Lees verschillende vertalingenLees verschillende vertalingen
Vergelijk verschillende vertalingenVergelijk verschillende vertalingen
Maak uw notitiesMaak uw notities
Kopieer en markeer BijbeltekstenKopieer en markeer Bijbelteksten
Uitproberen
Hosea 7
1Ala yuru te Mi dresi Israel, den kruktudu fu Efraim nanga den ogri fu Samaria e kon na krin. Bika den e bedrigi. Fufuruman e broko go ini den oso, na dorosei grupu fu abani e fufuru. 2Den no e prakseri srefi taki Mi e memre ala a ogri di den e du. Den sani di den du de lontu den, èn Mi e si den. 3Den e gi a kownu fu den prisiri nanga den ogri di den e du. Den fesiman fu den breiti nanga den lei fu den.
4Den alamala e libi wan huru libi. Den gersi wan onfu di e tan bron, aladi a bakriman no e poti udu moro ini en, fu di a e masi a blon fu a kan sweri. 5Tapu a fesadei fu kownu den e drungu den fesiman nanga tranga sopi. Dan kownu e seki anu nanga den man di no abi konsensi. 6Den ati lai nanga korifasi, a gersi wan onfu. Awinsi den sribi heri neti, te mamanten a faya e opo baka. 7Den alamala gersi onfu. Den e bron den tiriman fu den, ala den kownu fu den o fadon. No wan fu den e kari Mi.
8Efraim e moksi nanga tra folku. Efraim gersi wan fadon kuku. 9Doroseisma gwe nanga ala en krakti, ma a no e si dati ete. Ala en wiwiri kon weti, ma a no e si dati ete. 10A bigi fasi fu Israel e krutu en. Ma den no drai kon baka na MASRA, den Gado, aladi di ala den sani disi psa. 11Efraim gersi wan don doifi sondro ferstan. Den e kari Egipte fu kon yepi den, den e go suku kibripe na Asur. 12Ma te den opo fu frei, Mi e span wan net abra den. Mi hari den kon na gron, leki fowru di e frei na loktu. Te Mi yere taki den e opo fu frei, Mi e fanga den.
13Den mus luku bun, bika den frei gwe fu Mi. Den o dede, bika den drai den baka gi Mi. Den lei gi Mi, aladi Mi ferlusu den. 14A no trutru kari den e kari Mi, te den e didon e krei na tapu den bedi. Den e tyerfi den skin fu kan kisi karu nanga win. Na so den e drai den baka gi Mi. 15Den e prakseri fu du Mi ala sortu ogri, aladi na Mi gi den leri, èn gi den krakti. 16Den e drai, ma den no e drai kon na Mi. Den gersi wan bo di yu no man fertrow. Den fesiman fu den o dede na ini feti, fu den bigi taki di den ben taki. Dan Egipte o teki den meki spotu fu dati.
