”

₈A pikin ben gro kon te leki a ten ben doro taki a no ben o dringi bobi moro. Abraham ben gi wan bigi fesa tapu a dei di den ben o puru Isak na bobi. ₉Dan Sara si fa a boi di Hagar fu Egipte ben kisi gi Abraham, e meki spotu. ₁₀Ne a taigi Abraham taki: “Yu mus seni a umasrafu nanga a boi fu en gwe. Mi no wani taki mi boi Isak prati den gudu di yu o libi na baka nanga a boi fu a umasrafu.” ₁₁A sani disi no ben switi srefsrefi na Abraham, bika a boi dati ben de en pikin tu. ₁₂Ma Gado taigi Abraham taki: “Yu no abi fu firi ferferi fu a tori fu a boi nanga a umasrafu fu yu. Du ala sani san Sara aksi yu fu du. Bika na den bakapikin fu Isak den o kari pikin fu Abraham. ₁₃Ma mi sa meki den bakapikin fu a boi fu a umasrafu tron wan folku tu, bika a de wan pikin fu yu tu.”

₁₄A tamara mamanten fu en, frukufruku, Abraham langa brede nanga wan saka watra gi Hagar. A poti a boi na tapu Hagar skowru dan a seni den gwe. So Hagar gwe, dan a bigin waka lontu ini a dreisabana fu Berseba. ₁₅Di watra no ben de moro ini a saka, a libi a pikin ondro wan pikin bon. ₁₆Ensrefi go sidon pikinso moro fara. So fara leki wan man ben o man sutu wan peiri gwe. A ben prakseri na ensrefi taki: “Mi no abi fu si fa a pikin e dede.” Dan a bari krei. ₁₇Ma Gado ben yere fa a boi e kari. Dan fu heimel a Engel fu Gado kari Hagar dan a aksi en taki: “Hagar, san du yu? No frede, bika Gado yere a sten fu a boi ondro a pikin bon. ₁₈Opo go teki a boi dan yu e brasa en hori, bika Mi o meki den bakapikin fu en tron wan bigi folku.” ₁₉Dan Gado opo den ai fu Hagar fu a si wan watrapeti. Ne Hagar go furu a watrasaka dan a meki a boi dringi.

₂₀Gado ben sorgu taki a boi ben e gro bun. A ben go libi ini a dreisabana fu Paran, pe a tron wan man di ben sabi sutu bun nanga peiri nanga bo. ₂₁Drape en m'ma teki wan frow fu Egipte gi en.

₂₂A srefi pisten dati Abimelek nanga Pikol, a kapten fu en legre, kon na Abraham dan den taigi en taki: “Wi sabi taki Gado de nanga yu na ini ala sani di yu e du. ₂₃Sweri gi mi dan na Gado taki yu no sa bedrigi mi, den pikin fu mi noso den bakapikin fu mi. Mi libi bun nanga yu. Libi bun tu nanga mi èn nanga den sma fu a kondre disi, pe yu e tan leki doroseisma.” ₂₄Dan Abraham piki taki: “Mi e sweri en.” ₂₅Ma a srefi momenti Abraham kragi gi Abimelek taki den knekti fu en ben puru wan watrapeti nanga tranga na en anu. ₂₆Ne Abimelek piki en taki: “Mi no sabi suma du dati. Na tide fosi mi e yere disi. Yu no ben taigi mi.” ₂₇Dan Abraham gi Abimelek skapu nanga kaw, dan den meki wan ferbontu. ₂₈Ma Abraham ben poti seibi pikin skapu aparti. ₂₉So Abimelek aksi en taki: “Fu sanede yu poti seibi pikin skapu aparti.” ₃₀Ne Abraham piki taki: “Mi wani fu yu teki den leki wan kado fu mi. Dan nanga dati yu e sori taki yu sabi tak' na mi diki a peti disi.”

₃₁Dat' meki sma e kari a presi dati Berseba, bika na drape den tu man disi ben meki wan ferbontu. ₃₂Baka di den meki a ferbontu nanga Abraham, Abimelek nanga Pikol, a kapten fu en legre, drai go baka na a kondre fu den Filistijnsma. ₃₃Dan Abraham prani wan bon na Berseba dan drape a anbegi MASRA, A Gado di de fu têgo. ₃₄Abraham tan libi langa leki wan doroseisma ini a kondre fu den Filistijnsma.